Ikaw ba Usa ka Luwas nga Drayber?

ANG imong tinamdan samtang ikaw anaa sa luyo sa manibela sa usa ka sakyanan kusganong makaimpluwensiya sa imong abilidad sa pagdrayb. Ang usa ka pagtuon nga gihimo sa British Automobile Association nagpadayag nga kada tuig 22 porsiento sa Britanikong mga lalaki tali sa 17 ug 20 anyos ang edad nalangkit sa labing menos usa ka aksidente sa kadalanan.

Unsa ang pangunang mga hinungdan sa ilang dili-luwas nga mga batasan sa pagdrayb? Gawas sa alkoholikong ilimnon, mga pag-usab-usab sa buot, ug kusog nga musika, ang luyoluyong direktor-heneral sa Automobile Association, si Kenneth Faircloth, nag-ingon: “Daghan kaayo ang naimpluwensiyahan sa ilang mga katalirongan sa peligrosong pagdrayb.” Ingong resulta, ang Automobile Association nagsugyot nga ang pagbansay labi pang itunong diha sa mga tinamdan sa drayber ug dili kaayo itunong diha sa naandang mga paagi sa pagdrayb.

Pananglitan, pangutan-a ang imong kaugalingon: ‘Gisulayan ko ba sa pagpabilib ang akong mga pasahero pinaagi sa dinanghag nga pagpamasin? Ang kahimtang sa akong kaisipan mao bay magtino sa akong panggawi sa luyo sa manibela? Giisip ko ba ang ubang mga drayber sa dalan ingong mga babag lamang nga kinahanglang malupigan?’ Ang mga tubag sa maong mga pangutana magpadayag kon unsa kang matanga sa drayber.

Lalaki man o babaye, bata o tigulang, ugmara ang mahigalaong tinamdan samtang nagadrayb. “Trataha ang ubang mga tawo sa paagi nga buot nimong tratahon ka nila.” (Mateo 7:​12, Phillips) Ang pagbuhat sa ingon makatabang kanimo sa luwas nga pagdrayb.