Gikan sa Among mga Magbabasa

Rasismo Sa inyong seryal nga “Magkahiusa ba Gayod ang Tanang Rasa?” (Agosto 22, 1993), inyong gihisgotan ang ulohan sa rasanhong pagpihig. Apan nganong kamo mihunong man lang dinha? Dili ba bahin lamang kana sa tawhanong kinaiya nga magpanagana labot sa usa nga lahi? Palandonga ang mga pagpihig taliwala sa mga negosyante ug mga propesyonal, taliwala sa mga siyudadnon ug baryohanon, taliwala sa mga batan-on ug sa mga tigulang. Karong adlawa adunay kiling sa paghingapin sa rasanhong pagpihig tungod sa politika ug ubang mga katarongan.

B. G., Alemanya

Adunay ubang kaylap nga mga matang sa pagpihig, apan kasagaran kini walay gipahinabong pag-antos, inhustisya, ug pagbahinbahin nga gipahinabo sa rasanhong pagpihig. Busa kami naobligar sa paghatag ug linaing pagtagad bahin niining tukma sa panahong ulohan.​—ED.

Awit sa Langgam Natapos ko pagbasa ang artikulong “Awit sa Langgam​—Usa ba Lamang ka Ordinaryong Honi?” (Hunyo 22, 1993) Nalipay ako nga nasayod nga ang mga honi sa langgam, nga tingali gituohan sa uban nga matahom nga mga tingog lamang, sa aktuwal adunay kahulogan. Salamat sa pagpatik ug mga artikulo nga nagapadayag kanamo bahin sa kahibulongan mamugnaong mga buhat ni Jehova.

A. P. C., Brazil

Ang inyong artikulo naghisgot bahin sa usa ka Britanikong siyentipiko nga nakamatikod nga gidugang sa daghang asisihol ang pagbagting sa telepono diha sa ilang talaan sa mga awit. Ang akong asawa ug ako adunay samang kasinatian. Sa miaging tuig ang pipila ka asisihol naghimo sa ilang salag duol sa among lingkoranan sa tanaman. Busa aron dili sila makurat, mitihol kami sa samang mugbong awit sa matag panahong moduol kami sa salag. Niining tingpamulak, daghang asisihol ang nag-awit sa honi nga gitihol namo sa miaging tuig!

K. M., Alemanya

Aborsiyon Ako 14 anyos, ug ang inyong seryal nga “Aborsiyon​—Ang Pagturok ug ang Pagputi sa Kinabuhi” (Mayo 22, 1993) nakatabang kanako sa pagsabot sa dugang pa kon unsa ka hinungdanon kining isyuha karong adlawa. Gipasiugda niini nga bisag ang bata sa tiyan nagpuyo diha sa lawas sa babaye, dili lamang ang iyang lawas ang maapektohan sa aborsiyon. Ang bata sa tiyan maoy usa na ka kinabuhi sukad nga ipanamkon​—dili kay usa ka piraso lamang nga tisyu. Gibati ko nga kinahanglang idili gayod ang aborsiyon.

J. R. W., Tinipong Bansa

Bisag tin-aw nga gihukman sa Kasulatan ang buhat sa paghulog sa gisabak nga bata, ang “Pagmata!” dili politikanhon ug wala makig-anib sa bisan unsang mga grupo nga nanagsinggit aron idili ang aborsiyon. Hinunoa, ang among mga artikulo gidesinyo sa pagtabang sa mga indibiduwal sa pagpadapat sa Pulong sa Diyos diha sa ilang mga kinabuhi.​—ED.

Kabataang Nailalom sa Pagpit-os Buot kong pasalamatan kamo ug dako alang sa seryal nga mga artikulo nga “Kabataang Nailalom sa Pagpit-os​—Sa Unsang Paagi Katabangan Sila?” (Hulyo 22, 1993) Kini naghatag ug hinungdanong impormasyon sa pagtabang kanamong mga ginikanan nga makasabot kon sa unsang paagi kami, tungod sa kawalay kasinatian o kapit-os, nagapaagom ug grabeng mapait nga kasinatian sa among kabataan.

M. L. S., Italya

Ang kalibotan nahimong usa ka dapit diin bisan ang kabataan nagaantos sa kapit-os. May panahong maguol ako tungod sa mga ngalan nga itawag kanako sa akong mga ginikanan kon ako madugay sa pagbuhat sa mga butang. Kadto nakasakit pag-ayo kanako. Nakita ko sa artikulo nga ang mga ginikanan magabansay sa ilang kabataan sukad sa adlaw sa ilang pagkahimugso. Kon ugaling ako mahimong ginikanan, buot ko nga magpakitag empatiya ug mangatarongan uban sa akong mga anak.

N. K., Hapon

Ang mga artikulo nakaapektar pag-ayo kanako. Naagoman ko ang pag-abuso sa mga kamot sa akong inahan. Ang mga artikulo nakatabang kanako sa pagsabot kon nganong ako mosanong sa paagi nga akong ginapakita diha sa pipila ka situwasyon ug kon nganong kanunay akong mobatig kawalay-pulos ug kawalay pagsalig-sa-kaugalingon. Kamo nakatabang gayod kanako sa pagsalig kang Jehova. Ang kasakit sa emosyon masakit gihapon, apan nasayod ako nga siya nagsaad sa pagwagtang niining daotang mga panumdoman gikan sa kasingkasing ug hunahuna. Kini nakahatag kanako ug dakong kalipay.

E. B., Inglaterra