Kon Nganong Nabalaka ang mga Obispo sa Italya

SINULAT SA KORESPONSAL SA PAGMATA! SA ITALYA

SA Nobyembre 1993, mipahayag ug daghang negatibong mga komento ang komperensiya sa mga obispo sa Italya bahin sa mga Saksi ni Jehova. Gipangangkon nga sila dili mga Kristohanon ug nga ang ilang pultahan-ug-pultahan nga pagsangyaw maoy “linuog nga pagpangabig.”

Bisan pa niana, wala mouyon ang tanang relihiyosong mga awtoridad. Pananglitan, si Attilio Agnoletto, nga propesor sa kasaysayan sa Kristiyanidad sa Milan State University, naghubit sa mga Saksi ni Jehova ingong “usa ka malig-on, seryoso, Biblikanhon, bug-os lehitimong kalihokan nga walay bisan unsang pagkadili-kristohanon.”

Ug unsa man ang bahin sa ilang “linuog nga pagpangabig”? “Ang terminong ‘linuog’ maoy dili gayod dalawaton,” miingon si propesor Agnoletto sa Pagmata! “Kana magpasabot nga ang pagpangabig ni Jesu-Kristo maoy ‘linuog’ usab.”

Nganong ang mga obispo nagahambin sa maong pagpihig batok sa mga Saksi ni Jehova? Gibati ni Propesor Agnoletto nga ang ilang pagsupak maoy “resulta sa gidaghanon mismo ug sa kalamposan sa mga Saksi ni Jehova sa Italya karong adlawa,” nga, dugang pa niya, “nahisibo sa usa ka krisis sa Katolikong pagkarelihiyoso.”

Ang klero karong adlawa nagatinguha sa pagpakaulaw ug pagbabag niadtong nagasugot sa sugo ni Jesus sa pangsangyaw. (Mateo 28:​19, 20; itandi ang Mateo 5:​11, 12.) Ang mantalaang La Stampa nagataho nga bisan pa sa pagsupak, ang mga Saksi ni Jehova mao ang ikaduhang-kinadak-ang denominasyon sa Italya, nga karon kapin na sa 200,000 ang gidaghanon ug padayong nagatubo.

Sa pagtandi, ang Katolikong Iglesya nakasinatig pagkunhod sa tumatambong sa dili pa dugayng mga tuig. Busa sa pagsugod sa 1994, si Papa Juan Paulo II nag-awhag sa mga Katoliko sa Italya nga mahimong aktibong mga ebanghelisador, nga magsangyaw bisan sa pultahan ug pultahan​—sama gayod sa ginabuhat sa mga Saksi ni Jehova!a

[Footnote]