Usa ka Dakong Damgo nga Natuman!
SINULAT SA KORESPONSAL SA PAGMATA! SA NIGERIA
KAPIN sa 500 ka Saksi naniudto sa Balayng Bethel sa Nigeria niadtong Pebrero 9, 1994, sa dihang nagpagawas ang mga silbidor ug sorbete ingong panam-is. “Unsa man ang okasyon?” ang uban kusog nga nangutana. “Dili lamang sorbetes, kondili lainlain pa ang sabor—vanilla, tsokoleyt, strawberry, ug pistachio!”
“Upat ka kolor nga sorbete! Kini may espesyal nga kahulogan,” miingon ang nagdumala diha sa pangaon. “Kini maoy sa pagselebrar sa atong pagbag-o ngadto sa upat ka kolor [bug-os-kolor] nga pag-imprinta!”
Ang midahunog nga palakpak maoy dili lamang alang sa sorbete nga gidalit sa komedor. Kadto maoy apresasyon sa bag-ong mga makina sa pag-imprinta sa pabrika nga nakasugod na sa pag-imprinta sa magasing Watchtower ug Awake! nga dekolor. Ang dekolor nga pag-imprinta nahimo na gayod sa tibuok kalibotan. Ang Nigeria mao ang kataposan sa dagkong mga sanga nga nagaimprinta ug dekolor—usa ka palakaw nga gisugdan sa tungatunga sa mga tuig sa 1980. Uban sa Marso 15, 1994, nga gula sa The Watchtower, ang duhay-kolor nga pag-imprinta maoy butang na sa nangagi sa Nigeria.
Ang duha ka bag-ong Koenig ug Bauer Rapida 104 nga mga makina sa pag-imprinta nagagikan pa sa sanga sa Netherlands. Uban sa mga makina sa pag-imprinta miabot ang ubang mga gamit sa pag-imprinta: plate scanner, makina nga igpipilo, igtatahi, igpuputol, ug sheeter. Tanantanan, kini mikabat ug 130 ka metrikong toniladang kasangkapan.
Mga Makina sa Pag-imprinta nga Nagalutaw sa Hangin!
Uban sa desisyon sa pagpadala sa mga makina sa pag-imprinta miabot ang problema kon unsaon sa pagpadala niini. Ang 35 ka tonilada nga mga makina sa pag-imprinta dili masulod sa maleta! Si Bernd Sauerbier, nga maoy nag-organisar sa pagpadala gikan sa Netherlands, miingon: “Gihunahuna namog maayo kon unsaon sa pagpadala sa mga makina sa labing maayo nga paagi nga dili madaot.”
Kasagaran ang maong makina sa pag-imprinta isulod diha sa dagkong kahoy nga mga kahon. Apan, ang mga igsoon nahadlok nga ang kahoy dili kaayo lig-on nga igong makasagubang sa mga kalisod diha sa biyahe sa dagat gawas pa sa pagkarga ug pagdiskarga sa piyer. Ang mas barato ug mas segurado nga kapilian mao ang pagkarga niini diha sa 40-piye nga gitas-ong puthawng mga kontiner sa barko. Apan unsaon nimo pagpasulod ug pagpagawas sa dagkong mga makina diha sa kontiner? Si Igsoong Sauerbier miingon: “Lisod gayod kaayo kadto tungod kay wala pa kami makasulay sa pagpakarga ug mga makina sa pag-imprinta diha sa mga kontiner. Bisan ang kompaniya nga naghimo niining mga makinaha walay ideya kon unsaon kini sa pagpakarga.”
Ang solusyon naglangkit sa paggamit ug mga air cushion o sangga nga hangin, nga nailhan usab nga mga kahonkahon nga gibutangag-hangin. Kining mga sangga nga hangin daw dili-makadaog nga tan-awon, apan dagko kaayo ang mahimo niini. Kini maoy patag nga mga gamit nga hinimo sa aluminum ug goma, nga mas dako lang ug gamay ug mas bug-at kay sa portamida. Ang may presyur nga hangin ibomba diha niini ug ang hangin ginaduso sa ilalom. Maalsa niini ang air cushion ibabawg diyutay sa yuta uban sa bisan unsa nga napatong niini.
Niining paagiha, bisan ang mga bahin sa mga makina nga motimbang ug daghang tonilada mahimong ipatong diha sa nipis nga sangga nga hangin. Kini moalsa, molutaw sa hangin! Sa dihang ang bahin sa makina maalsa gikan sa yuta, iduso lang kini sa kamot bisan asa pa nimo kini gustong ibutang.
Nagbutang ang mga Saksi ug playwod diha sa salog sa mga kontiner aron nga masayon ang paggamit ug air cushion sa sulod niini. Gitino usab nila nga ang salog sa matag kontiner patag gayod. Sa dihang nakasulod na ang mga makina sa kontiner, gipernohan sa mga igsoong lalaki ang mga kilid ug ang ibabaw sa matag kontiner ug mga barra nga puthaw aron dili mairog-irog ang karga. Mikabat ug duha ka semana sa Agosto 1993 sa pagkarga sa tanang mga bahin sa makina diha sa mga kontiner.
Niadtong Disyembre 29, 1993, sa 6:00 s.h., ang unang lima ka kontiner miabot sa nataran sa Bethel sa Nigeria. Ang mga igsoon naghulat, naghinamhinam ug andam na sa pagsugod sa lisod nga trabaho sa pagdiskarga. Nagtrabaho sila sa tibuok gabii hangtod sa pagkakadlawon. Sanglit ang mga makina gibutang man sa kahon nga may air cushion, gibombahan kini sa mga trabahante ug may presyur nga hangin, ug usa-usang midailos ang mga bahin sa makina gikan sa kontiner. Unya gialsa sa mga kren ang matag bahin diha sa espesyal nga pagkabuhat nga patonganan diha sa entrada sa pabrika. Gigamit na usab ang air cushion, ug samtang maikagong nagtan-aw ang mga tumatan-aw, ang mga makina gitulod sa kamot diha sa dapit nga kini igamontar.
Nangalipay sa Dekolor nga mga Magasin
Sa alas 7:45 s.g., sa Pebrero 3, 1994, gipagula sa mga makina ang unang Ingles nga magasin nga dekolor nga Watchtower nga gipatik sa Nigeria. Sa wala magdugay ang mga makina nagaimprinta usab ug mga magasin sa Yuroba, Igbo, Efik, ug Pranses.
Samtang ang unang mga kopya nabatonan niadtong nagpuyo sa Bethel, unsa ang reaksiyon? “Nalipay ako!” may usa nga miingon. “Ang kaanindot niini mas labaw pa kay sa bisan unsang publikasyon nga napatik niining nasora.”
Lain ang miingon: “Sa dihang nabatonan kini, mikuha akog 20 ka kopya, nga akong gipadala sa akong pamilya ug mga higala. Naghinamhinam ako sa paggamit niini diha sa kanataran.”
Ang lain pa, sa dihang gipangutana kon unsay iyang gibati bahin sa bag-ong dekolor nga magasin, mitubag: “Maayo gayod kaayo! Laing pamatuod na usab kini nga si Jehova nagatagad sa tanan sa tibuok-kalibotan!”
Busa samtang gikalipayag kaon sa mga trabahante sa Bethel ang ilang upat-ka-kolor nga sorbete, naghunahuna usab sila bahin sa dekolor nga mga magasin. Kadto, may miingon, maoy “usa ka dakong damgo nga natuman.”
[Mga hulagway sa panid 21]
Mga bahin sa makina sa pag-imprinta nga motimbang ug daghang tonilada gipatong diha sa nipis nga sangga nga hangin