Unsay Anaa sa Kabituonan Alang Kanimo?
SINULAT SA KORESPONSAL SA PAGMATA! SA BRAZIL
“NAKADUNGOG ka ba sa mga panagna sumala sa astrolohiya, nga sa sunod Hulyo ang planetang Yuta mabangga sa Mars?” Kining maong mga pulong sa pinalubaylubay nga awit ni Cole Porter nagapahayag ug maayo sa sagad ug karaang pagtuo nga ang kaugmaon sa tawo sa usa ka paagi nalangkit sa mga bituon.a Apan aduna bay tinuod nga relasyon tali sa mga butang sa wanang ug sa kinabuhi sa tawo ibabaw niining yutaa? Kon tinuod, sa unsang paagi apektado ang katawhan? Kon dili, unsa ba gayoy katuyoan sa mga bituon?
Dili ikatingala nga daghan kaayong tawo ang interesado sa umaabot sa dihang atong tagdon ang bag-ohay pang dagkong mga panghitabo—ang pagkahugno sa Paril sa Berlin ug ang tulin nga pagkabungkag sa kanhing Unyon Sobyet, ang kawalay pagsalig sa politikal nga mga pangulo, ang etnikong pagdumot nga mibangon sa Aprika ug Uropa, ang relihiyosong panag-away sa India ug Irlandia, ang kusog nga pagtaas sa implasyon nga naghampak sa daghang nasod, ug ang pag-alsa sa kabataan. Sumala sa usa ka taho gikan sa Unibersidad sa Hamburg, ang 1992 maoy labing magubatong tuig sukad human sa Gubat sa Kalibotan II, uban sa 52 ka armadong mga away sa lainlaing nasod. Ang mahigugmaon-sa-kalinaw nga mga tawo kinaiyanhon lamang nga mangutana: ‘Asa man kita makakaplag ug kalig-on, kalinaw, ug seguridad?’
Ang kawalay-piho sa umaabot miagak sa kalit nga pagkapopular sa pagpanagna sa lainlaing porma niini. Lagmit ang labing ilado maoy astrolohiya. Lahi sa siyensiya sa astronomiya, ang astrolohiya maoy “pagpanagna sa gikatuohang mga impluwensiya sa mga bituon ug mga planeta diha sa tawhanong mga kalihokan ug mga panghitabo sa yuta pinaagi sa ilang mga nahimutangan ug mga kinaiyahan.” Karon, minilyong tawo ang dili gayod makalikay sa pagbasa sa ilang horoskopyo alang sa mga timailhan labot sa ilang kaugmaon.b
Laing mga natad diin ang mga astrologo nangangkong makatagna sa umaabot naglakip sa dangatan sa mga kalisdanan sa kaminyoon ug mga suliran sa panglawas, ang pagsaka ug pagkahulog sa politikal nga mga pangulo, ang kinamaayohang petsa sa pagbukas ug bag-ong negosyo, ug mga numero nga makadaog sa loteriya.
Usa ka mensahe sa Reuters nagtaho nga ang astrologong si Joan Quigley sa regular gikonsulta ni Nancy Reagan kon kanus-a ang iyang bana, ang presidente kaniadto sa Tinipong Bansa, angayng mohatag sa iyang mga pakigpulong ug kon kanus-a ang iyang ayroplano angayng molupad ug motugpa. Gibutyag sa New Catholic Encyclopedia nga “gigamit ni Papa Julio II [1503-13] ang astrolohiya sa pagtino sa adlaw sa pagpurongpurong kaniya ug ni Paulo III [1534-49] sa pagtino sa hustong oras alang sa matag Konsilyo.” Si Alfred Hug, direktor sa usa ka Swiso nga kompaniya sa negosyo nga nagagamit sa astrolohiya sa pagtambag sa mga tigpamuhonan sa baligyaanan sa puhonan, migarantiya sa maayong mga resulta. “Nahasulat kini sa mga bituon,” pasalig niya.
Dayag, daghan ang mibati nga ang mga bituon nagaimpluwensiya gayod sa mga kinabuhi sa tawo. Sa unsang paagi nagsugod ang astrolohiya? Ang karaang basahon ba ang Bibliya adunay ikasulti labot sa astrolohiya ug sa mga astrologo?
[Mga footnote]
a “Sa karaang Tsina, . . . ang mga ilhanan sa langit ingon man sa kinaiyanhong mga katalagman gituohan nga nagsumbalik sa maayo ug daotang mga buhat sa Emperador ug sa iyang kagamhanan.”—The International Encyclopedia of Astronomy.
b Ang horoskopyo maoy “usa ka laraw sa relatibong mga posisyon sa mga planeta ug mga timaan sa zodiac sa usa ka espisipikong panahon (ingon sa adlawng natawhan sa usa)” ug gigamit sa mga astrologo sa paningkamot nga matagna ang mga panghitabo sa umaabot diha sa kinabuhi sa usa ka tawo.