“Kon Nganong Wala Ako Magsaulog ug Pasko”

ANG pipila miingon nga ang mga bata sa mga Saksi ni Jehova hinikawan tungod kay sila dili mosaulog ug Pasko. Apan tagda ang mubong sinulat nga “Kon Nganong Wala Ako Magsaulog ug Pasko” nga gisulat sa usa ka 11-anyos nga Saksi sa California, T.B.A., ingong usa ka asaynment sa klase:

“Alang sa daghang tawo, ang Pasko nagkahulogan ug daghang mga butang​—mga gasa, pamilya, mga gasa, pagkaon, mga gasa, pag-ambitay, mga gasa, gugma, mga gasa, Santa Claus, mga gasa, ubp. Apan ang mga tawo karon talagsa rang maghunahuna bahin sa kahulogan sa Pasko o kon nganong sila nagsaulog niana. Kon ugaling sila naghunahuna man, sila kasagarang nagtuo nga ang Pasko maoy adlawng-natawhan ni Jesu-Kristo, usa ka panahon alang sa pamilya ug, natural, daghang mga gasa. Kadaghanang tawo maluoy sa mga Saksi ni Jehova tungod kay sila nagtuo nga hinikawan ang ilang mga anak. Apan kami ba gayod nawad-ag usa ka butang? Atong tagdon kon nganong ang mga Saksi ni Jehova wala magsaulog niining piyestaha.

“Ingong usa sa mga Saksi ni Jehova, wala ako magsaulog sa Pasko tungod sa daghang katarongan. Una, dili kana adlawng-natawhan ni Jesus. Ang Bibliya nagaingon nga dihay mga pastol sa gawas sa sibsibanan uban sa ilang mga karnero. Sa Jerusalem tugnaw kaayo panahon sa tingtugnaw ug subsob nga moulan ug niyebe. Dili gayod katuohan nga ang mga pastol magpabilin sa gawas sulod niining mga bulana. . . . Hinuon, duna pay daghang angay tagdon.

“Dili lamang kay ang Pasko dili adlawng-natawhan ni Jesus kondili kini wala gayod sauloga sa mga Kristohanon sa unang siglo. Ang mga sinugdanan niini masubay sa karaang Romanong piyestang Saturnalia, nga magsugod sa Dis. 17 ug matapos sa Dis. 25, ang ‘adlawng-natawhan sa dili-malupig nga adlaw.’ Niadtong ikaupat nga siglo, ang pipila ka Romanong opisyales nakahukom sa pagsaulog sa adlawng-natawhan ni Jesus sa Dis. 25, malagmit aron sa pagbalaan sa ilang paganong pangilin.

“Dili ikatingala nga ang Pasko gidili sa daghang nasod. Karon ang pipila ka tawo (sama sa mga Saksi ni Jehova) nagsunod sa ilang [unang siglong mga Kristohanon] panig-ingnan. . . .

“Kaniadto nagsaulog akog Pasko​—hangtod nagkuwatro anyos ako. . . . Kon bahin sa pagkahinikawan, ang mga Saksi ni Jehova sa pagkatinuod wala mahikawi. Nakadawat kami ug mga gasa sa tibuok tuig. Ang mga butang lamang nga nawala kanamo mao kining paganong mga piyesta ug ang ilang samang paganong mga selebrasyon.”

Bisan tuod gisulatan sa magtutudlo ang papel ug, “Dili tanang tawo nangandoy ug mga gasa,” siya usab misulat, “Maayong pagkasulat,” ug mihatag sa estudyante ug taas nga marka.