Pagpahimulos sa Hangin

ANG pagtukod sa unang komersiyal nga planta sa hangin sa Britanya misagubang ug temporaryong kapakyasan sa dihang, sumala sa The Independent sa London, ang usa sa mga kren nga gigamit sa pagtukod sa turbina gipadpad sa unos. Bisan pa niana, ang pagpahimulos sa hangin giangkon nga usa sa labing dali, labing barato nga paagi sa pagpatunghag elektrisidad. Ang labing maayong bahin mao, kana walay polusyon sa kemikal nga naggikan sa pagsunog sa nalubong nga mga sugnod, sama sa karbon.

Bisan pag daghang Uropanhong Nasod​—sama sa Alemanya, Denmark, ug Netherlands​—duyog sa California, ang mipabor sa mga planta sa hangin ingong tinubdan sa mabag-o nga enerhiya, dili tanang adunay kaikag sa kalikopan ang nalipay. Ang pipila misupak sa kasaba sa nagtuyok nga mga kapay sa turbina; ang uban wala makaangay sa ilang pagkadili-maayong tan-awon, ilabina kon ang mga makina nahimutang sa mga dapit nga adunay kinaiyanhong katahom.

Bisan pa niana, sa Britanya, usa sa mahangin kaayo nga mga nasod sa Uropa, ang mga tigtambag sa gobyerno nag-abiba sa enerhiya sa hangin sa baybayon ingong “ang labing malaomon bugtong tinubdan sa enerhiya sa mubong panahon,” nagtaho ang magasing New Scientist. Sa laing bahin, bisan pa sa dakong galastohan nga malangkit, ang mga tigsaway sa dapit sa baybayon nga pagkapahiluna nagsugyot sa pagtukod sa mga turbina palayo sa baybayon, nga maggamit ug linaing mga makinang igbubutad inay sa kren aron sa pagbalhin sa bug-at nga kagamitan​—nga nagpahimulos sa kusog nga hangin sa dagat.