Gikan sa Among mga Magbabasa

Binaba nga Pag-abuso Ang seryal nga “Gikan sa mga Pulong nga Makasilo Ngadto sa mga Pulong nga Makahupay” (Oktubre 22, 1996) maoy usa lamang sa daghang artikulo nga nagpakita sa pagkadako sa pagtagad ni Jehova kanato. Ang mga artikulo bahin sa “Tabang Alang sa mga Alkoholiko ug sa Ilang mga Pamilya” (Mayo 22, 1992), “Kababayen-an​—Angayan sa Pagtahod” (Hulyo 8, 1992), “Tabang Alang sa mga Anak sa Nagdiborsiyo” (Abril 22, 1991), ug “Matapos ba Gayod ang Kapintasan sa Pamilya?” (Pebrero 8, 1993) tanan nagpalig-on kanako latas sa katuigan sa emosyonal nga pag-abuso sa mga kamot sa usa ka alkoholikong bana. Gibasa ko kining mga artikuloha uban ang mga luha sa kalipay ug kasubo. Ang akong kasingkasing nagsugwak uban sa pagpasalamat alang sa usa ka Diyos nga nasayod sa atong labing kinailadmang mga kahadlok, kasakit, ug di-maayong mga kasinatian.

J. C., Canada

Ang mga artikulo nakatandog kaayo kanako. Kini hustong naghubit sa akong kahimtang uban sa akong bana. Ako nakauyon gayod sa matag tudling pulong. Gitagad ninyo ang mga babaye nga mahigugmaon kaayo, ug kini nagpamatuod kanako nga kining organisasyona maoy gigamit ni Jehova.

P. S., Alemanya

Kini nga mga artikulo nagdasig kanako nga padayong makig-away sa akong mga kahuyangan pinaagi sa pagkontrolar sa akong dila. Karon ako nasayod na kon unsaon nako pagtagad ang akong bana. Gibasa ko ang mga artikulo uban ang mga luha sa akong mga mata.

G. I., Austria

Ako nahimong biktima sa binaba nga kapintasan gikan sa akong bana sa daghang katuigan. Nakahimo ako sa paglikay sa lit-ag sa pagkaguol pinaagi sa pag-ugmad sa mga bunga sa espiritu sa Diyos ug pinaagi sa paghimo sa akong kaugalingon nga puliki sa bug-os panahong pagsangyaw nga buluhaton. Ang inyong mga artikulo nagpabati kanakong wala mag-inusara​—nga adunay nakasabot sa problema.

M. N., Italya

Nabasa ko na ang daghan sa inyong mga artikulo niadto, apan kining mga artikuloha nakatandog gayod kanako. Ang pagtan-aw sa letrato sa panid 9 maoy samag nagtan-aw sa akong inahan o akong igsoong babaye, kinsa sa daghang tuig nag-antos sa mga kamot sa ilang mga bana. Naghimo akog mga kopya niining mga artikuloha ug nagpadala niini sa uban kinsa akong nahibaloan nga nag-antos usab niining paagiha. Kami nagpaabot sa bag-ong kalibotan sa Diyos, diin ang maabusohong sinultihan sa tanang matang pagawagtangon na.

B. P., Kenya

Sa gihatag ko ang magasin sa akong tiyo nga nag-abuso sa iyang asawa pinaagi sa pulong, gibasa niya kini sa makadaghan. Human niadto, among namatikdan nga wala na siya mag-abuso sa iyang asawa ug wala nay bisan unsang kasamok sa ilang balay. Siya ug ang iyang asawa kanunayng nagpasalamat kanako sa pagtabang kanila nga makasabot sa ilang kaugalingon. Buot kong ipasa ang pasalamat sa Pagmata!

F. F., Nigeria

Giyanon Niadto Ako mapasalamaton sa artikulong “Ang Kamatuoran Nagpasig-uli sa Akong Kinabuhi.” (Oktubre 22, 1996) Ako 19 anyos, ug bisan tuod ako regular payunir, o bug-os-panahong ebanghelisador, bation ko usahay nga nakulangan ako sa pipila ka butang. Ang kasinatian ni Dolly Horry nakatabang kanako nga makitang ang pagkamadanihon sa kalibotan maoy usa ka handurawan lamang.

R. M. A., Bolivia

Buot kong isugilon kaninyo nga ako natandog kaayo niini nga artikulo. Samtang gibasa ko ang sugilanon sa kinabuhi ni Dolly Horry, ang mga luha midagayday sa akong aping. Giampo ko nga kining artikuloha magpalihok sa uban nga samag paagi sa kinabuhi ni Dolly niadto sa pagliso ngadto sa usa ka makahuloganong kinabuhi karon.

O. S. O., Nigeria

Ingong usa sa mga Saksi ni Jehova, gibati kong dungganon nga nakabaton kang Dolly Horry ingong usa ka Kristohanong sister. Sa akong pagkatin-edyer gibutang ko si Jehova sa ikaduhang dapit sa akong kinabuhi. Hinuon, wala mosurender ang akong inahan kanako ug siya malipayon kaayo sa akong pagpabawtismo sa miaging tuig.

B. B., Australia