Gikan sa Among mga Magbabasa
Bag-ong Panahon Daghang salamat kaninyo alang sa serye bahin sa Bag-ong Panahon nga kalihokan. (Marso 8, 1994) Kaniadto gisusi ko ang mga impormasyon bahin sa mga UFO, sa mga linalang nga dili taga-yuta, ug reinkarnasyon. Akong gitun-an ang mga kurso bahin sa Yoga ug pagpamalandong ug nakadawat ug terapiya nga naglangkit sa hipnotismo. Wala magdugay naagoman ko ang grabeng mga suliran sa espirituwal, mental, emosyonal, ug pisikal ug gani nailalom pa ako sa gahom sa mga demonyo. Ang gipangandoy ko nga Utopia daw dugang nga nagkalayo. Sa milabay ang lima ka tuig ug tunga, ako karon nag-alagad kang Jehova ug nakabatog kagawasan gikan sa kangitngit sa Bag-ong Panahon nga kalihokan.
E. D., Netherlands
Una pa nahimong Kristohanon, nalangkit ako sa panghunahuna ug paagi sa pagkinabuhi sa Bag-ong Panahon. Dili pa dugay ang akong manghod nga babaye nagpahayag ug tinguha sa pakig-uban sa usa ka grupo sa mga sumusunod sa Bag-ong Panahon. Busa akong gipakita kining artikuloha kaniya. Gikuyawan siya sa dayag nga kalangkitan sa Bag-ong Panahon sa mistisismo ug sa okulto. Karon determinado siya sa pagsalikway sa panghunahuna sa Bag-ong Panahon.
L. S., Inglaterra
Maayo ang pagkasugod sa inyong artikulo. Apan, kalit lang kamo miingon nga “dili iya sa yutan-ong tawo ang iyang dalan.” Sa kataposan, kamo nag-ingon nga ang mga pagtuo sa Bag-ong Panahon mohatag lamang ug dugang kangiob. Ang buot ba ninyong ipasabot nga angay natong isalikway ang tanang mithianong mga panglantaw ug maglaom na lamang nga masulbad ra ang tanan? Ngano man nga nakahinapos kamo nga dili iya sa tawo ang pagsulay sa paghimog mas maayong kalibotan alang kaniya?
A. L., Tinipong Bansa
Ang Bibliya—dili ang “Pagmata!”—ang nag-ingon nga “dili iya sa yutan-ong tawo ang iyang dalan.” (Jeremias 10:23) Busa kawang ang mga paningkamot sa tawo sa pagpatunghag Bag-ong Panahon. Bisan pa, ang matuod nga mga Kristohanon dili kay wala magpakabana sa mga suliran karong adlawa. Pinaagi sa pagtudlo sa uban sa mga prinsipyo sa Pulong sa Diyos, ang mga Saksi ni Jehova nakatabang sa minilyon nga ‘makabaton ug kaayohan sa ilang kaugalingon’—sa ekonomikanhon, sa pisikal, ug sa espirituwal. (Isaias 48:17; Mateo 28:19, 20) Sa samang panahon, among ginapasiugda ngadto sa uban ang tinuod nga paglaom sa umaabot nga “bag-ong mga langit ug usa ka bag-ong yuta”—usa ka butang nga ang Diyos, dili ang tawo, ang magapatungha. (2 Pedro 3:13)—ED.
Dobleng Kinabuhi Ang inyong mga artikulo bahin sa pagkinabuhi ug dobleng kinabuhi (Disyembre 22, 1993, ug Enero 8 ug 22, 1994) nakapukaw sa among 17-anyos nga anak nga lalaki sa pagtug-an sa usa ka sala diin nalangkit siya kapin sa upat ka tuig. Sa panggawas nga panagway, daw siya may maayong pag-uswag sa espirituwal. Nakuratan gayod kami ug dili makatuo niining salaa, apan nakaarang kami sa pagsanong sa mahigugmaon ug mapinasayloong paagi tungod sa inyong mga artikulo.
J. P., Tinipong Bansa
Mihunong ako sa pagpakig-uban sa Kristohanong kongregasyon kapin sa usa ka tuig. Apan kadtong mga artikuloha makapadasig gayod ug puno sa gugma. Sama sa inyong giingon, ang unang lakang mao ang pagduol kang Jehova sa pag-ampo. Lisod kaayo kini, apan nakahatag kini kanako ug dagkong mga panalangin.
M. G., Pransiya
Mga Batan-on Midumili sa mga Pag-abunog Dugo Ako 12 anyos, ug bag-o lang nako nabasa ang seryal nga “Mga Batan-ong Nag-una sa Diyos.” (Mayo 22, 1994) Nakadayeg gayod ako sa kaisog nga gipakita niining batan-ong Kristohanong mga igsoong lalaki ug babaye, nga nag-atubang sa kamatayon nga may pagsalig kang Jehova ug sa pagkabanhaw. Ang ilang kaisog ug pagtuo kang Jehova nakapahilak kanako sa kalipay.
B. C. R., Espanya
Nakadawat kami ug daghang susamang mga pahayag sa apresasyon. Hinuon, usa ka butang ang kinahanglang itul-id. Among gitaho nga si Ernestine Gregory wala abunohig dugo. Ang resulta mao nga mga minuto human gihatag ang mando sa korte, usa ka pag-abuno ang gipugos kaniya. Siya nakalabang-buhi niining malisod nga kahimtang.—ED.