Pagpaniid sa Kalibotan
Makamatayng mga Misyon sa Kalinaw
Hangtod karon, kapin sa usa ka libong tawo ang gipamatay samtang nalangkit sa mga misyon sa Hiniusang Kanasoran sa pagmentinar sa kalinaw, nagtaho ang Alemang mantalaan nga Frankfurter Allgemeine Zeitung. Kining gidaghanona wala maglakip niadtong nakalasan sa ilang mga kinabuhi panahon sa mga misyon sa pagpakiggubat sa HK, sama sa Gubat sa Gulpo. Niining 1,000 ka kamatayon, kapin sa 200 ang nahitabo sa 1993 lamang. Nganong daghan kaayo? Ang mantalaan nagpatin-aw nga ang Hiniusang Kanasoran nalangkit karon sa laing matang sa gubat. Samtang sa nangagi ang Hiniusang Kanasoran nagpataliwala ug nagbantay sa paghusay sa mga panagbangi tali sa mga nasod, ang organisasyon karon nalangkit sa “sibil nga mga gubat, diin ang awtoridad sa estado nahugno ug bisan ang mga pundok nga miapil sa gubat napakyas sa pagpanalipod sa mga kawani sa HK.”
Sakit sa Utok Taliwala sa Kabataan
Sumala sa The Sunday Times, sa mga eskuylahan sa Gran Britanya, kapin sa 1,000 ka kabataan ubos sa 10 anyos ang edad ug mga 1,200 tali sa mga edad nga 10 ug 14 anyos ang ginatambalan tungod sa pagkabuang, grabeng depresyon, o mga suliran sa pagkaon; ug ang gidaghanon sa maghikog nagauswag usab, diha sa kabataan nga ingon ka bata sa sayes anyos ang edad nga nagahulga sa paghunos sa ilang kaugalingong mga kinabuhi. Ang pila ka eksperto sa mental nga kahimsog naghunahuna nga usa sa mga katarongan mao ang kakulang sa makahuloganong kabildohay tali sa kabataan ug sa ilang mga ginikanan. Sila nag-ingon nga daghang kabataan nagpuyo sa usa ka kalikopan sa panimalay diin ang telebisyon maoy nagmando. Ingong resulta, ang kabataan dili makahisgot ug makapakig-ambit sa ilang mga kabalaka uban sa ilang mga ginikanan. Usa ka eksperto ang nag-ingon nga ang kakulang sa komunikasyon tali sa mga ginikanan ug kabataan makapahinabog “pag-uswag sa mga kabalaka ug mosangpot sa usa ka dili-malipayong bata.”
Dili Pagtagad sa Suga sa Trapiko
Sa Argentina, sumala sa mantalaan sa Buenos Aires nga Clarin, dihay 7,700 ka grabeng mga aksidente sa sakyanan sulod sa 1994. Kining maong mga aksidente nagpahinabog 13,505 ka tawo nga grabeng naangol ug 9,120 nga namatay. Usa ka pagtuon nga gihimo sa usa ka ahensiya sa gobyerno nagpadayag nga 90 porsiento sa tanang aksidente sa sakyanan gipahinabo sa paglapas sa drayber ug mga pedestriyan sa mga balaod sa trapiko. Ang labing subsob nga mga aksidente sa mga siyudad mao ang pagkamabanggaan sa kilid nga miresulta sa dili pagtagad sa pula nga suga sa trapiko. Si Eduardo Bertotti, usa ka opisyal sa gobyerno, nag-ingon nga bisan pag sa ubang mga nasod dili mosantop sa hunahuna ang dili pagtagad sa pula nga suga sa trapiko, sa Argentina “dili lang kay usa kini ka subsob nga hitabo apan may uban nga mapagarbohon pa ganing mobuhat niana.”
Kapintasan sa Tin-edyer
Sulod sa tulo ka sunodsunod nga mga tuig, ang Tinipong Bansa nakasinati ug nag-us-os nga gidaghanon sa gitahong grabeng mga krimen. Bisan pa niana, ang gidaghanon sa mga tin-edyer nga responsable sa mga krimen nagauswag, ilabina taliwala sa mga batan-on nga tali sa 14 ug 17 anyos ang edad. Ang pila ka eksperto mitagna nga ang mapintas nga krimen mouswag samtang modaghan ang mga tin-edyer. Usa ka eksperto, si James Alan Fox, sa College of Criminal Justice sa Northeastern University sa Boston, nag-ingon nga “ang gidaghanon sa mga batan-on sa Tinipong Bansa mousbaw pag-ayo sa mosunod nga pipila ka tuig, nga adunay 23 porsiento nga dugang mga tin-edyer sa tuig 2005,” nagtaho ang The New York Times. Si Fox nagpasidaan nga “gawas kon molihok kita karon, samtang ang atong kabataan batan-on pa ug humok nga matudloan, kita sa pagkatinuod aduna unyay hilabihang pag-ula sa dugo gumikan sa kapintasan sa mga tin-edyer inigkatuig 2005.”
Pagwagtang sa Epekto sa Bawtismo sa Patay
Di pa dugay ang mga Hudiyong nakalabang-buhi sa Holocaust nakurat sa pagkasayod nga pipila sa ilang mga paryente nabawtismohan ingong mga Mormon dugay na human sa ilang pagkamatay. Ang The New York Times nagtaho bahin sa maong binuhatan “diin ang mga patay gibawtismohan ingong mga Mormon sa buhing mga membro sa simbahan kinsa maoy mibarog nga kapuli nila.” Ang mga Mormon nakakuha sa mga ngalan sa mga 380,000 ka Hudiyo nga nangamatay sa mga kampo konsentrasyon o kinsa sa laing paagi nahimong mga biktima sa Holocaust. Unya, latas sa usa ka yugto sa panahon, ilang gibawtismohan sila diha sa mga seremonyas diin ang mga membro sa iglesya gituslob sa tubig ingong mga kapuli samtang ang mga ngalan sa mga nangamatay gibasa. Ang pipila ka Hudiyohanong mga organisasyon misupak niining paagiha. Ingong sangpotanan, ang mga lider sa Mormon miuyon sa pagtangtang gikan sa ilang listahan sa bawtismadong mga Mormon sa mga ngalan sa Hudiyong mga biktima sa Holocaust kang kinsa gihimo ang maong mga seremonyas.
Kapit-os sa Hong Kong
Usa ka bag-ong surbi diin 5,000 ka tawo gikan sa 16 ka lainlaing mga nasod ang giinterbiyo nagpadayag nga ang Hong Kong mao ang labing mapit-osong siyudad sa kalibotan, nagtaho ang The Medical Post. Alang sa daghan, ang kapit-os may kalabotan sa trabaho. Ang tigdukiduki nga si Dr. David Warburton, sa University of Reading sa Inglaterra, nag-ingon nga “mga 70% sa mga lalaki sa Hong Kong ug 64% [sa] kababayen-an nagreklamo ug kapit-os diha sa trabahoan, nga gitandi sa 54% sa katawhan sa tibuok kalibotan.” Mga 41 porsiento sa mga giinterbiyo nga taga-Hong Kong mibati nga ang ilang mga trabaho maoy makapuol sukwahi sa 14 porsiento sa ubang mga nasod. Ang Post midugang nga “usa sa lima ka tawo sa Hong Kong (gitandi sa menos sa usa sa 10 sa tibuok kalibotan) ang nag-ingon nga ang pagkawala-makauyon nila sa ilang mga amo mao ang pangunang katarongan sa kapit-os diha sa trabahoan.”
Gidudahan ang Elektrikal nga mga Kagamitan
Sumala sa FDA Consumer, nga usa ka magasin sa U.S. Food and Drug Administration, ang medikal nga mga kasangkapan mahimong maguba sa dihang maladlad sa elektromagnetikong kabaldahan, sama sa gikan sa usa ka duol nga cellular nga telepono. “Ang pila ka Uropanhong mga ospital nagdili na sa mga cellular nga telepono diha sa ilang mga tinukod, ug ang FDA nagdasig sa mga ospital sa Tinipong Bansa sa pagsunod sa maong aksiyon kon nahiangay,” matod sa magasin. Ang elektromagnetikong kabaldahan maoy gidudahan sa daghang aksidente diin ang magluwas-kinabuhi nga medikal nga mga kasangkapan sama sa mga pacemaker ug mga monitor sa apnea naguba. Ang FDA Consumer nagpasidaan: “Ang mga pasyente ug mga doktor nga kasagarang mogamit ug sensitibong medikal nga kahimanan kinahanglang makaamgo sa suliran ug maghunahuna nga ipalayo ang mga cellular nga telepono sa ilang kasangkapan.” Ang elektromagnetikong kabaldahan ikapahinabo usab sa wireless nga koneksiyon sa kompiyuter, microwave nga mga signal, mga transmitter sa radyo ug telebisyon, mga pager, ug ubang elektrikal nga mga kahimanan. Ang mga tigdukiduki nagtuki ug mga paagi sa pagpamenos sa maong hulga.
Ang Tumotumo sa Nawalang Koneksiyon
Ang mga ebolusyonista dugay nang nangitag ebidensiya sa fossil aron sa pagpamatuod sa teoriya nga ang tawo naggikan sa aliwas. Apan, ang mantalaan sa Paris nga Le Monde nag-ingon nga “ang mga teoriya bahin sa sinugdanan sa tawo nahimong huyang” sa pagkadiskobre didto sa Etiopia ug serye sa 90 ka bukog nga naghawas sa gituohan sa mga paleontologo nga mga bukog sa kalabera sa usa ka hamtong nga humanoid. Ang suliran, sumala sa mga paleontologo, mao nga ang bag-ong mga fossil dili mohaom sa bisan hain sa mga teoriya nga nagtinguha sa pagpakita sa koneksiyon tali sa mga tawo ug mga aliwas. Hinunoa, ang mga fossil nagpatunghag dugang mga pangutana kay sa ilang natubag. Ang pila ka tigdukiduki nanghinapos nga ang gitawag nga nawalang koneksiyon tali sa tawo ug aliwas mahimong “usa ka tumotumo lamang,” matod sa Le Monde.
Pornograpiya Diha sa Kompiyuter Matan-aw sa Kabataan
Samtang ang mga eskuylahan sa Australia mikonektar ngadto sa tibuok-kalibotang network sa impormasyon sa Internet, gikonektar usab nila ang matawag nga usa ka kapeligrohan sa moral. Sumala sa mantalaang The Sydney Morning Herald, mahimong makita nila ang “pornograpikong mga hulagway sa hubo nga mga bata, mga seksuwal nga pagpatuyang, mga bahin sa video gikan sa nakakonektar nga mga balay sa mga pampam, usa ka ‘talaan sa mga katungod’ alang sa katawhan nga buot makigsekso sa mga hayop—ug impormasyon bahin sa kon sa unsang paagi moduyog sa usa ka estoryahay ug mohimo sa masturbasyon.’” Ang artikulo midugang: “Ang mga kontra-senyas o pamatuod sa edad wala kinahanglana—usa lang ka ordinaryo nga dial-up nga koneksiyon.” Ang mga eksperto nag-ingon nga imposible ang pagsensor sa network “tungod kay ang katukoran niini gidesinyo . . . sa Defence Department sa T.B. nga dili maunsa sa usa ka nukleyar nga gubat.” Ang impormasyon dili hapsay nga pagkahimutang sa usa ka dapit apan makaplagan sa linibong pondohanag impormasyon sa tibuok kalibotan. Di pa dugay usa ka Swekong tigdukiduki nakaihap ug 5,651 ka mensahe o mga paskin mahitungod sa pornograpiya sa bata sa upat lang ka mga pundok sa tiggamit ug kompiyuter sulod sa usa ka semana.
Gihasol nga mga Pari
“Singkuwenta porsiento sa mga pari nga miduol kanako aron magpatambal gumikan sa nayabag nga kaisipan ang may mga suliran sa seksuwal nga matang,” matod ni Valerio Albisetti, usa sa labing iladong Katolikong Italyanong mga sikologo, sumala sa mantalaan nga La Repubblica. Labaw pa sa bisan unsa, ang seksuwal nga tinguha ug ang panginahanglan sa pagkaamahan mao ang mga butang nga naghasol niining mga tawhana, kansang obligasyon sa pagpabiling dili minyo di pa dugayng gisubli ni Juan Paulo II. Si Albisetti misugyot nga dasigon ang mga lalaki nga mosulod sa pagkapari diha sa mas hamtong nga edad ug patas-an ang edad alang sa mosulod sa seminaryo. Siya misugyot nga “makadaot kaayo sa mental nga kahimsog ug sikolohikanhong pagkatimbang sa umaabot nga pari” ang pagkinabuhi sa iyang pagkabatan-on “diha sa kahimtang nga walay babaye.” Gawas pa sa mga suliran nga nalangkit sa seksuwalidad, si Albisetti miingon nga “kasagaran ang mga pari nag-antos sa depresyon, sobrang pagsalimoang ug bulimia.”