Tabangi ang mga Batan-on sa Pagbenepisyo Gikan sa Kombensiyon
1 Ang pagdapit ngadto sa “Diyosnong Debosyon” Distritong Kombensiyon gipaabot sa kada magsisimba ni Jehova, apil ang mga batan-on. Oo, bisan “ang mga bata” gidahom sa pagtambong.—Deut. 31:12.
2 Kinahanglang tudloan sa mga ginikanan ang ilang mga anak nga ang kombensiyon maoy alang kanila usab ug ang pagpatalinghog sa programa maoy bahin sa ilang pagsimba. Dili kanunay sayon alang sa mga batan-on sa paglingkod nga hilom ug sa pagpaminaw sa panahon sa mga sesyon. Usab, ang pipila sa mga pakigpulong basin malisod alang kanila sa pagsabot. Busa ang kanunay nga pagtagad ug panlimbasog sa bahin sa mga ginikanan hinungdanon.
3 Makapalig-on sa pagpaniid sa interes nga gipakita sa mga batan-on nga nagatambong ug kombensiyon. Bisan tuod ang pipila ka kasibot mapatungha tungod sa oportunidad sa pagbiyahe, sa kadasig sa panon sa mga tawo, ug uban pa, bisan ang mga bata pa gayod mabuligan man sa pagpabili sa kombensiyon ug sa espirituwal nga paagi makakuhag kaayohan.
KON SA UNSANG PAAGI MAKATABANG ANG MGA GINIKANAN
4 Sa dili pa motambong sa kombensiyon, nganong dili molingkod uban sa inyong mga anak ug sublion ang impormasyon diha sa librong Insight ubos sa ulohang “Godly Devotion”? Kini makaabag sa tanan diha sa pamilya sa pagbenepisyo gikan sa programa sa kombensiyon.
5 Daghang ginikanan nagsangkap sa ilang mga anak uban sa ilang kaugalingong Bibliya, songbok ug ubang basahon. Palig-ona ang mga bata nga maghimog mga nota, ug dayon repasohon kini uban sa tanan sa pamilya sa pagkagabii. Mas maayo nga dili magdala ug mga dulaan o ‘coloring books’ ngadto sa kombensiyon.
TAGDA ANG DISIPLINA UG PAMOSTURA
6 Ang pipila ka ginikanan nagtugot sa ilang mga anak sa pagdisturbo sa uban sa panahon sa programa. Bisan sa panahon sa mga pag-ampo, ang pipila sa mga kabataan nagadula ug nagapabalda sa uban. Pangutan-ang kaugalingon: ‘Unsa man ang ginabuhat sa akong mga anak sa panahon sa mga pag-ampo? Tugotan ba sila nga mobiya sa ilang lingkoranan sa panahon sa programa?’ Bisan kon ang mga ginikanan aduna ing mga asaynment sa kombensiyon, sila gayod manlimbasog sa paglingkod kauban sa ilang mga anak sa panahon sa mga sesyon aron makadumala kanila. Ang mga bata nagakinahanglan ug pagdumala sa ilang mga ginikanan usab sa mga yugto sa lulinghayaw sa dihang sila wala sa dapit asembliyahan.
7 Unsa man ang panapot sa atong mga batan-on alang sa mga kombensiyon? Kon magsuot silag kasuwal nga mga senina ug mga sapatos nga igdudula, kini ba motabang kanila sa pagkasabot sa kabililhon sa maong okasyon? Sa laing bahin, ang mga bata nga nagasenina nga tukma para sa Kristohanong mga tigom magsumbaliksilaw sa kahalangdon sa okasyon.
8 Ang usa ka hapsay nga kahimtang sa hunahuna ikadasig man pinaagig paghikay alang sa mga bata nga adunay pagabuhaton human sa mga sesyon. Ang mga bata nga ubos sa 16 ang edad makatrabaho man uban sa ginikanan ubos sa pagtultol sa ‘Volunteer Service Department.’
9 Lagmit pinaagig pagbanaag niining mga sugyota, ang mga ginikanan maingon man sa uban mahimong magmaalisto sa pagtabang sa mga batan-on nga makakuhag mas dakong kaayohan gikan sa kombensiyon.