Ang Popular nga Bag-ong Panahon nga Kalihokan
KITA nagkinabuhi sa usa ka malisod nga panahon. Ang naandang mga prinsipyo ug mga estilo-sa-kinabuhi kanunay nga giduhaduhaan. Ang tandogonon nga panag-abyan sa relihiyon ug politika nagduso kanato sa nagsunodsunod nga mga krisis. Ang siyensiya ug teknolohiya wala magpatungha ug permanenteng mga solusyon sa mga suliran sa katawhan. Daghan ang kombinsido nga ang maong kahimtang dili masulbad gawas kon ipasulod ang usa ka bug-os nga bag-ong sistema sa kalibotan.
Apan sa unsang paagi ang maong panahon motungha? Pinaagi sa paghilabot sa Diyos? Kon mao, kinahanglan bang mopadayon kita sa pagpaabot? O kita ba sa atong kaugalingon may mahimo bahin niini? Makapatungha ba kita sa gikinahanglan pag-ayo nga bag-ong panahon? Milyonmilyong tawo sa tibuok kalibotan gikan sa tanang hut-ong sa katilingban nagtuo nga sila makabatog aktibong papel aron ipatungha ang usa ka bag-ong panahon nga adunay kalinaw ug pag-igsoonay. Sila nahisakop sa gustog-kausabang Bag-ong Panahon nga kalihokan, ug buot nilang motapo ka kanila!
Usa ka Tibuok-Yuta nga Kalihokan
Nakadungog ka na ba bahin sa Bag-ong Panahon nga kalihokan? Sa daghang nasod ang terminong “Bag-ong Panahon” libreng gipadapat nganha sa pila ka popular nga mga matang sa katitikan, musika, ug arte. Katingad-anan pa, aduna ganiy Bag-ong Panahon nga mga restawran! Ang inilang mga magdudula ug mga bantogang tawo sa Hollywood nagpasiugda sa kalihokan. Gihimo sa mga membro ang regular nga mga kombensiyon ug mga eksposisyon. Ang terminong “Bag-ong Panahon” kaylap usab nga nalangkit sa mga manggad para konsumo, sama sa mek-ap, mga produkto sa pagpaanyag, mga bitamina, ug mga produkto sa pagpahimsog. Ang mga libro bahin sa Bag-ong Panahon nga pilosopiya nahalin nga minilyon. Ang pila ka tindahan adunay separadong seksiyon alang niana. Daghan niining mga libroha adunay dakong relihiyoso nga impluwensiya sa mga magbabasa.
Sa iyang librong The Cosmic Self—A Penetrating Look at Today’s New Age Movements, ang awtor nga si Ted Peters nagtawag sa kalihokan ingong “ang katumbas sa usa ka relihiyosong bomba idrohena nga padayong nagabuto sa hapit trayenta na ka tuig karon.” Siya midugang nga “ang mga propeta sa bag-ong panahon nga kalihokan nagahimog mga kinabig; ug ang ilang mga pagtulon-an ginadawat . . . sa mga Protestante, mga Romano Katoliko, mga Hudiyo, mga ateyista, ingon man sa nagdaghang Budhista ug mga Hindu sa Amerika del Norte.”
Ang The Times sa London nagtaho nga “ang doktrina sa Bag-ong Panahon . . . kalagmitan maoy labing kusog nga nagatubong pagtuo karon sa Kasadpan. Sa dili na madugay, gibanabana kini, 25 porsiento sa mga Amerikano ang magtuo nga angay ang usa ka sukod sa pagtuo sa Bag-ong Panahon nga pilosopiya.” Ang Sweko nga magasing Fundamentum miingon nga, sa Netherlands, duolag usa ka gatos ka teologo sa regular magtigom “aron sa paghisgot kon sa unsang paagi ang Bag-ong Panahon nga panghunahuna ikapailaila nganha sa kalihokan sa simbahan ug sa wali usab sa klerigo.” Ang laing magasin nagmantala nga “ang mga nasod sa tibuok kalibotan adunay ilang nagkadaiyang mga paagi sa pagpadapat sa Bag-ong Panahon nga pilosopiya, apan ang pangdani maoy tibuok kalibotan.”
Ang mga korporasyon sa negosyo nakagastog minilyong dolyar diha sa Bag-ong Panahon nga mga konsultant ug sa pagpalista sa ilang mga empliyado sa Bag-ong Panahon nga mga programa. Ang San Francisco Chronicle nagtaho nga “ang Bag-ong Panahon nga panghunahuna nakakanap sa kinatas-ang mga kuta sa dagkong mga korporasyon sa negosyo sa Amerika.” Ang mantalaan midugang nga usa ka surbi sa 500 ka kompaniya nagpadayag nga kapin sa 50 porsiento ang nalangkit ug diyutay sa Bag-ong Panahon nga panghunahuna.
Apan unsa ba ang Bag-ong Panahon nga uso, ug sa unsang paagi mitungha kini? Tinuod bang magpatungha kinig kalinaw ug panaghiusa sa yuta? Unsa ang gitudlo niini, ug sa unsang paagi apektado ka niini?