Pasidaan sa Nagdukang Drayber

KINI magpahinabog gibanabanang 600,000 ka aksidente ug 12,000 ka kamatayon sa haywey matag tuig sa Tinipong Bansa. Gipasangil niini ang 40 porsiento sa makapatayng mga binanggaay sa di pa dugayng katuigan sa New York State Thruway. Kining tanang kadaot gipahinabo sa pagdrayb ilalom sa impluwensiya, dili sa droga o sa alkoholikong ilimnon, kondili sa pagduka. Ang pila ka eksperto nagtuo nga ang suliran nagsumikad, dili sa mga suliran sa pagkatulog, sama sa apnea o insomnia, kondili sa estilo lamang sa kinabuhi sa katuigang 1990. “Ang mga Amerikano mas nahikawan sa katulog kay sa miaging pipila ka tuig,” matud ni Dr. William Dement sa Stanford University Sleep Research Center. Si Dave Willis, ang ehekutibong direktor sa American Automobile Association Foundation for Traffic Safety, nag-ingon: “Ang mga tawo kulang kaayog katulog.”

Ilabinang makapaguol mao ang kamatuoran nga daghang nagdukang mga drayber mahikatulog ug mahigmata nga wala masayod niana. Ang usa ka “katulog nga minanok,” ingon sa pagtawag niana sa mga eksperto, mahimong dangtag pipila ra ka segundo, apan ang tibuok nga resulta mahimong makalilisang. “Nahinumdoman nako nga milabay sa gawsanan numero 17, dayon nakakitag mga ilhanan alang sa gawsanan 21,” matud sa usa ka drayber. “Ako naghunahuna, diin man ko sa mga gawsanan tali niana? Maamgohan nimong usa ka milagro nga nakaabot ka pa sa imong giadtoan.”

Ang labing maayong paagi nga mapakigbisogan ang kalapoy sa pagdrayb mao ang paghunong ug pagpahulay. Ang 10- ngadto sa 20-minutos nga pagtagpilaw sa usa ka luwas nga dapit lagmit mao lamang ang gikinahanglan. Mas maayo pa, magmarealistikanhon sa dihang nagaplano sa usa ka biyahe. Ayaw sulayi ang pagkobre ug mas layo pa kay sa imong mahimo. Dugang pa, tahora ang pangsulod nga orasan sa imong lawas pinaagi sa paglikay sa dugayng pagdrayb magabii ug pinaagi sa pagpahulay pag-ayo sa dili pa mosugod sa usa ka biyahe. Labaw sa tanan, ayaw gayod pakamenosa ang kapeligrohan sa pagdrayb bisag nagduka. Matud ni Mark Hammer sa Institute for Traffic Safety Management and Research sa New York: “Sama ra [kini] ka makadaot sa pag-inom ug lima ka lad-ok nga alkoholikong ilimnon ug unya magdrayb.”