Mga Magasin nga Nagahatag ug Praktikal nga Paghupay

“BUOT ko kamong pasalamatan ug dako tungod sa nindot, praktikal nga mga artikulo nga inyong gihatag kanamo aron magamit, ilabina niining ulahing duha ka tuig. Pagkadawat ko sa pipila niini, nakahilak gayod ako ug nagpasalamat kang Jehova tungod kay daghan kaayo sa atong mga higala diha sa kamatuoran ang nanginahanglan gayod sa maong impormasyon. Ang akong gitumong mao ang mga gula sama niadtong naghisgot bahin sa pag-abuso sa bata, pagkagimatuto sa alkoholikong pamilya, panglugos, ug kapintasan sa panimalay.”​—Linda W. S., Indiana, T.B.A.

Kanang mga pulonga maoy pasiuna sa usa sa daghang makapadapasig nga mga sulat nga among nadawat niining bag-o pang katuigan bahin sa mga kaundan sa mga magasing Bantayanang Torre ug Pagmata!, nga gipatik sa Watchtower Society ug giapod-apod sa mga Saksi ni Jehova sa tibuok kalibotan.

Sa dihang hunahunaon nato nga ang una dunay sirkulasyon nga kapin sa 16,000,000 ka kopya matag isyu ug gipatik sa 120 ka pinulongan ug nga ang sirkulasyon sa ulahi maoy halos 13,000,000 sa 75 ka pinulongan, nan atong maapresyar ang tibuok yuta nga epekto niining maong mga basahon. Ang mga Saksi ni Jehova nagatanyag niini ngadto sa publiko samtang sila nagministeryo diha sa balay ngadto sa balay ug sa ilang impormal nga pagsangyaw, nga nagtumong ngadto sa pagsangyaw sa impormal nga mga higayon, sama sa panahon nga nagpamalit sa tindahan, nagpatubil sa estasyon sa gasolina, nagbiyahe sakay sa mga bus, tren, ug ayroplano, o sa bisan unsang ubang haom nga panahon sa dagan sa matag adlaw nga kinabuhi. Bisan pa niana, ang pipila ka Saksi nakadiskobreg ubang orihinal ug malamposong mga paagi sa pagpahimutang ug mga magasin nga basin buot usab nimong sulayan.

Pagduaw sa Propesyonal nga mga Organisasyon

Usa ka nagapanaw nga ministro nagsulat labot sa mabungahong mga kalihokan sa laing Saksi ingon sa mosunod: “Gituyo gayod niya pagtigom ang karaang mga kopya sa pipila ka magasing Pagmata! nga nagtapun-og sa balay sa ubang mga Saksi. Dayon iyang duawon ang mga ahensiya nga gibati niyang mahimong magpakitag linaing interes sa pipila ka ulohan.” Unsang matanga sa mga ahensiya ang iyang giduaw?

“Ang iyang gihatagan ug pagtagad mao ang mga ahensiya sa pag-alagad sa katilingban, mga sentro sa pro-life, Planned Parenthood, mga sikyatrista, sikologo, mga departamento sa polisiya, mga buhatan sa probation, mga sentro sa pag-abuso sa droga ug alkohol, mga sentro sa pagtambal ug pagsanta sa pag-abuso sa bata, mga departamento sa hinabang (nga pangitaon ang mga kawani), departamento sa panglawas sa lungsod, mga sentro sa day-care, mga tunghaan, mga sentro sa ospital bahin sa kapit-osan, ug sa usa ka higayon usa ka mayor sa dakbayan.” Unsay iyang kalamposan?

“Sukad nga misugod siya pagtagad niining talagsaong natad sa milabayng unom ka bulan, siya nakapahimutang ug 1,784 ka karaang gula bahin sa espisipikong mga ulohan!”

Giunsa niining maong Saksi paghimo kining mga pagduaw sa propesyonal nga mga tawo? Siya miingon: “Nagtuo ko nga usa sa katarongan nga malamposon kaayo kining maong mga pagduaw, gawas sa kamatuoran nga ang mga magasin naghisgot sa mga isyu nga giatubang niining maong mga tawo matag adlaw, mao nga kami nagbiste ug mipresentar sa among kaugalingon sa propesyonal nga paagi.” Sa walay duhaduha ang propesyonal nga mga tawo motahod kanato kon kita dunay masaligon, pormal nga paagi sa pagduol ug nabistihan ug nangareglar sa haom nga paagi.

Siya mipadayon sa iyang asoy: “Kami nagtanyag ug Pagmata! bahin sa aborsiyon (Mayo 22, 1993), busa mihukom ako sa pagduaw sa sentro sa pro-life. Gisugdan nako pagpakigkabildo bahin sa usa ka tipik sa balita labot sa minaomaong aborsiyon ug dayon gidala kini ngadto sa magasin, uban sa Ang Bantayanang Torre. Nindot kaayo ang among panaghisgot nga tungod niana gitanyag usab nako ang brosyur nga Tinuod Bang May Pagtagad ang Diyos Kanato?, nga mahinamon nilang gidawat.” Ang sunod niyang giduaw mao ang sentro sa Planned Parenthood diin duna usab siyay susamang kalamposan.a

Kining matanga sa inisyatibo mahimong motultol ngadto sa nagasangkad nga grupo sa positibong mga kontak. Gikan sa mga sulat nga among nadawat nasayod kami nga ang propesyonal nga mga tawo subsob nga nakadayeg sa pagdukiduki ug sa ekselenteng estilo sa pagsulat nga naa sa atong mga magasin. Pagkatinuod niini nga sa pipila ka nasod, sama sa Suriname, sa Amerika del Sur, ang Pagmata! gigamit ingong pangunang edukasyonal nga magasin sa mga estudyante ug mga magtutudlo. Ang mga Saksi didto makapahimutang ug daghang magasin, ug ang mga interesado mahinamong nagahulat sa matag gula.

Usa ka taho nga nadawat gikan sa Nigeria nagsugilon sa usa ka estasyon sa radyo nga nagkutlo pulong por pulong gikan sa gula sa Pagmata! bahin sa “Kababayen-an​—Takos sa Pagtahod.” (Hulyo 8, 1992) Unsa ang gipasabot niini? Nga kita mahimong makatanyag nga malamposon sa mga magasin ngadto sa mga direktor sa estasyon sa radyo ug sa TV. Kinahanglan lamang nga tun-an ang matag gula ug hunahunaon kon kinsa ang lokal nga mga espesyalista sa mga ulohan nga gihisgotan, kon sila kaha mga manlalaban, magtutudlo, magtatambag, polis, nars, doktor, o membro sa bisan unsang ubang propesyon.

Usa ka lahi nga pagduol ang gigamit sa usa ka Saksi nga mibukas sa iyang presentasyon pinaagi sa pagsukna, “Gusto ba nimong motubag ug mga pasulit? Kadaghanan sa mga tawo gusto niana. Aniay usa ka gula sa Pagmata! (Enero 8, 1994, o Septiyembre 8, 1994) nga nag-ulohang ‘Nahibulong Ka ba Sukad?’ Nganong dili nimo isulat ang imong mga tubag niining maong mga pangutana, ug balikan tika usa ka adlaw aron itandi nato kini sa mga tubag sa Bibliya.” Daghan siyag makaiikag nga mga panagkabildo pinasikad niining maong pamaagi ug nakasugod ug daghang pagtuon sa Bibliya.

Ang laing praktikal nga sugyot mao ang pagpakita sa kinaulahiang mga gula uban sa mga ulohan nga mahimong makadani sa partikular nga propesyonal nga imong kaestorya. Si Linda, nga gikutlo ganiha, nakaagi niining mosunod nga eksperyensiya uban sa tagdumala/tigtambag sa usa ka tunghaan nga dunay programa sa alternatibong-pagtuon. “Samtang gisusi namo ang mga magasin, iyang nakit-an ang ‘Mga Bata nga Ubos sa Pagpit-os’ ug miingon, ‘Gipadala ka sa Diyos karon!’ Niadtong maong adlawa mismo duna siyay sesyon bahin sa pamaagi nga malikayan sa mga bata ang kabug-at. Sa dihang iyang nakit-an ang eksperyensiya sa hapin sa likod sa magasin nga nagapahibalo sa librong Ang Imong Pagkabatan-on​—Pagpahimulos sa Labing Maayo Niini, mihangyo siyag kopya. Nahitabo nga akong napakita kaniya ang usa ka kinutlo gikan sa libro bahin sa pagtubok, diin human niana siya mituwaw, ‘Karon nasayod na ko nga gipadala ka sa Diyos dinhi!’ Bag-o lang gayod siya mitambag sa usa ka batang lalaki nga dili na gustong mabuhi. Niadtong tungora mas labaw pa ang iyang matanyag kaniya.”

Kining maong mga eksperyensiya nag-ilustrar nga pinaagi sa inisyatibo ug pagpangandam inubanan sa positibong tinamdan, makaduol kita sa mas daghang mga tawo dala ang Pulong sa Diyos sa kahupayan. Ingon sa gisulat ni apostol Pablo: “Bulahan ang Diyos ug Amahan sa atong Ginoong Jesu-Kristo, ang Amahan sa malumong mga kaluoy ug ang Diyos sa tanang paghupay, kinsa nagahupay kanamo sa tanan namong kasakitan, aron kami makahupay nilang anaa sa bisan unsang matang sa kasakitan pinaagi sa paghupay nga pinaagi niini kami sa among kaugalingon ginahupay sa Diyos.”​—2 Corinto 1:3, 4.

[Mga footnote]

[Hulagway sa panid 23]

Ang mga magasin adunay praktikal nga impormasyon alang sa mga ahensiya sa pag-alagad sa katilingban

[Hulagway sa panid 24]

Ang Bantayanang Torre ug Pagmata! mahimong ikatanyag sa daghang kahimtang