Gikan sa Among mga Magbabasa
Pagpadako sa Anak Ang seryal “Imong mga Anak—Pagbuhat Kon Unsay Labing Maayo Alang Kanila” (Septiyembre 22, 1992) nagladlad sa akong kakulangan ingong ginikanan. Ang akong bug-os nga atensiyon nasentro sa personal nga mga butang ug sa mga kalihokan sa kongregasyon—sa ingon napasagdan ang akong tres-anyos nga anak nga lalaki. Siya kilas kaayo nga pagkabata. Dali ra usab akong masuko, sapoton, ug maulaw sa pagpakitag pagmahal. Inay gakson ko ang akong anak, sobra ra kaayo ako ka istrikto. Sanglit dagayang gihatagan kita ni Jehova ug gugma, maningkamot na ako karon sa paghatag ug dagayang gugma sa panulondon nga akong nadawat gikan kang Jehova.
T. T., Hapon
Bisag ako dili usa ka ginikanan, ako mahigugmaon ug mga bata, ug kining isyuha nakatandog sa akong kasingkasing. Nakahilak ako sa pagkasayod sa makasubong mga suliran nga ginasagubang sa mga bata karong adlawa. Ang inyong artikulo usab impormatibo kaayo sa pagpakita kon sa unsang paagi pakiglabotan kining mga sulirana sa labing sayo pa nga ang-ang sa kinabuhi aron malikayan ang makahahadlok nga mga suliran sa ulahing mga katuigan.
L. B., Tinipong Bansa
Ang mga artikulo nagpatuki kanako ingong usa ka amahan. Sa dihang ako naminyo, ako batan-on pa kaayo ug mas interesado nga makauban sa akong mga higala kay sa akong pamilya. Ang pagbasa sa mga artikulo nakapaamgo kanako nga wala ko kahatagi ug igong panahon ang anak ko nga babaye. Hinaot kining mga artikuloha motukmod sa mga ginikanan sa pagbuhat sa labing maayo alang sa ilang mga anak.
A. V., Italya
Mga Sugilanon sa Hayop Salamat kaninyo sa artikulong “Ang Capybara—Sayop o Kahibudnganan sa Kalalangan?” (Septiyembre 22, 1992) Kanunay kong basahan ug mga artikulo ang akong anak mahitungod sa mga hayop. Uban kang Gn. Capybara nga maoy nakig-estorya mismo, ang artikulo nakalingaw sa akong anak!
C. T., Hapon
Usa ka makapatagbaw nga kapuli sa walay pulos nga mga materyal nga gipatik diha sa daghang magasin! Dungan namong gibasa kini sa akong mga anak. Ang pagkakat-on mahitungod sa bag-o ug nagkalainlaing mga hayop makalingaw!
C. H., Tinipong Bansa
Salamat kaninyo sa artikulong “Kanang Katingalahang mga Marsupial Gikan sa Nasod sa Ubos.” (Hulyo 22, 1992) Ang paagi sa pagpanganak niining mga hayopa ug sa pagpagawas ug nagkalainlaing matang sa gatas nakita ko nga ilabinang makaiikag. Kini nakapamalandong kanako kon sa unsang paagi ang gahom ni Jehova tin-awng makita gikan sa iyang mga linalang!
N. S., Italya
Ako 14 anyos, ug nalingaw ako sa artikulong “Ang Arabianhong Kamelyo—Daghag-Gamit nga Sakyanan sa Aprika.” (Hunyo 8, 1992) Inyong gisulat ang mga butang diha sa paagi nga naghimo sa impormasyon nga makalingaw kaayo.
G. C., Argentina
Pakigpulong Atubangan sa Publiko Ang artikulong “Ikaw Makapakigpulong Atubangan sa Mamiminaw!” (Hulyo 22, 1992) nakatabang kanako sa pagpakabatog trabaho. Unang gibasa ko kini sa tuyo nga ipadapat kini sa Kristohanong ministeryo. Apan sa dihang gipahibalo alang sa interbiyu sa trabaho, gibasa ko pag-usab ang artikulo ug gibansay ang daghang punto nga gihisgotan niini, sama sa makapakalma-sa-nerbiyos nga ehersisyo. Unya nag-ampo ako ug miadto sa interbiyu. Nadawat ako sa trabaho, ug ako mapasalamaton kaninyo sa pagtagana niining artikuloha sa hustong panahon.
K. B., Tinipong Bansa
Pagsusi sa Wanang Ingong tigbasa sa hinanduraw nga sugilanon sa siyensiya, ako naikag kaayo sa mga seryal bahin sa pagsusi sa wanang. (Septiyembre 8, 1992) Kini mihatag kanako ug timbang nga panglantaw niining labing makaiikag nga ulohan. Makapalig-on usab nga makita nga ang Diyos adunay kahibulongang katuyoan dili lamang alang niining planetaha kondili sa tibuok nga uniberso.
A. C., Tinipong Bansa