Pilia ang mga Artikulo nga Magpunting sa Tinong mga Tinguha sa mga Tawo
1 Samag mga magpapana nga magpunting pag-ayo sa ilang mga pana, daghang magmamantala ug mga payunir sa kongregasyon nagatagamtam ug ekselenteng kalamposan ginamit ang piniling mga isyu sa Ang Bantayanang Torre ug Pagmata! aron makadani sa tinong mga tinguha sa mga tawo sa ilang teritoryo. Ilang gipiho kon kinsa gayod ang lagmit buot nga mobasa sa espesipikong mga isyu sa mga magasin. Giunsa nila paghimo kini?
2 Una, bug-os nilang basahon ang matag isyu. Dayon, ilang suknaon ang ilang kaugalingon, Unsang matanga sa tawo ang madani sa matag artikulo? Dayon ang paningkamot gihimo sa pagduaw sa mga indibiduwal nga lagmit mainteres sa pagbasa sa maong isyu sa mga magasin. Sa dihang nagdahom nga daghan ang mapahiluna sa usa ka partikular nga isyu sa ilang teritoryo, sila moorder ug ekstrang suplay.
3 Gitahob Pag-ayo ang Atong mga Magasin: Usa sa atong mga tigsuskriber nga nagtrabaho sa labing kaylap ginabasang internasyonal nga magasin sa Nigeria miingon bahin sa Pagmata!: “Mga pahalipay alang sa labing maayong magasin para sa publiko.” Usa ka masibotong magbabasa sa atong mga magasin miingon: “Pagkamaayong mga mutya sa bililhong kaalam! Makakaplag gayod ako ug bisan unsang ulohan nga makapainteres kanako nga gihisgotan bisan hain sa mga panid sa usa niining [mga basahona].”
4 Ang mga magasin nagkobreg nagkadaiyang mga ulohan, lakip ang Bibliya, mga hitabo sa kalibotan, mga kabalaka sa pamilya, mga suliran sa katilingban, kasaysayan, siyensiya, kinabuhi sa hayop ug tanom, sa paglista lamag pipila. Dayag nga ang usa ka tawo mas mokiling sa pagbasa sa basahong naglangkit sa iyang mga panginahanglan, mga kahimtang, o propesyon. Sanglit kita makigsulti sa lainlaing mga indibiduwal, nga ang matag usa may ilang kaugalingong mga gusto ug mga suliran, ang pagpilig tinong mga artikulo aron makapadani sa mga tawo nga atong ikahimamat maoy epektibo kaayo.
5 Matikdi kon unsay nahitabo sa dihang duha ka Saksi mitanyag sa Septiyembre 8, 1996, nga isyu sa Pagmata! ngadto sa usa ka kolumnista sa mantalaan. Siya misulat: “Una pa ako nakahigayon sa pagsulti nga ako dili interesado, usa kanila midugang: ‘Adunay artikulo bahin sa Amerikanhong mga Indian. Nasayod kami nga daghan ka nag nasulat bahin sa ulohan.’” Iyang gikuha ang magasin ug, panahon sa pamahaw, gibasa ang materyal bahin sa mga Indian, sa ulahi miadmitir nga “kini ekselente” ug “matinud-anon kaayo.”
6 Unsay Makapainteres sa mga Tawo sa Imong Teritoryo? Unsay imong nakita sa mga magasin sa di pa dugayng mga bulan nga lagmit makapadani sa mga tindera/tindero ug propesyonal nga mga tawo sa imong teritoryo o sa imong mga silingan, mga kauban sa trabaho, ug mga klasmet? Unsay partikular nga makapainteres sa mga abogado, mga magtutudlo, mga magtatambag sa pamilya ug sa tunghaan, mga tigpahimangno sa mga batan-on, mga tigtaganag katilingbanong mga serbisyo, ug mga mananambal? Ang paghunahuna sa nagkalainlaing kagikan sa mga tawo nga imong sangyawan samtang imong susihon ang matag isyu maghatag kanimog ekselenteng mga paagi sa pagpakaylap sa pulong sa kamatuoran.
7 Sa dihang makakaplag kag tawo nga nagpakitag linaing interes sa usa ka tinong artikulo sa Bantayanang Torre o Pagmata! ug kinsa modawat ug magasin, ikaw makaingon: “Kon dunay artikulo sa umaabot nga isyu nga akong bation nga makapainteres usab kanimo, ako malipay sa pagdala kanimog usa ka kopya.” Mahimong imong idugang ang tawo sa imong ruta sa magasin, nga mobalik kaniya kanunay uban sa kinaulahiang mga magasin. Kana maoy susama sa ginahimo sa pagdawat ug bukas nga pagdapit sa paghimog mga balikduaw ngadto sa mga indibiduwal nga tingali ilabinang interesado sa tinong mga artikulo nga motungha sa atong mga magasin.
8 Batoni ang Espirituwal nga Tumong: Pipila ka tuig kanhi, usa ka mahiligon-sa-propesyon nga lalaki nakabatog magasing Pagmata! bahin sa ulohan nga nakapainteres kaniya. Bisan pa niana, kining relihiyosong lalaki mibasa usab sa kaubang isyu nga Ang Bantayanang Torre, nga naundag artikulo nga nagtukmod kaniya sa pagsusi sa iyang dugay nang pagtuo sa Trinidad. Unom ka bulan sa ulahi siya nabawtismohan! Busa, ayaw pagpanuko sa paglangkit sa mga magbabasa sa atong mga magasin diha sa Kasulatanhong mga panaghisgot. Imong ikapakita ang brosyur nga Unsay Gikinahanglan sa Diyos Kanato? ug agdaha nga mogamit ug pipila lamang ka minutos aron hisgotan ang usa ka leksiyon matag panahon nga ikaw mobalik nga may bag-ong hugpong sa mga magasin.
9 Tinoa pag-ayo kon kinsa taliwala sa imong mga balikduaw ug mga kontak sa negosyo nga lagmit gayong mopabili sa pagbaton ug bag-ong mga isyu sa Ang Bantayanang Torre ug Pagmata! Dayon paningkamoti pag-ayo ang pag-abot kanila. Kontaka ang daghan kutob sa imong maarangan uban niining hinungdanong mga basahon. Ug ayaw gayod kalimti nga samtang ikaw maningkamot sa pagtabang sa dugang mga tawo sa pagbasa sa atong mga magasin, ikaw ‘nagpadala sa imong tinapay diha sa ibabaw sa katubigan.’ Sa hustong panahon, ikaw hayan molampos sa pagkaplag ug umaabot nga kaubang mga tinun-an.—Eccl. 11:1, 6.