Gikan sa Among mga Magbabasa
Reinkarnasyon Salamat sa ekselenteng serye sa mga artikulong “Nabuhi Ka ba Kanhi? Mabuhi Ka ba Pag-usab?” (Hunyo 8, 1994) Kining mga artikuloha nagpasa sa yano ug makataronganong paagi sa kamatuoran bahin sa kahimtang sa patay. Ako nagtuo nga si bisan kinsa nga nangita sa kamatuoran maylabot niining ulohana maaghat sa pagdawat sa inyong gisulat.
F. P., Italya
Kanhing Boksidor Daghan kaayong salamat sa artikulong “Nakakat-on Ako Pagdumot sa Akong Nagustohan.” (Hunyo 8, 1994) Ang sugilanon ni Obdulio Nuñez nakatabang kanamo sa pagsabot sa pipila ka medikal nga mga suliran sa akong bana. Ingong kanhing boksidor, siya usab nag-antos gumikan sa depresyon. Sa pagkatinuod, si Jehova nga Diyos ang nakatabang sa akong bana sa pag-usab sa paagi sa iyang pagkinabuhi!
S. S., Tinipong Bansa
Sakit Ako usa ka propesyonal nga masahista ug ako buot magpasalamat kaninyo sa seryeng “Posible ba ang Kinabuhi nga Walay Sakit?” (Hunyo 22, 1994) Ako nadani kaayo sa pagsabot, katimbang, ug kaalam nga nadayag diha sa pagdukiduki ug presentasyon niining maong impormasyon. Ang artikulo mahimong usa ka bililhong tabang sa mga espesyalista, mga pasyente, ug uban pa. Nga nagagamit sa mga paagi sa pagmasahe, ako padayong nagapakigbugno sa sakit, nga nagapaabot sa adlaw ilalom sa Gingharian sa Diyos diin ang tagdugayng sakit dili na maglungtad.
D. T., Denmark
Kining mga artikuloha naghupay pag-ayo kanako. Gipaambit ko kini sa daghang uban pa kinsa, sama kanako, nagsagubang sa sakit matag adlaw.
M. G., Tinipong Bansa
Ako nagahigda sa kama samtang nagasulat kaninyo, diin ako sa popanahon maglubog sa banig sulod na sa duha ka tuig ug tunga tungod sa duha ka herniated disk. Salamat sa maayo kaayong artikulo nga “Nagaantos Ka ba sa Sakit sa Bukobuko?” (Hunyo 8, 1994) Ako mihilak sa dihang nagbasa niana, tungod kay sama rang kamo nakig-estorya kanako. Halos dili ako makatuo nga si bisan kinsa tin-aw kaayong makasabot niining sulirana.
B. H., Inglaterra
Napulo lang ka adlaw ang milabay, kinahanglan akong mosinati sa operasyon sa bukobuko, ug ako nagpasalamat kaninyo tungod sa tukmang impormasyon. Ang artikulo nagtabang kanako sa pagsabot sa hinungdan sa akong gibating sakit. Ang mga sugyot nga gihatag mapuslanon kaayo, ug ako naglaom nga daghan ang moaplikar niana ug malikayan ang operasyon.
K. G., Hungaria
Musikal nga Sayop? Nagustohan nako pag-ayo ang artikulong “Gikan sa Tigsakayg-Libre nga Hippie Ngadto sa Pagka-Misyonaryo sa Habagatang Amerika.” (Marso 22, 1994) Apan usa ka punto ang nagpalibog kanako. Si Richard Fleet naghisgot nga miadto siya sa Liverpool aron makita ang Beatles niadtong Septiyembre 1973. Sumala sa akong nahibaloan, ang Beatles mipasundayag sa publiko sa kataposang higayon niadtong 1969 ug nabungkag pagka 1970.
C. S., Alemanya
Gikasubo namo ang sayop nga pagsabot. Buot ipasabot ni Richard Fleet nga siya miadto sa Liverpool aron makita ang usa ka naytklab diin nagpasundayag kanhi ang Beatles.—ED.
Paghikog Pasalamatan ko kamo uban sa tibuok kong kasingkasing tungod sa artikulong “Mga Batan-on Nangutana . . . Paghikog ba ang Sulbad?” (Abril 8, 1994) Pagkadaghang higayon nga gusto kong buhaton ang ingon. Sa dihang bata pa ako, ako giabusohan sa seksuwal nga paagi sa usa ka tawo nga akong gisaligan. . . . Kaniadto, ako misulat ug daghan kaayong mga sulat nga nag-ingong, ‘Buot kong mamatay’ nga wala na nako maihap. Sukad niadto nahimo akong usa sa mga Saksi ni Jehova, ug karon ako nag-alagad ingong bug-os-panahong ebanghelisador, apan kining maong agda modangat gihapon kanako matag karon ug unya. Gibati nako kini sa adlaw nga wala pa nako madawat ang artikulo. Nakapahilak kini kanako. Apan si Jehova nagtugot kanako nga magpabiling buhi, ug siya daw nagsulti kanako sa hinay, ‘Padayong magkinabuhi.’ Sa pagkatinuod, ako nagpasalamat kaayo kaninyo.
Y. K., Hapon