Hippopotamus Mitabang!

MOTIMBANG ug hangtod sa upat ka tonelada, ang hippopotamus maoy ikaduhang kinadak-ang buhing nagapatutoy nga hayop sa mamala. Ang kusgang mga apapangig niini makabungkag ug bangka sa usa ka angkab. Mao nga, sa Hwange National Park, sa Zimbabwe, natingala gayod ang usa ka grupo sa kalalakin-an sa dihang ilang nakita ang usa ka hippo nga milihok sa paagi nga dili kasagarang panggawi sa usa ka hippo​—sa dili paghingapin.

Ang mga lalaki, samtang duol sa usa ka paambakan, nakakitag duha ka impala nga gigukod sa siyam ka ihalas nga iro. Kay walay kaikyasan, ang mga impala milukso sa tubig. Ang mga iro nagdagandagan sa daplin sa tubig, nga nag-atang kon asa malagmit nga mohaw-as ang mga impala.

Sa kataposan, ang usa ka gikutasang impala milangoy ngadto sa layo nga tampi, nga wala makaamgo nga ang mga iro atua didto naghulat. Hinuon, sa nagkahiduol na sa tampi ang impala, ang mga lalaki nakakita ug hippopotamus sa unahan nga naglangoy padulong sa impala. Sa dihang iyang naabtan kini, taho sa magasing African Wildlife, ang hippo “nagpabalik niini ug gipugos kini pinaagi sa pagtulod niini ug hinay nga molangoy sa laing direksiyon.” Gituman kini sa impala. Gisundan kini sa hippo, nga matag karon ug unya motulod ug hinay sa dihang ang impala magpakita ug pagduhaduha.

Sa dihang nakaabot na ang impala sa ngilit sa tubig, nakita sa mga lalaki nga hinay apan lig-on nga gipahaw-as sa hippo ang impala. Ang impala mitakiang ug makadiyut, dayon mihunong ug mitindog nga nagkurog. Sa wala madugay, ang impala misugod sa paglakaw palayo sa tubig. Ang hippo nagsunod hangtod pareho kining nawala sa panan-aw.

Unsay nahitabo sa laing impala? Ang mga lalaki nagtaho nga ang ihalas nga mga iro “nalinga pag-ayo sa pagtinan-aw sa gihimong pagluwas nga ang laing impala nakaipsot nga wala mamatikdi.”