Gikan sa Among mga Magbabasa

Mga Bugno sa Korte Ingong abugado nga nalangkit sa mga kaso labot sa katungod sa pag-angkon sa anak ug kaso labot sa pag-abuno ug dugo, dili nako mabatbat kon unsa ka dako ang pagdasig nga akong nakuha gikan sa artikulong “Mga Saksi ni Jehova ‘Itugyan Ngadto sa Lokal nga mga Hukmanan.’” (Septiyembre 22, 1992) Niining miaging semana ang pila ka doktor, wala motagad sa espisipikong mga instruksiyon supak niana, miabuno ug dugo sa usa ka Saksi. Ang maong mabuotbuotong pagsalikway sa paninugdang relihiyoso ug personal nga mga katungod maoy dili madawat. Ang inyong artikulo midasig kanako ug dugang nga mopadayon sa bugno!

P. P., Tinipong Bansa

Kababayen-an​—Angayan sa Pagtahod Salamat alang sa seryeng “Kababayen-an​—Angayan sa Pagtahod.” (Hulyo 8, 1992) Kana nakatabang kanako sa pagsabot nga ang pagpakamenos sa mga babaye maoy usa ka suliran nga dili limitado sa usa ka komunidad, apan usa nga nagalungtad sa daghang nasod. Ako usab mapasalamaton sa mga sugyot aron malikayan ang seksuwal nga panghasi.

S. A., Nigeria

Ako nakadayeg sa pagkaprangka niining mga artikuloha. Ang inyong mga sugyot makatabang sa daghang tawo, lalaki, ug babaye, sa pagtimbangtimbang sa ilang mga tinamdan. Salamat sa inyong pagpakita kon unsa ang panlantaw ni Jehova sa kababayen-an.

J. P. L., Canada

Ako mibati gayod nga ang kababayen-an napasig-uli sa ilang hustong dapit ug gilantaw sa paagi nga angay silang lantawon. Hinaot ang Kristohanong mga lalaki makapabili usab niining mga artikuloha aron nga, kon kinahanglanon, sila mahimong makapasibo sa ilang panglantaw mahitungod sa kababayen-an. Kami magatahod pa ug dugang kanila sa paghimo niana.

E. S., Pransiya

Ang mga artikulo nagtugot kanamo nga mobatig maayo mahitungod sa among kaugalingon ug ipakita nga ang mga lalaki may kaakohan sa paglihok nga malinawon ug matinahuron kanamo. Ako nagtuo nga kini maoy maisogon kaayong mga artikulo, ug sila giapresyar gayod.

A. H., Tinipong Bansa

Kana nakapahupong kanako ug mitubod ang mga luha sa akong mga mata sa pagkahibalo nga ako anaa sa usa ka organisasyon nga may lig-ong baroganan mahitungod sa pagtratar sa kababayen-an. Sila maoy kinaunahang mga artikulo nga akong nakita nga walay gibiling luna alang sa abusadong mga lalaki aron himoong pasangil.

E. M., Tinipong Bansa

Ako nasayod nga kining impormasyona mahitungod sa panglantaw sa mga lalaki ngadto sa kababayen-an dili makapausab sa kalibotan, apan makapahupay gayod nga basahon ang mga pulong sa kamatuoran, paghupay, pagbati, ug pagsabot, ug nga mahibalo nga si Jehova sa tinuod nagatagad kanato.

H. Q., Tinipong Bansa

Ang mga artikulo dulot nga nakatandog kanako​—dili kay akong gipasagdan ang akong asawa, apan ako nakaseguro nga ako makahimo pa ug dugang sa pagtabang kaniya. Gitamod ko siya pag-ayo ug mibati nga kining mga artikuloha makatabang sa tanang Kristohanong bana sa pag-ila ug dugang pa sa bili sa among masigka-asawa. Sila takos sa pagtahod, dignidad, gugma, ug pagsabot gikan sa ilang masigka-bana.

S. S., Brazil

Kamatayon Ang inyong isyu bahin sa “Kon ang Usa ka Minahal Mamatay” (Hulyo 22, 1992) nakatandog sa akong kasingkasing. Sa adlaw mismo nga amo kanang nadawat, ang akong 16-anyos nga bayaw namatay tungod sa kanser. Ang mga artikulo sa pagkatinuod makapalig-on sa panahon sa kasub-anan. Ang among mga higala ug paryente mitabang kanamo sa pagtagana ug pagkaon, paghupay, ug tabang sa paghikay sa lubong. Si Jehova gayod sa pagkatinuod nagalipay pinaagi sa tukma sa panahong mga artikulo sama niini.

C. C., Tinipong Bansa