Gikan sa Among mga Magbabasa
Mapaluyohong mga Ginikanan Usa ka espesyal kaayong pasalamat alang sa seryal nga “Mga Ginikanan—Mahimong Tigpaluyo!” (Agosto 8, 1994) Sa dili pa dugay, ang prinsipal sa akong kinamanghorang anak nga babaye sa tunghaan naghisgot bahin sa maayong komunikasyon sa ginikanan-magtutudlo uban sa usa ka grupo sa mga ginikanan. Gidala ko ang magasin ngadto sa prinsipal, ug gibasa niya kini dihadiha. Duha ka semana sa ulahi ang akong anak nga babaye nagdala kanako sa binulang peryodiko sa tunghaan. Ang bahin sa artikulo sa maayong komunikasyon gipatik pag-usab aron nga ang tibuok komunidad makabenepisyo sa impormasyon.
W. B., Tinipong Bansa
Mga Mestisong Balyena-Lumod Ako nalipay sa artikulong “Usa ka Balyena? Usa ka Lumod?—Dili, Usa Kini ka Mestisong Balyena-Lumod!” (Pebrero 22, 1994), bahin sa mestisong lumod/balyena. Sa kataposan gitawag ninyo kining usa ka “panan-awng daan sa katingad-ang potensiyal alang sa panagkadaiya nga gitukod sa Diyos diha sa iyang kalalangan.” Ako dili mouyon niini tungod kay ang pagkastahay dili mahimo diha sa ilang normal nga palibot.
K. G., Tinipong Bansa
Wala namo ipasabot nga ang maong pagkastahay maoy normal o nga ang Diyos maoy responsable niana. Bisan pa, dili kapasidunggan ang tawo sa paglungtad sa maong makaiikag nga linalang. Ang mga mestiso mahitabo lamang tungod sa “potensiyal alang sa panagkadaiya nga gitukod sa Diyos diha sa iyang kalalangan.” Ang among artikulo sa ingon naghatag sa Diyos sa angay nga pasidungog.—ED.
Kulbahinam nga mga Isports Diha sa artikulong “Mga Batan-ong Nangutana . . . Kulbahinam nga mga Isports—Angay Bang Isugal Ko ang Akong Kinabuhi?,” maayo ang inyong pagpasidaan sa mga batan-on sa posibleng mga kapeligrohan sa bungee jumping. (Hulyo 8, 1994) Wala pay semana human nako mabasa kini, ang British Broadcasting Corporation nagtaho nga upat ka batan-on ang nag-antos ug grabeng kadaot sa mata tungod sa bungee jumping. Salamat sa inyong maayong magasin.
D. F., Inglaterra
Ang artikulo bahin sa nagahagit-sa-kamatayong mga isports nagbilin kanakog pagbati nga bug-os nga nakamata! Ako kas-a mikatkat sa usa ka titip nga bato nga pangpang ug nakakaplag sa akong kaugalingon nga dili makahimo sa pag-atras o pag-abante. Hangtod niining adlawa ako mangurog kon unsa ka duol ako sa kamatayon. Pagkabinuang unta kadto nga pag-usik sa akong kinabuhi!
L. T., Tinipong Bansa
Giapresyar ko pag-ayo ang artikulo. Sa akong gipuy-an, ang mga bata nakigbahin sa daghan niining kulbahinam nga mga isports. Ila akong danihon kanunay sa pagduyog kanila. Apan, diha sa balita, kanunay akong makakita ug mga taho bahin sa mga tawong namatay o nasamdan pag-ayo gikan sa giingong makalingaw nga mga isports nga gisugilon nila kanako. Human mabasa ang artikulo, naamgohan nako nga dili maalamon nga ipameligro ko ang akong kinabuhi, nga gihatag kanako ni Jehova nga Diyos, alang lamang sa dili-magdugay nga kaukyab.
J. S., Tinipong Bansa
AIDS Sulod sa tulo ka tuig ako nag-alagad ingong bug-os-panahong ebanghelisador. Karon, hinunoa, ako dili na makahimo. Ako may AIDS. Salamat sa prangka nga paghisgot niining malisod nga ulohan diha sa artikulong “Pagtabang Niadtong Adunay AIDS.” (Marso 22, 1994) Nakita ko nga kamo tim-os nga mabalak-on sa intereses sa tanan. Apan, daw nasayloan sa daghan ang mga bahin sa artikulo nga nagdasig sa pagpakitag simpatiya sa nasakit ug maoy gitagad ang gihisgotang “makataronganong mga panagana.” Ingon sa daw ang artikulo naghatag sa pipila ug lisensiya nga di-magmatinagdanon. Ako nahibulong kon unsay mahitabo sa dihang ako grabe na ug nagkinahanglan gayod ug gugma ug pagpaluyo sa akong mga igsoon. Modumili kaha ang pipila sa pagduaw kanako tungod kay sila mahadlok nga matakdan sa kagaw?
M. N., Tinipong Bansa
Gipabilhan namo kining prangkang mga komento. Dili among tuyo ang pagpabugnaw sa paghatag ug pagpaluyo alang sa mga biktima sa AIDS. Sa pagkatinuod, kami nag-ingon: “Pinasukad sa bag-ong mga hunahuna, ang ordinaryong kontak dili magpasa sa AIDS. . . . Ang usa dili kinahanglang sobrang mahadlokon nga makauban ang mga tawo nga adunay AIDS.” Ang gisugyot nga mga panagana makatabang sa uban nga mobatig usa ka sukod sa proteksiyon samtang sila makiglabot nga mabination sa mga biktima sa AIDS.—ED.