Gikan sa Among mga Magbabasa
Mga apohan Ang mga isyu sa “Mga Batan-on Nangutana . . .” mga artikulo sa Hulyo 8 ug Hulyo 22, 1992, naghisgot bahin sa mga apohan nga miipon ug puyo. Ang akong apohang babaye miipon kanamo human nga namatay ang iyang bana. Siya ang nag-atiman kanako ug sa akong lima ka igsoon samtang si Mama ug Papa nagtrabaho; kami nagkasuod pag-ayo. Karon nga si Lola dili na makaatiman sa iyang kaugalingon, ako nakapribilehiyo sa pagbalos kaniyag diyutay sa iyang nahatag kanako. Kini dili sayon, sanglit ako adunay pamilya nga pagaatimanon, ug dili kaayo mahimsog ang akong panglawas. Apan maayo ang akong pagbati sa pag-atiman kaniya. Oo, daghang positibong mga butang ang mahitabo kon moipon ug puyo ang mga apohan!
B. M., Tinipong Bansa
Pagmatuto sa mga Anak Salamat kaninyo sa mga artikulo bahin sa “Pagmatuto sa mga Anak Diha sa Usa ka Imoral nga Kalibotan.” (Hunyo 22, 1992) Kamo nagpasidaan batok sa mga limbongan nga makasulod sa kongregasyon, nga nag-angkong mga Kristohanon. Sa miaging tuig ang among dalagita gipainom ug droga ug gilugos sa ingon niana nga ulitawo. Siya nagtuon sa Bibliya uban sa usa ka membro sa kongregasyon. Bisag gisilotan siya sa korte, ang epekto niini sa among pamilya grabe kaayo. Kami naglaom nga tun-an sa tanang Kristohanong mga ginikanan kining tukma sa panahong mga artikulo uban sa ilang mga anak, pasidan-an sila nga dili kaayo mosalig sa mga tawong aduna kunohay interes sa Bibliya.
K. V., Tinipong Bansa
Kining magasina nagpaamgo kanako kon unsa ka dako sa gihimong paningkamot sa among mga ginikanan sa pagpadako kanamo nga may pagkahadlok sa Diyos. Ako mismo nakabatog kaayohan gikan sa artikulong “Tabangi Sila sa Pagpilig Kapikas nga Maalamon.” Ako 16 anyos lamang ug dili pa interesado sa kaminyoon karon. Bisan pa, ako segurado nga kining praktikal nga tambag mapuslanon kanako sa umaabot.
N. G., Italya
Death-Metal nga Musika Daghang salamat alang sa artikulo nga “Death Metal—Unsay Mensahe?” (Hulyo 8, 1992) Ang heavy-metal ug musikang rap popular kaayo sa akong eskuylahan. Ang tanan nga dili makaangay niining matanga sa musika kataw-an. Ang artikulo nagpasayon kanako sa pag-ingong dili ingon man sa pagpatin-aw kon nganong dili ako gusto niining musikaha. Daghang salamat.
M. F., Alemanya
Pakigpulong sa Publiko Diyutayng mga komento lang bahin sa artikulong “Ikaw Makapakigpulong Atubangan sa Mamiminaw!” (Hulyo 22, 1992) Ako maulawon kanunay. Sa eskuylahan ako halos dili makasulti atubangan sa klase, ug miundang ako sa pagtungha sa kataposan tungod sa akong mga kahadlok. Apan sa dihang ako nahimong Kristohanon, nagpalista ako sa Tunghaan sa Teokratikanhong Ministeryo ug namulong atubangan sa mamiminaw. Kadto dili sayon, apan uban sa pag-ampo ug tinguha nga mabuntog ang akong problema, anam-anam ako nga miuswag. Bation ko pa gihapon ang kaulaw, apan ako nakapakigpulong na atubangan sa daghang mamiminaw sa mga kombensiyon sa mga Saksi ni Jehova!
A. H., Brazil
Pauswaga ang Imong Panumdoman Sa wala pa mobasa sa inyong artikulo “Kon Unsaon sa Pagpauswag sa Imong Panumdoman” (Hulyo 22, 1992), nadiskobrehan ko sa makausa pa nga may nakalimtan ako nga wala mapalit samtang ako namalit. Gihisgotan sa artikulo ang ubay-ubayng tabang sa pagbansay sa panumdoman sa usa, sama sa pagpormag hulagway sa hunahuna. Ang pananglitan sa paghulagway sa usa ka baka nga nanipilyo sa iyang ngipon kon ang usa kinahanglang mopalit ug gatas ug toothpaste kataw-anan kaayo. Sa umaabot, gamiton ko kining paagiha ug hinaot nga wala nay daladalang listahan sa palitonon.
E. B., Alemanya
Gikan sa Among mga Magbabasa Salamat kaayo sa inyong tipik nga bahin nga “Gikan sa Among mga Magbabasa.” Halayo sa pagkadaghag pulong nga gipili sa pagpaluyo sa inyong hunahuna, kini maoy usa ka koleksiyon sa makapatandog tawhanong mga kasinatian. Ang pagkaandam sa inyong pagpatik sa mga pagsaway sa magbabasa ug, usahay, ang pagtul-id sa editor maoy tin-aw nga pamatuod sa inyong kamapaubsanon.
C. Q., Italya