Pagbutang sa Edukasyon sa Dapit Niini

ANG usa ka batid nga tigdibuho nahibalo kon unsaon pagdibuho nga samag tinuod nga tan-awon. Ang mga detalye sa atubangan ang hatagan ug dakong pagtagad kay sa nianang sa tunga o sa likod. Susama kini sa atong mga priyoridad sa kinabuhi. Ang pipila niini nagkinahanglan ug mas dakong pagtagad kay sa uban.

Si Jesu-Kristo miingon: “Malipayon kadtong mahunahunaon sa ilang espirituwal nga panginahanglan, sanglit ilaha ang gingharian sa mga langit.” (Mateo 5:3) Busa, ang espirituwal nga mga panginahanglan ang tagdon nga labing hinungdanon. Sa kasukwahi, ang materyal nga mga bahandi angayng ikaduha lamang.

Unsa ka hinungdanon ang edukasyon may kalabotan sa ubang mga butang sa kinabuhi? Dayag nga kini hinungdanon alang sa usa ka Kristohanon. Ang igong gidak-on sa sekular nga edukasyon kasagarang gikinahanglan aron sa pagtuman sa Kasulatanhong obligasyon nga gihatag ni apostol Pablo: “Kon si bisan kinsa wala magatagana alang kanila nga iyang kaugalingon, ug ilabina alang kanila nga mga membro sa iyang panimalay, siya nagalimod sa pagtuo ug mas daotan pa kay sa tawong walay pagtuo.” (1 Timoteo 5:8) Dugang pa, ang sugo ni Jesus nga gihatag sa iyang mga sumusunod, sa paghimog mga tinun-an, “nga magatudlo kanila sa pagsunod sa tanang butang nga [iyang] gisugo,” nagkinahanglan nga ang usa ‘magkuhag kahibalo’ ug unya epektibong magtudlo sa uban.​—Mateo 28:19, 20; Juan 17:3; Buhat 17:11; 1 Timoteo 4:13.

Bisan pa, ang edukasyon kinahanglang ibutang sa dapit niini. Kini dili gayod pangagpason aron lamang manghawod sa eskuylahan o makabatog madanihong mga kurso. Ang paghatag sa edukasyon ug wala kinahanglanang pagpabili makapahigawad. Tinuod, kini motaganag pipila ka temporaryong materyal nga mga kaayohan. Apan sama sa giingon sa maalamong Haring Solomon: “Ikaw nagkugi alang sa usa ka butang uban sa tanan mong kaalam, kahibalo, ug kabatid, ug unya imong igabilin kining tanan ngadto sa usa ka tawo kinsa wala maghago alang niana.”​—Ecclesiastes 2:21, Today’s English Version.

Ang mga Saksi ni Jehova interesado gayod sa edukasyon, dili lamang aron makabatog edukasyon, kondili aron sila makahimog dako diha sa pag-alagad sa Diyos ug sa pagsuportar sa ilang kaugalingon. Sanglit ang ilang ministeryo maoy usa ka buluhaton nga walay makuhang ganansiya, daghan ang nagadepende sa sekular nga trabaho aron makabaton ug panginabuhian. Kini ilabinang malisod alang sa bug-os panahong mga ministro sa mga Saksi ni Jehova, nga gitawag mga payunir. Sila kinahanglang maghupot ug maayong eskedyul diha sa ministeryo samtang naningkamot nga katagan-an ug pinansiyal ang ilang kaugalingon ug ang ilang mga panimalay kon minyo.a​—Proverbio 10:4.

Human matimbangtimbang ang nagkalainlaing mga butang nga nalangkit, ang pipila sa mga Saksi ni Jehova mipili sa pagkuhag dugang edukasyon. Siyempre, sila kinahanglang mag-amping aron padayong ikabutang ang edukasyon sa dapit niini. Unsay nakatabang kanila sa pagbuhat niini? “Daghang butang ang nakatabang kanako,” matud sa usa ka bayong nga taga-Brazil nga ginganlag John. Bisan pa kon kinahanglang magtuon ako sa gabii, ako dili gayod mopalta sa Kristohanong mga tigom. Gipatin-aw usab nakog maayo ngadto sa akong mga klasmet sukad pa sa sinugdan nga ako usa sa mga Saksi ni Jehova.”

Gipahimuslan ni Eric, nga taga-Brazil usab, ang mga higayon sa pagpakigsulti ngadto sa uban bahin sa iyang mga pagtuo samtang nagkuhag dugang edukasyon. “Gilantaw ko ang tunghaan nga akong linaing teritoryo,” matud niya. “Nakahimo ako sa pagdumala ug mga pagtuon sa Bibliya uban sa daghang magtutudlo ug mga estudyante, nga ang lima karon bawtismado na, duha kanila nag-alagad ingong mga ansiano.”

Si Richard mibalik sa pagtungha nga dili-bug-os-panahon aron makabatog kurso sa pagdibuho. “Ang akong pagtungha nakatabang kanako sa pagkakitag trabaho sa pagsuportar kanako ug sa akong asawa,” siya miingon, “apan kini naghatag usab ug kahigayonan. Samtang ako nagabiyahe ngadto sa dali nga pagpanukod nga mga proyekto sa pagtukod sa Kingdom Hall ug nakigsulti niadtong mga nagadumala, nahibaloan ko nga nagkinahanglan silag magdidibuho.b Ang akong edukasyon napuslan na karon sa maayong paagi niini nga mga proyekto. Dugang pa, ang akong asawa ug ako naglaom nga sa ngadtongadto makaalagad sa punoang mga buhatan sa kalibotan o diha sa internasyonal nga mga proyekto sa pagpanukod sa mga Saksi ni Jehova.”

Sa samang panahon, daghang Saksi ni Jehova ang nakahimo sa pag-atubang sa hagit sa pagtagana alang sa ilang kaugalingon ug sa ilang mga pamilya nga walay dugang edukasyon. “Gisuportahan ko ang akong kaugalingon pinaagi sa pagtrabaho sa mga buluhaton sa balay duha ka adlaw sa usa ka semana,” miingon si Mary. “Sa balit-ad, dako akog kita por ora kay sa pipila nga nagpaempliyo kanako. Apan gilantaw ko ang akong trabaho ingong usa ka paagi nga makabatog panginabuhian. Kini nakahimo kanako sa pagpadayon diha sa payunir nga buluhaton, ug ako walay mga pagbasol.”

Susama ang gibati ni Steve. “Sa dihang nagsugod ako sa pagpayunir,” matud niya, “ang pipila miingon kanako: ‘Unsay imong buhaton kon ikaw magminyo ug makabatog pamilya? Makahimo ka ba sa pagpangitag igong salapi nga panginabuhian?’ Ingong resulta, nakatrabaho ako ug daghang nagkalainlaing matang sa trabaho nga ako nakakuhag kahanas halos sa tanang butang nga imong mahanduraw. Karon nga ako aduna nay asawa nga sustentohan, nakita ko nga ako dako pag kita kay sa ubang mga graduwado sa kolehiyo nga nagatrabaho diha sa ahensiya nga akong gitrabahoan.”

Tingalig gusto sa dili magtutuong mga amahan nga ang menor de edad nga kabataan mokuhag dugang edukasyon, ug sila may Kasulatanhong awtoridad nga buhaton kini. Ugaling, sa maong mga kahimtang, ug uyon sa Mateo 6:33, ang mga batan-on mahimong mokuhag mga kurso nga makatabang kanila nga mahimong mas mapuslanon diha sa pag-alagad kang Jehova o gani magtugot kanila sa pagpakigbahin sa bug-os-panahong ministeryo samtang nagtungha.

Ang Kinadak-ang Edukasyon

Ang tanang Saksi ni Jehova, bisag unsa pay ilang edukasyonal nga kahimtang, adunay butang nga gikausahan. Gidawat nila nga ang labing hinungdanong edukasyon nga mabatonan karong adlawa nagagikan sa Pulong sa Diyos, ang Bibliya. Ang Juan 17:3 nag-ingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” Bisag unsa pang matanga sa sekular nga edukasyon ang nabatonan sa usa ka Kristohanon, ang pagkuhag kahibalo bahin kang Jehova ug sa iyang Anak, si Jesus, kinahanglang mao ang hatagag pangunang pagtagad.

Kini nga sumbanan gihatag sa unang-siglong mga Kristohanon. Si Manaen “naedukar uban ni Herodes nga magmamando sa distrito,” bisan pa siya presente ug aktibo taliwala sa mga manalagna ug mga magtutudlo sa kongregasyon sa Antioquia. (Buhat 13:1) Sa susama, si Pablo nakadawat sa ikatandi karon nga edukasyon sa unibersidad. Bisan pa, human mahimong usa ka Kristohanon, iyang gibutang ang iyang pagbansay diha sa dapit niini. Imbes gamiton kana aron magpadayeg sa uban, iyang gigamit ang iyang kahibalo sa sosyolohiya, balaod, ug kasaysayan sa pagwali sa mga tawo sa tanang matang.​—Buhat 16:37-40; 22:3; 25:11, 12; 1 Corinto 9:19-23; Filipos 1:7.

Ang unang-siglong mga Kristohanon wala mailhi ilabina tungod sa ilang edukasyonal nga kahimtang. Daghan ang “dili-edukado ug ordinaryo,” nga wala mabansay diha sa rabinikong mga tunghaan. Apan kini wala magpasabot nga sila dili-edukado. Sa kasukwahi, kini nga mga lalaki ug mga babaye nasangkapan sa pagdepensa sa ilang pagtuo​—usa ka katakos nga naghatag ug pamatuod sa kahibalo nga malig-on ug pundasyon.​—Buhat 4:13.

Busa, ang tanang Kristohanon interesado gayod sa edukasyon. Sa samang panahon, sila naningkamot nga “matino ang mas hinungdanong mga butang,” nga nagabutang sa edukasyon​—ug sa bisan unsang ubang paningkamot​—diha sa hustong dapit niini.​—Filipos 1:9, 10.

[Mga footnote]

[Kahon sa panid 7]

Usa ka Takos nga Rekomendasyon

Usa ka tuig una pa sa iyang graduwasyon sa hayskul, gipalandong pag-ayo ni Matthew ang bahin sa kon unsaon niya pagsuportar ang iyang kaugalingon samtang magpadayon sa karera ingong usa ka bug-os-panahong ministro sa mga Saksi ni Jehova. Human sa mainampoong pagpalandong sa maong butang, gibati ni Matthew ug sa iyang mga ginikanan nga ang dugang edukasyon mapuslanon aron maabot ang iyang tumong. Busa, siya miaplay sa pagkahimong eskolar. Ang magtatambag ni Matthew sa eskuylahan midugang ug sulat sa rekomendasyon, nga nag-ingon:

“Sulod sa miaging duha-ug-tunga ka tuig, nalipay akong nahimong magtatambag ug higala ni Matt. Si Matt may maayog pundasyon nga indibiduwal . . . Siya may halalom ug hugot nga pagtuo, nga makita diha sa iyang mga relasyon ug mga lihok.

“Sa nangaging katuigan, si Matthew nagbansay alang sa ministeryo. Ang usa ka ministro sa iyang relihiyon walay madawat nga suweldo. Kini sa pagkatinuod maoy usa ka buhat sa gugma. Usa ka dili-hakogan nga batan-on, si Matt mahunahunaon ug matinagdanon. Kining pagkahimong eskolar makataganag mga paagi sa pagsuportar alang niining tawo sa pagtuo aron mapadayon ang iyang pagbansay ug boluntaryong buluhaton.

“Bahin sa boluntaryong buluhaton ug pag-alagad sa katilingban, si Matt nakagugol nag daghang oras sa pagsangyaw sa mga hinapos sa semana ug human sa klase ug panahon sa mga bakasyon sa ting-init. Siya nagtrabaho uban sa komunidad ug uban sa daghang nagkalainlaing matang sa mga tawo. Gipakita ni Matt ang iyang mga katakos sa pagpanguna ug mga kahanas sa pagdumalag mga pagtuon sa Bibliya uban sa mga batan-on ug mga tigulang. . . . Nakahatag siya ug pagdasig sa mga tawo ug nagatabang kanila nga makab-ot ang ilang tinuod nga natagong katakos. Diha sa klase, ang mga magtutudlo mikomento nga siya maoy usa ka maayong impluwensiya kanunay. Siya nagapanguna sa mga diskusyon sa klase ug usa ka maayong debatedor. . . .

“Si Matt maoy usa sa labing maayong batan-ong mga lalaki nga ako nalipay sa pagtambag. Gikaangayan ug tinahod siya sa iyang mga higala ug mga magtutudlo. Ang iyang integridad maoy sa kinatas-ang kalibre.”

[Mga hulagway sa panid 9]

Ang mga Saksi ni Jehova interesado sa edukasyon ilabina aron mahimong mas epektibong mga alagad sa Diyos