Gikan sa Among mga Magbabasa
Mga Isyu sa Kababayen-an Salamat kaayo alang sa mga artikulong naghisgot sa pagdagmal sa kababayen-an (Nobyembre 22, 1988), tabang alang sa pamilya sa mga alkoholiko (Mayo 22, 1992), ug pagtahod alang sa kababayen-an (Hulyo 8, 1992). Kining mga artikuloha nagpakita sa tagsaong ka lalom sa pagsabot labot sa tawhanong kinaiya. Sa gabii sa akong kasal, ako nayudyod sa lilo sa masakit nga mga kasinatian. Nagkaproblema ako sa panglawas ug mikonsulta sa mga doktor ug mga propesyonal sa sakit-sa-utok. Ang usa ka butang nga sama niini dili sayong sabton sa daghan, ug kon mangayo kag tabang sa usa nga dili mahibalo kon unsay isulti, mosamot pa kana ka lisod. Bisan pa niana, sa kataposan mibati ako nga ang kalibog nahusay ug natin-aw ra ang mga butang, salamat sa inyong mga artikulo.
N. H., Argentina
Niagara Dili ko mapugngan ang akong pahiyom samtang nagbasa ako sa artikulong “Niagara Falls—Way-Paglubad nga Mutya sa Kayutaang Amerika.” (Oktubre 8, 1992) Kami may gagmayng busay dinhi sa kalasangan, apan ang paghanduraw sa ingon ka tahom nga talan-awon nakapamalandong kanako sa gugma ni Jehova alang kanato ug sa iyang tinguha nga kita makaapresyar sa bug-os sa iyang mga kalalangan.
P. J. O., Nigeria
Pagtahod sa Kababayen-an Sa akong pagkabata, ako puno sa kultural nga pagpihig nga nakahimo kanakong madumtanon gayod sa mga babaye. Ang kaminyoon walay luna kanako! Apan salamat sa seryal sa mga artikulo mahitungod sa ulohang “Kababayen-an—Angayan sa Pagtahod” (Hulyo 8, 1992), akong giusab ang akong tinamdan sa mga babaye. Duha ka beses nakong gibasa ang mga artikulo, ug karon ako nagtuo nga sa usa ka adlaw mahimo akong usa ka sulondang bana.
N. B. M., Côte d’ Ivoire
Mga Tawag sa Telepono Nakadayeg ako sa inyong artikulong “Mga Batan-on Nangutana . . . Unsay Daotan sa Pagpakig-estoryahanay sa Usag Usa?” (Agosto 22, 1992) Ako usab nakig-estorya sa usa sa kaatbang sa sekso sa telepono. Morag naglutaw ako sa hangin! Apan sa dihang giharong ko kining tawhana ug gisultihan siya sa akong gibati, akong nadiskobrehan nga siya dili seryoso nako. Ako maoy biktima sa usa ka kiat. Maayo untang nabasa ko ang inyong artikulo sa miaging tuig. Dili unta kaayo tingali sakitan ang akong kasingkasing.
L. R., Tinipong Bansa
Pagsusi sa Wanang Ako nagtrabaho sa sanga sa Italya sa European Space Agency. Makadaghang higayon nga misugyot ako nga ang rebista sa prensa nga brosyur nga giandam alang sa among trabahante mag-apil sa mga artikulo gikan sa Pagmata!—apan walay resulta. Apan, ang mga artikulo bahin sa “Pagsusi sa Wanang” (Septiyembre 8, 1992) gigamit ug hapit nahurot ang luna sa among rebista sa prensa! Salamat sa Pagmata! daghan akog higayon sa paghisgot sa Bibliya uban sa akong mga kauban.
P. B., Italya
Kalingawan Ako 20 anyos ug bag-o lang nakabasa sa seryal sa “Sa Unsang Paagi Apektado sa Kalingawan ang Imong Kinabuhi?” (Nobyembre 8, 1992) Akong nakaplagan ang impormasyon nga husto sa panahon ug timbang. Ang pila ka batan-on mibati nga pinig-otan sa tanang mga restriksiyon ug mga giya nga kinahanglan natong bantayan ingong mga Kristohanon. Ang akong igsoong lalaki, pananglitan, mihunong sa pagkahimong Kristohanon tungod kay mao kanay iyang gibati. Apan akong giisip kining maong mga giya ingong panalipod, ug gibati ko nga luwas kaayo ug gihigugma sa pagkahibalo nga si Jehova may igong kahangawa kanato aron mabulag kita gikan sa kalibotan ni Satanas.
D. C., Tinipong Bansa
Giapresyar kaayo nako ang isyu bahin sa kalingawan, apan gusto kong masayod kon diin kamo nagkuhag impormasyon nga detalyado man ninyong gihubit ang mga salidang sama sa Basic Instinct?
A. A., Italya
Ang mga komento gibase sa mga taho sa balita diha sa kasaligang mga mantalaan ug mga magasin. Dili kinahanglang tan-awon pa sa membro sa among tigdukiduki kining talamayong salida.—ED.