Kinsay Mainteres Niini?

1. Unsay angay natong konsiderahon samtang atong basahon ang Bantayanang Torre o Pagmata!, ug ngano?

¹ Ang Bantayanang Torre ug Pagmata! gidisenyo aron magamit sa bisan asang teritoryo. Busa lainlain ang mga topiko niini. Samtang basahon nato kini, angay natong konsiderahon kon kinsay mainteres niini, dayon mangita tag paagi nga itanyag kini sa maong tawo.

2. Unsang mga topiko nga gihisgotan sa atong mga magasin ang makapainteres sa uban?

² May topiko ba sa bag-ong isyu sa Bantayanang Torre nga nahisgotan na ninyo sa imong kauban sa trabaho? May artikulo ba kini bahin sa pamilya nga makatabang sa usa nimo ka paryente? Duna ka bay kaila nga nagplanong mobiyahe sa lugar nga gihisgotan sa Pagmata!? Ang usa ba sa atong mga magasin makapainteres diha sa mga negosyohanan o lokal nga ahensiya sa gobyerno sa inyong teritoryo? Pananglitan, ang magasin nga naghisgot bahin sa problema sa mga tigulang tingali makapainteres niadtong anaa sa mga nursing home. Ang mga ahensiya nga tigpatuman sa balaod tingali mainteres sa magasin nga naghisgot bahin sa krimen.

3. Iasoy ang kasinatian nga nagpakitang hinungdanon ang pagtanyag ug espesipikong isyu sa mga magasin niadtong gituohan natong mainteres niini.

³ Mga Resulta: Human madawat ang Oktubre 2011 nga Pagmata! nga may ulohang “Kon Unsaon Pagmatuto ug Responsableng mga Anak,” gitawgan sa usa ka magtiayon sa South Africa ang 25 ka eskuylahan nga sakop sa ilang teritoryo. Dihay 22 nga midawat ug nag-apod-apod niini sa ilang mga estudyante. Gihimo sab kini sa lain pang magtiayon sa maong dapit ug nakapahimutang silag daghang kopya diha sa mga eskuylahan sa ilang teritoryo. Gigamit sa mga magtutudlo sa usa sa mga eskuylahan ang magasin sa ilang senemanang leksiyon ug programa sa pagbasa. Dihang giasoy kini sa magtiayon ngadto sa usa ka magtatan-aw sa sirkito, gidasig niya ang mga kongregasyon sa iyang sirkito sa pagsangyaw sa mga eskuylahan sa ilang teritoryo. Ang sangang buhatan nakadawat ug daghang request alang sa dugang magasin, maong gipatik pag-usab kini nga isyu.

4. Nganong ipanagtag nato ang mga magasin?

⁴ Ang atong mga magasin naghisgot sa tinuod nga kahulogan sa mga hitabo karon ug nagpunting sa pagtagad sa mga magbabasa ngadto sa Bibliya ug sa Gingharian sa Diyos. Mao lang kini nga mga magasin ang “nagmantalag kaluwasan.” (Isa. 52:7) Busa buot natong ipanagtag kini sa mas daghang tawo. Nan, maayong pangutan-on ang kaugalingon, ‘Kinsay mainteres niini?’