Gikan sa Among mga Magbabasa

Aborsiyon Ang inyong serye nga “Aborsiyon​—Ang Pagturok ug ang Pagputi sa Kinabuhi” (Mayo 22, 1993) nakapalugmaw sa akong mga luha ug nagdalag kasakit sa akong kasingkasing. Kon nabasa pa nako kining impormasyona walo ka tuig kanhi, dili unta ako magpakuha. Midangat ug pito ka tuig usa nako gisugid kining salaa ngadto sa akong bana, nga mao untay amahan. Hinaot nga si bisan kinsa nga naghunahunag aborsiyon mobasa sa mga artikulo ug makaamgo nga ang kinabuhi bililhon ug usa ka gasa gikan sa Diyos.

G. D., Tinipong Bansa

Ako 16 anyos, ug kami nakakat-on mahitungod sa aborsiyon diha sa eskuylahan. Apan, daw wala ako makaamgo sa kasakit nga nalangkit alang sa bata. Samtang nagbasa ako niining magasina, nasuko kaayo ako, dili ako makahunong sa paghilak. Nganong ang mga tawo naghatag ug diyutayng pagtagad sa bililhong kinabuhi nga malulutong gihatag ni Jehova?

N. K., Hapon

Gidala ko kining magasina sa eskuylahan, ug sa akong dakong katingala, ang mga estudyante nakagusto niana! Kana nakatandog sa kasingkasing sa akong mga klasmet sa punto nga usa kanila wala makapugong sa iyang gibati ug mihilak. Pila lang ka adlaw nga milabay, nagpakuha siya.

L. S., Tinipong Bansa

Mga Helikopter Ang inyong artikulo nga “Ang Sinaligang Sakyanan sa Kahanginan” (Marso 8, 1993) sa linain nakapainteres kanako. Ingong inspektor sa kahilwas sa paglupad sa Federal Aviation Administration ug usa ka piloto/instruktor sa pagpalupad sa helikopter, nakita nako nga ang inyong artikulo nagbanaag ug talagsaong pagbantay sa katukma. Ilabinang nakaapresyar ako sa pagkayano sa pesentasyon.

J. R., Tinipong Bansa

Pagpaniwang Akong nabasa ang artikulong “Kon Ako Nakapaniwang, Makapaniwang Usab ang si Bisan Kinsa!” (Enero 22, 1993), ug samtang ako nalipay kaayo nga ang magsusulat nagdumala sa iyang pakigbugno sa iyang timbang, ako nabalaka nga ang artikulo magdasig sa daghan sa paghunahuna nga ang mga tawong sobrag-timbang nagkinahanglan lamang ug pagpugong sa kaugalingon ug magdiyeta. Ang akong problema naglangkit ug labaw pa kay sa masulbad sa “1,200 ngadto sa 1,500 ka kaloriya matag adlaw” nga diyeta. Alang kanako ang pagkaon dili-kapugngan, usa ka droga. Bag-o pa lang nga ako nakasabot nga ingong hamtong nga anak sa usa ka alkoholiko, naningkamot ako sa pagtagbaw sa kagutom alang sa gugma ug pagtamod sa kaugalingon. Busa ang estriktong pagdiyeta dili maoy yanong solusyon niining komplikadong suliran.

R. S., Tinipong Bansa

Among giapresyar kining madayganong mga komento. Hinuon, ang artikulo pangunang gitumong sa mga tawo nga adunay dili-maayong batasan sa pagkaon, dili niadtong nakigbisog sa seryosong mga suliran sa pagkaon. Ang ulahi mahimong magkinahanglan ug propesyonal nga tabang aron sa pagbuntog sa ilang mga suliran. Ang makatabang nga mga impormasyon mahitungod sa mga suliran sa pagkaon gipatik sa among Pebrero 22, 1992 nga isyu.​—ED.

Ang artikulo maoy sama sa usa ka repaso sa akong kaugalingong kasaysayan sa dili-maayong mga batasan sa pagkaon. Ang mga sugyot mapuslanon kaayo, ug ako karon nagpadapat niini. Daghan kaayong salamat niining artikuloha!

S. P., Brazil

Ang artikulo nagtudlo kanako kon unsaon pagbalanse ang akong mga batasan sa pagkaon sa mahimsog nga paagi. Kini mao gayoy akong gikinahanglan. Salamat!

S. G., Tinipong Bansa

Mga Kabayo Natandog ako sa artikulong “Ang mga Kabayo Maoy Akong Kinabuhi Kaniadto.” (Mayo 22, 1993) Sa wala pa ako mahimong Kristohanon, ako migugol sa halos tanan nakong libreng panahon sa pagsakay ug pag-atiman sa mga kabayo. Hinuon, human sa pagtuon sa Bibliya akong gihunong ang akong mahalon nga pasatiempo ug misugod sa bug-os-panahong pagsangyaw nga buluhaton. Bisan pa niana, gusto gihapon akog mga kabayo. Ang artikulo nakatabang kanako sa pag-ila nga ang uban nakadumala sa samang mga pagbati.

G. V., Alemanya