Gikan sa Among mga Magbabasa
Dinagmalang mga Bana? Natugaw ako nga inyong gipatik ang tahong “Dinagmalang mga Bana” diha sa “Pagpaniid sa Kalibotan.” (Hulyo 22, 1993) Ang “pag-abuso” nga naglakip sa binaba nga panghulga lamang, dili susama sa “pagdagmal,” nga maoy kriminal nga kapintasan. Bahin sa mas labaw nga gidaghanon sa mga babaye kay sa mga lalaki nga miangkon nga nang-abuso, ang mga pagtuon nagpakita nga ang mga babaye mas matinud-anon bahin sa pag-angkon sa maong mga butang kay sa mga lalaki nga tig-abuso, kinsa kiling sa paglimod sa ilang mga buhat.
K. K., Tinipong Bansa
Giapresyar namo kini nga mga hunahuna. Ang taho nga gikuwestiyon gireport diha sa usa ka pagtuon nga 40 porsiento sa mga babaye ang miangkon nga nang-abuso sa ilang mga bana, kontra sa 26 porsiento sa mga bana kinsa miangkon nga nang-abuso sa mga asawa. Ingon sa gidawat sa among taho, hinunoa, ang pagtuon migamit ug usa ka halapad nga kahulogan sa “pag-abuso” ug wala maglimite niini ngadto sa pisikal nga pangdagmal. Ang ulohan sa among artikulo sa ingon daw makalibog. Bahin sa kon unsang matanga sa pangdagmal ang labing kaylap, ang among isyu sa Pebrero 8, 1993, nagtaho gikan sa “Parents” nga magasin: “Kapin sa 95 porsiento sa gikatahong mga kaso sa [grabeng] pag-abuso sa kapikas naglangkit sa usa ka lalaki nga nangdagmal sa usa ka babaye.”—ED.
Igsisimhot Ako kanunayng naghunahuna nga kon pananglit ako mawad-ag usa sa akong mga igbalati, pilion ko nga mawala ang akong igsisimhot. Apan human nga mabasa ang inyong artikulong “Ang Atong Mapuslanong Igsisimhot” (Hulyo 22, 1993), giusab ko ang akong hunahuna. Ang inyong mga artikulo bahin sa atong kahibulongan tawhanong lawas kanunayng nagtabang kanako sa pagpalalom pa sa akong gugma kang Jehova.
D. H., Trinidad
Antiyohos Salamat sa pagpatik sa artikulong “Paglantaw sa Antiyohos.” (Hulyo 8, 1993) Kini naundan ug maayong tambag. Sa wala pa basaha ang artikulo, ako may dili maayong kinaiya nga ibutang ang akong mga antiyohos nga magdapat ang mga lente. Daghan kini ug garas. Gisulayan ko ang contact lenses, apan malipong ako niini. Busa kay walay kapilian kondili ang pagsul-ob ug antiyohos, ipadapat ko ang inyong tambag!
T. C., Italya
Mga Bato sa Rinyon Ako nagsulat aron pasalamatan kamo sa inyong tukma sa panahong artikulong “Mga Bato sa Rinyon—Pagtambal sa Usa ka Karaang Sakit.” (Agosto 22, 1993) Human madawat dayon ang akong kopya diha sa koreyo, ako naeksamin nga adunay mga bato sa rinyon. Salamat sa inyong artikulo, mas nasabtan na nako ang akong balatian ug sa pag-andam alang sa akong operasyon.
V. T., Tinipong Bansa
Rasismo Usa ka mubong sulat sa pag-ingon nga salamat kaninyo alang niadtong seryal sa mga artikulong “Magkahiusa ba Gayod ang Tanang Rasa?” (Agosto 22, 1993) Nagtuo ako nga inyong gihisgotan kining sensitibong ulohan diha sa usa ka ekselenteng paagi. Kadto gisulat nga mataktikanhon, bisan pa wala kamoy gihatag kang bisan kinsa, wala gayod, ug bisan unsang katarongan alang sa mahakogong pagbaton ug mangil-ad nga sakit sa rasismo.
D. G., Tinipong Bansa
Pari Kaniadto Salamat sa pagpatik sa kasinatian ni Alinio de Santa Rita Lobo, “Kon Nganong Mibiya Ako sa Pagkapari Alang sa Mas Maayong Ministeryo.” (Septiyembre 8, 1993) Ang sugilanon maoy usa ka kaplag—ug sa usa pa ka tawo nga nakatapos ug daghang kurso sa hataas nga edukasyon. Diha sa atong ministeryo ingong mga Saksi ni Jehova, kita sagad magtukod diha sa mga estudyante sa Bibliya ug pagsabot sa kamatuoran, nga tinagsa-tagsa. Apan niining bahina may tawo nga mibuhat sa bali—gikuha ang bakak nga mga pagtulon-an, nga tinagsa-tagsa, gilain ang kamatuoran gikan sa gipasukad-sa-simbahang mga tradisyon. Kadto makapalig-on kaayo sa pagtuo.
B. C., Tinipong Bansa
Paglalin Daghang salamat sa artikulong “Mga Batan-on Nangutana . . . Angay ba Akong Mobalhin Ngadto sa Mas Mauswagong Nasod?” (Abril 22, 1993) Kanunay kong gihunahuna nga aron moasenso, kinahanglan nga molalin. Karon nahibaloan ko na nga kini usa ka seryoso kaayong desisyon ug nga daghang butang ang angayng tagdon. Ang maong artikulo nagtudlo usab kanako nga ilhon ang tinuod ko nga mga panginahanglan ug nga ang mga butang nga ato gayong gikinahanglan aron magmalipayon makaplagan diha sa bisan haing nasod.
M. R., Republika sa Dominika