Nganong Dili Mabalian ug Liog ang mga Balalatok?
NAKADUNGOG ka na bag balalatok nga nagbangag ug kahoy? Sanglit adunay mga 200 ka espesye sa balalatok sa tibuok kalibotan, tingali nakamatikod ka sa walay puas niining pagtuktok nga kon paminawon daw mipakang masinggan. Sa dihang nakakita akog usa, nga ang tuka niini nagtuktok sa lawas sa kahoy, kadto nakapahibulong kanako, ‘Nganong dili man kini mabalian ug liog o madaotan ug utok?’ Kon kitang tawo ang maghimo sa samang hinanaling lihok, magkinahanglan gayod kita sa chiropractor o sa siruhano sa utok! Kon mao, unsay sekreto?
Tagda pananglitan ang pulag-tiyan nga balalatok, nga makaplagan sa sidlakang bahin sa Tinipong Bansa. Ang Book of North American Birds nagpahayag: “Pinaagi sa iyang baga, korte-tigib nga tuka, iyang lakniton ang mga insekto gikan sa ilalom sa panit sa kahoy, motuktok ug mga lungag aron makuha ang mga bakukang, manglaksig sinapsap sa kahoy samtang naglungag ug salag.” Sa unsang paagi gipanalipdan niini ang iyang kaugalingon batok sa bagaso? “Ang ilong niini natabonan ug maayo sa gamayng taptap sa pino tuskig nga mga balhibo.”
Ug komosta naman ang ulo nga gidukdok? “Aron mapugngan ang kadaot sa utok . . . , usa ka lig-ong liog, baga nga bagolbagol, ug pahumok nga sangga tali sa baga nga membrano sa gawas ug sa utok mismo ang misilbing espesyal nga tigpanalipod.”
Ang laing balalatok, ang dalag-ug-tiyan nga tigsuyop ug tagok, molungag ug naglinyang hinlong mga lungag sa panit sa kahoy, nga iyang suyopan ug tagok. Dili sama sa pulag-tiyan nga balalatok, nga adunay taas kaayo, samag-silindro nga dila nga may tumoy nga gigamit sa pagtusok ug mga insekto, ang tigsuyop ug tagok may mubo-mubong dila nga may pinong mga balhibo nga motabang sa pagtilap sa tagok.
Sa walay duhaduha ang maong talagsaong matang sa desinyo nagpaila sa usa ka Tigdesinyo, si Jehova nga Diyos. Sa kamapaubsanon kinahanglang atong ipalanog ang mga pulong ni Job: “Ako nasayod nga ikaw makahimo sa tanang butang, ug walay laraw nga dili mahimo alang kanimo.” Ug si David misulat: “Ang imong mga buhat kahibulongan, ingon sa nasayran sa akong kalag.”—Job 42:2; Salmo 139:14.
[Picture Credit Lines sa panid 31]
Leonard Lee Rue, 111/ H. Armstrong Roberts
Wala: H. Armstrong Roberts