Diin ang mga Ginikanan ug Kabataan Dungang Nagapamati ug Nagakat-on
SINULAT SA KOREPONSAL SA PAGMATA! SA HAPON
“INGONG usa ka kompaniya sa panghinlo, kami angayng maulaw sa among kaugalingon, apan maorag mas hinlo kon kamo [ang manghinlo].” Ang tawo nga nagdumala sa kompaniya sa panghinlo sa Fukuoka Dome Stadium, sa Hapon, miingon niining miaging ting-init labot sa pagpangandam nga gibuhat sa mga Saksi ni Jehova alang sa ilang “Diyosnong Pagtulon-an” Distritong Kombensiyon. Siya nalangkit usab sa Tokyo Dome Stadium sa miaging tuig sa dihang gihimo didto ang “Mga Tigdala sa Kahayag” Distritong Kombensiyon sa mga Saksi ni Jehova, ug siya nakadayeg pag-ayo. Sa natapos ang mga kombensiyon, ang estadyum mas hinlo kay sa wala pa kini abangi. Siya dugang miingon: “Ang panggawi sa kabataan dalayegon kaayo. Ang ikasulti ko lang: ‘Pagkatalagsaon gayod!’”
Sa miaging tuig, ang “Diyosnong Pagtulon-an” Distritong Kombensiyon gihimo usab sa Siyudad sa Takamatsu. Usa ka tawong hamtong kinsa naniid sa mga delegado sa kombensiyon nangutana kanila, “Kamo ba mga Kristohanon?” ug unya mipadayon: “Diha moy kombensiyon usab sa miaging tuig, di ba? Diin man ang inyong kabataan panahon sa kombensiyon?” Sa dihang ang mga delegado mitubag: “Sila namati sa mga pakigpulong ug nagbukas sa kaugalingon nilang mga Bibliya uban sa ilang mga ginikanan,” ang tawo miingon: “Maayo! Nakita ko kamo matag ting-init ug kanunay akong makadayeg nga ang inyong mga anak maayog batasan.” Unya siya mipadayon sa pag-ingon nga bisan daghan siyag nadunggan bahin sa kakulang ug komunikasyon tali sa mga ginikanan ug mga anak, iyang makita gikan sa panggawi sa kabataan sa mga Saksi ni Jehova nga ang relasyon sa ginikanan-ug-anak taliwala kanila maayo kaayo.
Usa ka magtutudlo sa tunghaang elementarya, kinsa mitambong sa usa ka distritong kombensiyon sa mga Saksi ni Jehova nga gihimo sa Makuhari Messe sa miaging tuig, natingala sa pagkakita sa tinamdan sa kabataan diha sa dapit sa kombensiyon. Diha sa tunghaan, diin ang pagkakat-on angayng mouswag pinaagi sa pagpamati sa mga estudyante sa uban nga nagasulti, gibati niya nga ang mga bata dili andam sa pagpamati. Apan, lahi ang iyang nakita sa kombensiyon. “Ang kabataan namati pag-ayo sa hataas nga mga yugto sa panahon. Ug dugang pa, sila nagkupot pag-ayo sa ilang mga lapis diha sa ilang mga kamot ug nagkuhag mga nota, nagsulat nga husto sa mga letra bisag nagasulat diha lang sa ilang mga paa. Ang kabataang Saksi lahi gikan sa ubang kabataan, bisan diha sa tunghaan, sa ilang paagi sa pagpanulti ug pagpamati ug sa ilang pamiste ug pamustora.” Unya siya midugang: “Ako nagtuo nga tungod kini sa ilang adlaw-adlaw nga pagbansay, pagdayeg nila kang Jehova, ug ang hiusang paningkamot sa ilang mga pamilya alang sa usa ka katuyoan.”
Sama sa pagsunod sa mga Israelinhon sa sugo sa Diyos nga nag-ingon: “Tigoma ang katawhan, ang mga lalaki ug ang mga babaye ug ang mga bata . . . , aron nga sila mamati ug aron nga sila makakat-on,” ang mga Saksi ni Jehova karong adlawa, tigulang ug batan-on, mga lalaki ug mga babaye, duyog nga nagakatigom ug nagadawat sa samang pagtulon-an. Ang kasulatan sa itaas nagpadayon, nga naghatag ug katarongan: “Aron nga sila mahadlok kang Jehova nga inyong Diyos ug magbantay sa pagtuman sa tanang pulong niini nga kasugoan.”—Deuteronomio 31:12.