Sa Unsang Paagi Moabot ang Tinuod nga Bag-ong Panahon?
ANG awtor sa Bag-ong Panahon nga kalihokan nga si Shirley MacLaine mipahayag sa kasagaran kaayong pagbati sa dihang misulat siya: “Kanunay akong naghunahuna bahin sa kon unsa bay nadaot sa kalibotan. Dili nimo kini kalikayan inigkakita nimo sa aktuwal sa kakabos, sa kagutmanan, sa pagdinumtanay. Nagsugod ako pagbiyahe sa ubang mga nasod sa dihang napulog-siyam pa ang akong edad, ug karon, sa mga 45 anyos nga edad, sa kawalay-pagkamadapigon ako makaingon nga nagkadaot ang kahimtang.”
Sa susama, sa bisan diin ang mga tawo gitak-an na sa relihiyosong kasalingkapaw ug kabakakan. Sila gibatig kapakyasan tungod sa pagpasagad ug sa kawalay-katakos sa mga gobyerno. Sila nalisang sa nakitang mga tinamdan ug kasaypanan sa medikal nga establisimento. Ug daghan ang nabiktima sa pagkamapihigon ug pagkapanatiko tungod sa rasa o sekso.
Usa ka Matinud-anong Solusyon?
Walay pagduhaduha bahin niini, kita nagkinahanglan gayod ug usa ka bag-ong kalibotan. Apan matinud-anon ba ang mga paglaom sa Bag-ong Panahon nga kalihokan? O ang paghulagway ba niini sa ugma-damlag mas kaamgid sa mga pelikula sa tumotomong mga estorya sa siyensiya sa Hollywood? Makataronganon ba ang pagtuo sa mga tagna nga gibase sa nalimtan nang mga tradisyon, sa karaang mga kasugiran, ug sa mga pagbanabana?
Itugot nato, daghan sa mga ideyang gisagop sa Bag-ong Panahon nga kalihokan mopausbaw tingali sa maayong panghunahuna ug panglawas sa limitadong paagi. Ang maayong pagkaon, ehersisyo, lulinghayaw, ug kabalaka sa kalikopan ngatanan maoy makataronganong mga bahin sa kinabuhi. Ang mga doktor lagmit mas magmalamposon kon mohatag silag dugang pagtagad sa emosyonal nga mga panginahanglan sa masakiton samtang magaatiman sa ulahi sa ilang mga panginahanglan sa panglawas. Apan ang tanan masakit sa madugay o madali, ug bisan ang labing mahimsog sa ngadtongadto mamatay. Dili nato bug-os mapahimuslan ang kinabuhi tungod kay ginahulga kita sa umaabot nga sakit ug kamatayon. Ang Bag-ong Panahon nga mga magtutudlo naghatag ba ug angayng solusyon niining mga sulirana?
Dugang ug dugang mga tawo ang nagmasulob-on ug may depresyon, ug ang Bag-ong Panahon nga kalihokan gamay kaayog mahimo niini. Ang International Herald Tribune sa London mipahayag: “Kon ang ika-20ng siglo nagpasulod sa Panahon sa Kabalaka, ang paggawas niini nagtan-aw sa banagbanag sa Panahon sa Tumang Kasub-anan.” Ang mantalaan midugang nga ang “unang internasyonal nga pagtuon sa dakong depresyon nagpadayag sa inanayng paggrabe sa maong sakit sa tibuok kalibotan.”
Ang Bag-ong Panahon nga kalihokan, uban sa maorag relihiyosong mga kinaiyahan niini, dili gayod makatagbaw sa espirituwal nga kahaw-ang sa modernong katilingban. Bisan sa kinamaayohang mga kahimtang ang gihunahunang espirituwal nga kahupayan nga gitanyag niini temporaryo lamang. Tinuod, ang naandan nga relihiyon, ilabina ang Kakristiyanohan, wala makapahupay sa espirituwal nga kagutmanan sa kadaghanan. Usa ka mantalaan prangkang nagsaway sa “kapakyasan sa Simbahan sa pagtinguha sa pagtabang niadtong mibating nahilain, wala-matandog, wala-mahala.” Gibatbat sa mantalaan ang modernong relihiyon ingong walay-lami, “nga nagahikaw sa indibiduwal sa bisan unsang pagbati sa direktang pakigtagbo sa Diyos.”
Ang Bibliya—Usa ka Basahong May mga Tubag
Ang Kakristiyanohan nagtimbol ug nagpalasaw sa mga kamatuoran sa Bibliya. Sa susama, daghang Bag-ong Panahon nga mga doktrina nahasupak usab sa mga pagtulon-an sa Bibliya. Pananglitan, tagda ang Bag-ong Panahon nga ideya nga ikapatungha sa mga tawo ang solusyon sa mga suliran sa yuta. Ang Bibliya tin-awng nag-ingon sa Jeremias 10:23: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” Ang laing kasulatan nag-ingon: “Ang kaluwasan iya ni Jehova.”—Salmo 3:8.
Ang Bibliya wala magtudlo nga ang mga tawo adunay dili-mamatay nga kalag nga mabuhi ingong independenteng butang, nga separado sa lawas. Sumala sa Kasulatan, ang kalag mamatay, ug ang kamatayon nagtimaan sa kataposan sa tanang hunahuna ug kalihokan. (Numeros 23:10; 35:11; Ecclesiastes 9:5, 10) Kini tin-awng nagsalikway sa Bag-ong Panahon nga ideya sa reinkarnasyon.
Dugang pa, ang pagpakigsulti sa mga patay maoy imposible. Sumala sa Bibliya, ang bisan unsang pagpakigsulti kono sa mga patay sa pagkatinuod maoy pagpakigsulti sa mga demonyo—espiritung mga kaaway sa Diyos ug sa mga tawo. Busa, ang Kasugoan sa Diyos naghimo sa pagbuhat sa espiritismo, lakip ang tanang matang sa panagna, astrolohiya, ug pagkaagianan sa daotang espiritu, nga usa ka sala nga pagasilotan sa kamatayon.—Levitico 19:31; 20:6, 27; Deuteronomio 18:10-12.
Ang Bibliya mao ang tinubdan sa matuod espirituwal nga pagpang-ayo. Kini adunay hugpong sa mga pagtulon-an nga motabang sa mga Kristohanon sa pagsabot sa ilang kaugalingon ug pag-usab sa ilang personalidad. (Roma 12:2; 2 Corinto 13:5; Efeso 4:21-24) Kini nagtudlo sa disiplina-sa-kaugalingon, kaligdong sa hunahuna, pagtahod sa kaugalingon ug sa uban.
Ang Bibliya nagpahinabo nga kita makakomunikar sa kinalabwang gahom sa uniberso, ang atong Maglalalang. (Buhat 17:24-28) Kini nagpakita nga pinaagi sa pagbaton ug pagtuo diha sa halad lukat sa iyang Anak, ang katawhan makadangat sa walay kataposang kinabuhi sa paraisong yuta. (Roma 6:23) Kini nagtaganag makapatagbawng mga tubag sa mga pangutana sama sa: Nganong gitugotan sa Diyos ang hilabihang pag-antos? Kinsa ang gamhanang mga linalang diha sa dili-makitang dominyo? Sila ba ang nakaingon sa kinadak-an sa giingong labaw-kinaiyanhong mga katingalahan?
Alang sa umaabot, ang Bibliya nagsaad sa hingpit nga panglawas ug walay-kataposang kinabuhi ug sa usa ka bag-ong kalibotan nga may kalinaw ug panaghiusa, uban sa hinlong kalikopan, dinhi mismo sa yuta. (Isaias 33:24; 2 Pedro 3:13) Sa maong bag-ong kalibotan, ang mga tawo pihong mouswag sa ilang kahibalo ug, ubos sa pagtultol sa Diyos, magbadbad sa daghang misteryo mahitungod sa lawas sa tawo, sa atong planeta, ug sa ubang bahin sa uniberso. Kining tanan pagahimoon sa gahom ni Jehova, usa ka Diyos nga nahigugma sa katawhan.
Atua Ka ba Unya Didto?
Hinuon, ang Bibliya nagtudlo usab nga kining mga panalangina mabatonan lamang niadtong magkinabuhing nahiuyon sa mga balaod sa Diyos. Kining mga balaora dili malupigon. Apan kinahanglang kini pagasugton. (Proverbio 4:18, 19; 1 Juan 5:3) Dili posible ang pagpaluyo sa dili-kasulatanhong Bag-ong Panahon nga panghunahuna ug sa samang panahon motuo sa Bibliya.—1 Corinto 3:18-20; 10:18-22; Santiago 4:4.
Busa, ang tinuod nga mga Kristohanon molikay nga malambigit sa dili-kasulatanhong panghunahuna sa Bag-ong Panahon nga kalihokan. Gikinahanglan ang maayong panghukom ug pagkamakataronganon. Kini angay nga matikdan nga ang “Bag-ong Panahon” nga ngalan kaylap nga gigamit alang sa mga butang nga dili gikan sa Bag-ong Panahon nga kalihokan ug ang maong mga butang tingali dili gayod kay dili-kasulatanhon. Kini tinuod ilabina sa mga natad sa panglawas, nutrisyon, arte, ug musika. Busa ang mga Kristohanon kinahanglang mogamit sa pag-ila ug intelihenteng panimbang samtang maneguro sa pagpahilayo gikan sa bisan unsa nga gihukmang daotan sa Bibliya. Nahiangay, ang Proverbio 14:15 maalamong nagtambag: “Si bisan kinsang walay kasinatian motuo sa matag pulong, apan ang usang maalamon magapalandong sa iyang mga lakang.”
Oo, ang Bibliya mao ang yawi sa matuod nga kalamdagan. Ang malangkobong dili pagtagad sa Kasulatan sa mga mahiligon sa Bag-ong Panahon makapatungha lamang ug labawng kangitngitan sa kalibotan. Apan ang Bibliya nagtagana sa espirituwal nga kahayag ug sa paglaom sa usa ka bag-ong kalibotan sumala sa gisaad sa Diyos: “‘Tan-awa! Ang tolda sa Diyos anaa uban sa katawhan, ug siya mopuyo uban kanila, ug sila mahimong iyang mga katawhan. Ug ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.’ Ug ang Usa nga naglingkod sa trono miingon: ‘Tan-awa! Ginabag-o ko ang tanang butang.’ Usab, siya nagaingon: ‘Isulat, tungod kay kining mga pulonga kasaligan ug matuod.’”—Pinadayag 21:3-5.