Gikan sa Among mga Magbabasa
Pagdisiplina sa mga Anak Ako nakaapresyar gayod sa artikulong “Ang Hunahuna sa Bibliya . . . ‘Ang Bunal sa Pagdisiplina’—Kinaraan na Ba?” (Septiyembre 8, 1992) Tungod sa pagdagsang sa pag-abuso sa mga bata ug sa paglinuog sa kalibotan alirong kanato, kita nagkinahanglag artikulo sama niini aron motabang kanato sa pagpabiling balanse. Nakaila akog mga bata nga gitratar ug hinobrang kabangis sukad sa pagkamasuso. Karong adlawa sila mga tin-edyer na nga may halalom nga mga suliran sa emosyon. Kinahanglan nato ang maong impormasyon aron motabang kanato sa paggiya ug pagtudlo sa atong mga anak sa mahigugmaong paagi.
M. B., Tinipong Bansa
May Tatak nga mga Sapot Salamat kaninyo alang sa artikulong “Mga Batan-on Nangutana . . . May Tatak nga mga Sapot—Alang ba Kanako?” (Septiyembre 8, 1992) Sa dihang mipahawa ako sa akong trabaho sa miaging tuig aron magbug-os panahon nga ebanghelisador, dili na ako makapalit ug may tatak nga mga sapot. Kini nakapalagot kanako sa makadiyot. Hinuon, karon nasabtan nako nga ang akong gipili maayo ug nga ang sapot alang sa dungog walay gihatag nga kaayohan kanako.
M. J. C., Brazil
Trahedya sa Aral nga Dagat Daghang salamat alang sa artikulong “Ang Trahedya sa Aral nga Dagat.” (Agosto 22, 1992) Sukad pa sa nag-eskuyla ako, kining dagata sa tunga sa yuta, ingon man sa kasikbit nga Dagat Caspian, nakadani kanako. Latas sa mga tuig, nakaipon akog materyal labot sa mas dako niining duha ka dagat, apan hangtod sa inyong artikulo, ang mga detalye mahitungod sa Dagat Aral talagsa ra kaayo.
D. H., Alemanya
Mga Apohan Bisan tuod kami dili na mga batan-on, ang akong asawa ug ako nakadayeg gayod sa “Mga Batan-on Nangutana . . . ” nga mga artikulo bahin sa pag-ipon ug puyo sa mga apohan. (Hulyo 8 ug Hulyo 22, 1992) Ning bag-o pa miipon kami sa apohang babaye sa akong asawa, ug kini nakahatag ug tinuod nga hagit alang kanamo. Ang inyong maayong tambag nga pinasikad sa Bibliya ug maalamong pagsabot sa edarang mga tawo mao gayod ang among gikinahanglan. Duha ka pagtuon sa pamilya nga pinasikad niadtong mga artikuloha ug praktikal nga pagpadapat sa tambag sa tino nakapaarang-arang sa among kahimtang.
J. L., Tinipong Bansa
Death Metal Ang inyong artikulo nga “Death Metal—Unsay Mensahe?” (Hulyo 8, 1992) dulot nga nakaapekto kanako. Kanunay akong nahasol niining musikaha. Ang inyong artikulo mihatag kanakog kusog ug kaisog sa pagwagtang niining satanasnong musika. May hataas pa akong pakigbugno, apan uban sa tabang ni Jehova modaog ra unya ako.
M. D., Tinipong Bansa
AIDS Ang inyong artikulo mahitungod sa “AIDS sa Aprika” (Agosto 8, 1992) kasaligan gayod! Ang tambag sa mga batan-on nga nagplanong mominyo mahimo pa ganing makaluwas ug kinabuhi. Ako usa ka bag-ong bawtismado nga Kristohanon, ug tungod sa akong milabayng estilo-sa-kinabuhi, nagpasusi ako alang sa impeksiyon sa HIV. Ang akong pagpasusi maoy negatibo. Ako nahibulong nganong ang pila nga kinahanglang masusi nagpanuko niana. Daghang mga minyo kansang mga kapikas dili matinumanon sa yano molaom sa maayong resulta. Apan nagkapeligroso nga mohulat lamang ug molaom nga kining makamatay nga sakit wala ikatakod.
L. J., Tinipong Bansa
Giapresyar namo kining prangka nga mga komento. Sumala sa Centers for Disease Control sa T.B., dangtag gikan tulo hangtod unom ka bulan tapos sa impeksiyon una pa ang lawas makapatungha ug igong mga pangsukol-sa-lawas aron mamatikdan pinaagig pagpasusi sa HIV. Busa ang pagpasusi pag-usab tingali kinahanglanon kon ang unang pagpasusi gihimo dili dugay tapos sa posibleng pagkaladlad sa kagaw sa AIDS.—ED.
Buot lang nako nga ipahayag ang apresasyon alang sa artikulong “AIDS—Mga Trabahante sa Pag-atiman sa Panglawas Pag-amping!” (Hunyo 22, 1992) Ako nagtrabaho sa sentro sa dinaliang pagtambal. Wala madugay tapos mabasa kining artikuloha, may miting kaming mga empleyado nga detalyadong gihisgotan sa maong panahon ang samang mga pagpanagana. Ako nakaarang sa pagsulti sa uban nga nabasa ko kini pag-una sa Pagmata!
T. M., Tinipong Bansa