“Dili Kami Hinikawan!”

Ang mga komento gipahayag sa mga magtutudlo ug sa uban nga ang mga bata sa mga Saksi ni Jehova hinikawan kay dili tugotan sa pag-apil sa kalingawan sa mga saulog sa eskuylahan sa Pasko, Easter, ug Adlaw sa Minatay. Ang mosunod maoy gamayng sampol sa mga komento sa mga bata nga mga Saksi ni Jehova, nga gipahayag diha sa mga sulat kon nganong sila mismo mibalibad sa pagsalmot sa pagsaulog niining mga selebrasyona.

“BISAN pag akong gipatin-aw ngadto sa akong mga klasmet kon nganong dili ako mosaulog niining mga butanga, mibati gihapon sila nga gihikawan ako. Apan dili ako hinikawan! Tan-awa ra, sila kanunayng maghulat sa ilang Pasko o sa laing selebrasyon aron makadawat ug mga gasa, samtang ako hatagag mga regalo ug moadto sa mga parti sa tibuok tuig. Ako nasayod nga ako gimahal dili lang sa akong pamilya apan sa kongregasyon ug ni Jehova usab, ug kana labawng espesyal alang kanako kay sa bisan unsang selebrasyon.”​—Becky, 13-anyos.

“Nasayod ako nga ang tanang selebrasyon may daotang mga kagikan. Si Jesus wala matawo sa Pasko. Dili kinahanglang may buhaton ang akong pamilya aron mabakwi ang maong mga selebrasyon. Ang akong pamilya kanunayng andam motabang kanako sa dihang sila akong gikinahanglan. Alang kanako labaw pag bili kana kay sa bisan unsang regalo nga ilang ikahatag kanako.”​—Josh, 15-anyos.

“Pasko. Ako dili hinikawan kay kini dili gayod Kristohanon. Palabihon ko nga tagaan ako sa akong mga ginikanan ug regalo kay sa misteryosong Santa. Easter. Bahin sa Easter kini lisod kaayo kay ang mga tawo moingon nga kini maoy alang kang ‘Jesus ug sa pagkabanhaw’ o kini mao lamay ‘pagpangita sa mga itlog.’ Apan unsay labot ni Jesus sa mga itlog? Bisan ang ngalang Easter naggikan sa usa ka karaang diyosa. Adlaw sa Minatay. Ang pasukaranang ideya sa Adlaw sa Minatay dili gayod madanihon kanako. Mga multo ug mga balbal, KANGIL-AD!”​—Katie, 10-anyos.

“Ingong usa ka binatilyo wala gayod ako mayugot bahin sa pagkadili-makaapil sa mga saulog sa kalibotanong mga selebrasyon. Wala ako sultihi sa akong mga ginikanan nga ‘dili ka makahimo niini o niana kay usa ka sa mga Saksi ni Jehova,’ apan ako nasinati sa Bibliya ug sa mga hunahuna ni Jehova mahitungod sa maong mga selebrasyon. Bahin sa mga regalo, sa among balay, ang paghatag ug regalo maoy sa tibuok tuig.”​—Ryan, 17-anyos.

“Ang matag selebrasyon nagasaulog sa butang nga bakak ug gitumong sa bakak nga mga butang. Kadaghanan sa mga batang akong nailhan nagsaulog sa mga selebrasyon tungod sa kendi o sa mga regalo. Ang butang nga akong nabatonan nga mas maayo pa kay sa mga selebrasyon mao ang kahibulongang organisasyon sa mga Saksi ni Jehova. Inay molungtad ug usa ka adlaw, sama sa usa ka selebrasyon, ang Pulong ni Jehova nga Diyos adunay makapalipay nga mensahe nga molungtad sa walay kataposan.”​—Brooke, 14-anyos.

“Mga katarongan nganong dili ako mahinugon sa mga selebrasyon: 1. Ang Bibliya nag-ingon nga kana sila daotan. 2. Dili ako moangay niana nila. 3. Ang akong mama ug papa naghatag kanakog mga regalo.”​—Brandi, 6-anyos.

“Wala ako mobating hinikawan. Wala ako matugaw. Ako makadawat ug mga regalo, ug kami may mga dula ug mga parti. Ako makadawat ug daghang butang bisan pag dili magsaulog sa mga selebrasyon. Gusto ko nga magpabilin nga Saksi bisan unsay akong buhaton ug walay makapatalikod kanako.”​—Brianne, 9-anyos.

“Ako magkinto grado na ug dili ako masubo sa pag-angkon nga ako usa ka Saksi ni Jehova. Sa usa ka panahon ang usa ka batang lalaki miingon kanako nga ako masulob-on kay dili ako makadawat ug mga regalo sa Pasko, apan miingon ako nga ako nagadawat ug mga regalo sa tibuok tuig. Dayon siya miingon nga bulahan ako. Sa akong hunahuna kinahanglang walay Saksi ni Jehova ang mobati nga masulob-on tungod sa pagkahimong Saksi ni Jehova.”​—Jeff, 10-anyos.

“Ang akong igsoong babaye ug ako nagsaulog sa anibersaryo sa among mga ginikanan nga kaugalingong selebrasyon sa among pamilya. Ako mibatig labing dakong kalipay gikan sa pagplano sa mga regalo ug mga kard ug mga butang ug pagtabang sa akong mga ginikanan sa pagplano sa mga butang sa pagsorprisa sa usag usa kay sa pagdawat ug mga regalo gikan ni bisan kinsa. Ang paghatag labi pang maayo kay sa pagdawat.”​—Rachel, 16-anyos.

“Sa bata pa ako, ang pila ka selebrasyon lisod alang kanako. Apan sa ulahi ako nakaamgo nga ang mga selebrasyon makapahinabo sa kadalo, mga argumento, ug kasubo. Sa dihang adunay tinong mga panahon sa paghatag, dili ka na masorprisa sa usa ka regalo. Palabihon ko pa nga makadawat ug espesyal nga mga regalo sa bisan unsang panahon sa tuig. Ang pagsaulog o dili pagsaulog gamay lamang nga bahin sa labi pang dakong desisyon: pagpahinungod kaha sa imong kaugalingon sa pag-alagad kang Jehova o dili. Kon maghunahuna ako sa maong paagi, matin-aw ang hustong pagpili.”​—Ben, 13-anyos.

“Sa bata pa ako may mga panahong gibati ko nga ako may nasayloang tilinguhaong butang, apan nahikatawa ako sa ulahi sa dihang gipalandong ko kon sa unsang paagi nagkatingob ang mga itlog, si Jesus, ug ang Easter bunny. Sa midakodako na ako ug ang akong mga ginikanan nagpatin-aw kon diin gikan ang tanang simbolo, gingil-aran ako niana. Masubo ako inigpalandong ko kon unsay gibati ni Jehova ug ni Jesus nga ilangkit sila sa maong paganong mga ideya.”​—Alexa, 18-anyos.

“Panahon sa Pasko, ang pagkaatua sa eskuylahan makapaguol kaayo ug mopabati kanimo nga walay labot. Unya ako nakaamgo nga ang pagsaulog sa Pasko dili makasulbad sa imong mga suliran, dili makapasuod sa inyong pamilya, ug dili makapalipay kanimo. Ang pagsunod lang sa mga sukdanan sa Bibliya sa kinabuhi ang makapahinabo niini.”​—Joe, 15-anyos.

“Imbes sa pagkadunay Pasko o ubang selebrasyon, kami may Adlaw sa Dagkong mga Dulaan. Kami makadawat ug regalong kuwarta aron ipalit sa bisan unsang magustohan namo. Usa ka tuig ako mihatag ug pakigpulong sa akong klase mahitungod sa akong relihiyon. Inay sundon ang dalan sa kalibotan, gihimo ko ang akong kaugalingong dalan sa pagtambong sa mga tigom, paggula sa pagsangyaw sa kanataran, ug paghimo sa pag-ampo nga bahin sa akong kinabuhi. Magpabawtismo na ako sa sunod nga asembliya.”​—George, 11-anyos.

“Gusto nakong makabaton ug mga regalo, ug ako nagdawat kanila sa tibuok tuig. Kon bahin sa mga parti ako dili kaayo mahinugon niana. Ginalipay ko si Jehova sa dihang ako mobarog dapig sa kamatuoran. Makalingaw ang pagtan-aw sa pipila ko ka klasmet nga dili Kristohanon, kinsa Hindu, Hudiyo, ug uban pa, nga magsaulog sa Pasko ug makadawat ug mga regalo apan walay kasayoran bahin sa selebrasyon.”​—Julia, 12-anyos.

“Sa dihang wala ako moapil sa mga selebrasyon sa eskuylahan ako wala gayod magbasol. Ang daghang katingad-anang butang ginabuhat sa mga bata, sama sa pagtakoban sa Adlaw sa Minatay. Dili gayod ako mahinugon niana. Giingnan ko sila nga palitan akog mga butang sa akong mga ginikanan sa tibuok tuig. Gisuginlan nila ako bahin sa ilang simbahan ug kon unsa ka makapuol kana, ug gisultihan ko sila bahin sa among mga panagtapok sa parke, ug may panahong nasina pa sila. Apan ako wala masina kanila. Sa pagsuma, ako moingon nga makighigala lang niadtong motahod sa imong mga pagtuo ug ayaw tugoti nga ang usa ka estudyante o magtutudlo magpugos kanimo sa pagbuhat sa bisan unsang supak sa kabubut-on ni Jehova.”​—Justin, 12-anyos.

“Gibati ko ba nga hinikawan? Wala, kay kami may ubang mga parti, ug inigsaulog sa mga tawo sa Pasko, ang mga bata maghunahuna lamang kang Santa Claus, o sa panahon sa Easter sila maghunahuna sa Easter bunny, apan ako nahibalo nga sila naggikan sa paganong mga relihiyon. Moangay ako sa pagsangyaw sa kanataran kay kini motabang kanako sa pagtumong sa pagtagad nganha sa kamatuoran.”​—Sharon, 8-anyos.

“Ako matinud-anon nga makasulti nga dili gayod ako diskontento sa pagkahimong usa sa mga Saksi ni Jehova. Ang akong pamilya ug ako may daghang kalingawan. Sa dihang may mga parti sa eskuylahan dad-on ako ni mama sa gawas aron mangaon. Ang akong mga ginikanan magdalag mga butang makalingaw sa eskuylahan sa wala lamay linaing hinungdan ug unya ang tanang bata mahibalo nga kami malingaw. Ako suod kaayo sa akong mga ginikanan ug sa dihang ang mga bata mangutana kon nganong dili ako mosaulog sa mga selebrasyon sultihan ko sila nga ako nagasaulog sa kada adlaw. Unsaon pagbati sa Saksi nga walay labot?”​—Megan, 13-anyos.

“Adlaw sa Minatay. Ang mga bata magbiste nga sama sa mga yawa, mga karakter sa komiks​—alang sa unsa? Ang mga bata magsuroysuroy sa kadalanan nga mamalaybalay nga manguhag mga puyo nga puno sa kendi. O manglabay ug mga itlog sa mga balay, magsumpay sa mga tisyu ibabaw sa kakahoyan ug ang labing ngil-ad mao nga ang kadaghanang ginikanan motabang pa niana.”​—Zachary, 10-anyos.

“Dili kinahanglang maghulat akog espesyal nga adlaw aron makadawat ug mga regalo. Ang akong mama ug papa kanunayng maghatag kanakog mga dulaan. Ang Adlaw sa Minatay mao ang pagsimba sa patay nga mga espiritu. Dili kini husto. Ang bugtong Diyos nga atong pagasimbahon mao si Jehova.”​—Nicholas, 6-anyos.