Ang Una sa Mali

ANG akong bana nag-alagad ingong nagapanawng magtatan-aw sa mga Saksi ni Jehova sa Mali, usa ka diyutayg populasyon nga nasod sa kasadpang Aprika. Ang habagatang bahin niini gisakop sa Sahara Desert, ug ang dakong bahin sa nasod maoy bakilirong kabalilihan. Ang Mali mas dako sa Inglaterra, Pransiya, ug Espanya kon tiponon. Bisan tuod kining mga nasora adunay kapin sa 140 ka milyong mga molupyo, ang Mali adunay mga napulo ka milyong populasyon lamang​—duolan sa 150 niini maoy mga Saksi.

Ang among ulianan mao ang Ziguinchor, usa ka gamayng siyudad nga kasikbit sa Senegal. Niadtong Nobyembre 1994 milupad kami gikan didto paingon sa Dakar, dayon ngadto sa kaulohan sa Mali, ang Bamako, usa ka dakong siyudad nga may kapin sa tunga sa milyong mga molupyo. Gikan sa Bamako mibiyahe kami sakay sa taksi, bus, o tren ngadto sa mas gagmayng mga siyudad, sama sa Ségou, San, ug ang karaang siyudad sa Mopti. Moestar kami sa matag usa niining mga dapita sa hapit usa ka semana sa pagpakig-ambit sa Kristohanong ministeryo uban sa pipila ka mga Saksi didto.

Niadtong Disyembre mibalik kami sa Bamako aron pahimuslan ang distritong kombensiyon, nga may kinatas-ang tumatambong nga 273. Pagkadako sa among kalipay sa pagkakita sa 14 ka bag-ohan nga gibawtismohan! Sa adlaw human sa kombensiyon, migikan kami sakay sa bus paingon sa gamayng siyudad sa Sikasso, diin ang unang Kingdom Hall sa Mali nga gitukod sa mga Saksi ni Jehova gitakdang ipahinungod sa mosunod nga hinapos sa semana.

Usa ka Tinuod nga Hagit

Ang kongregasyon sa Sikasso adunay 13 lamang ka Saksi, 5 niini maoy mga payunir, o bug-os panahong mga ministro. Sa dihang miabot kami sa Lunes, naghinamhinam kami sa pagpaminaw sa ilang mga plano sa pagpahinungod. Gisultihan nila kami nga sila nagdepende sa akong bana, si Mike, sa paghikay niana! Busa human sa paghabwa sa among mga bagahe, miadto kami sa pagtan-aw sa Kingdom Hall. Sa pagkakita niana, kami nalipay nga ang maong tinukod natukod niining pipila lamang ka Saksi. Apan, daghan pa ang pagabuhaton. Wala pay mga kurtina, ang gawas wala pa kapintali, ug wala pay karatulang “Kingdom Hall of Jehovah’s Witnesses.”

Nahibaloan namo nga sulod sa pipila ka adlaw, labing menos 50 ka bisita ang moabot gikan sa Bamako sa pagtambong sa dedikasyon. Ang lokal nga mga tawo gidapit usab. Ang kongregasyon adunay usa lamang ka ansiano, si Pierre Sadio. Sa dihang gipangutana namo siya kon unsaon niya pagtapos ang tigomanan sa dili pa ang Sabado, ang adlaw sa pagpahinungod, miduol ang mga higala sa pagpamati sa iyang tubag. “Ako nagtuo nga si Jehova motabang kanato sa pagtapos niini sa hustong panahon,” siya mitubag.

Daghan pa kaayo ang taposonon nianang mubo lamang nga panahon! Nagpanuko ako sa pagpangutana kon makatabang ba ako sa paggamag mga kurtina. Usa ka dakong pahiyom sa kahupay ang makita diha sa mga nawong nga naglibot kanako. Dayon misugyot si Mike nga magpahimo kamig karatula alang sa atubangan sa tigomanan. Sa wala madugay kaming tanan nagdungan sa pagsulti. Ang tanan mahinamon kaayo. Usa gayod ka tinuod nga hagit ang pagtapos sa kataposang mga trabahoonon sa tigomanan sa hustong panahon!

Puliki nga Kalihokan

Kaming Kristohanong mga babaye nagdalidali sa pag-adto sa tiyanggihan aron makapilig materyal. Human niana nakakita kamig sastre nga motahi sa mga kurtina. “Ikaw adunay upat ka adlaw sa pagtapos niana,” gisultihan namo siya. Aron may ikadayandayan, si Mike miboluntaryo sa paghimog maanindot dinesinyohan nga linubid nga pisi nga bitayanag tanom sa atubangan sa tigomanan. Busa milakaw na usab kami, niining higayona sa pagpangitag pisi nga himoong bitayanag tanom ingon man usab sa pagpangitag masitera.

Gihimo usab ang mga kahikayan nga adunay usa nga motagana ug karatula sa Kingdom Hall. Sa sulod ug sa gawas sa tigomanan, dihay puliki nga kalihokan. Usa ka grupo sa mga silingan nagpundok sa pagtan-aw. Daghan kaayong buluhaton! Unsaon namo sa pagpakaon sa 50 ka bisita? Asa sila matulog? Nagdalidali kami sa tibuok semana sa pagpangandam, apan daw dili hapsay ang lakat.

Mibangon kami ug sayo sa Biyernes, ang adlaw una pa ang pagpahinungod. Ang palibot tugob sa paghinamhinam tungod sa mga bisita nga moabotay gikan sa Bamako. Sa pagkaudto miabot ang karatula sa Kingdom Hall. Sa gibuksan kini ni Mike, ang mga igsoon nanghupaw sa pagdayeg. Bisan ang usyosirong mga tumatan-aw nagtan-aw nga madayegon. Naghulat kami nga mahinamon samtang gitaod kini diha sa atubangan nga bungbong. Karon dayag nga dili kini usa ka ordinaryong tinukod lamang. Kini mao ang “Kingdom Hall of Jehovah’s Witnesses.”

Sa duol, sa balay sa usa ka payunir, ang igsoong mga babaye puliki sa pagluto. Usa ka dako, itom nga kawa nagbukal sa gilutong pagkaon. Mao pay pagkuha namo sa mga balde nga gigamit sa pagpintal ug sa mga silhig sa kilid sa tigomanan sa dihang may misinggit: “Ania na sila! Ania na sila!” Ang mga higala nanagan pagawas gikan sa tigomanan, ang uban gikan sa balay. Ang mga silingan nahibulong niining tanan. Ang mga igsoon nagluksolukso sa kalipay. Pagkamainitong pag-abiabi ang nadawat sa mga higala sa dihang nanganaog na sila sa bus! Gibati ko nga mapasigarbohon kaayo nga nahimong usa sa mga Saksi ni Jehova!

Gitan-aw nako ang mga bisita​—mga higala gikan sa lokal nga mga tribo ingon man gikan sa Burkina Faso ug Togo. Miabot usab ang mga Amerikano, mga Canadiano, mga Pranses, ug mga Aleman. Niadtong gabhiona kami dihay dakong kombira. Nagdaob kami aron mohayag ang lagwerta. Gibati nako nga samag naglusi sa akong kaugalingon sa pagseguro nga ako sa aktuwal nakapribilehiyo sa pagkahimong bahin sa okasyon. Samtang nagkalawom ang kagabhion, kami nagpanuko sa pagbiya paingon sa among tagsatagsa ka mga tulganan.

Ingon ka daghan sa 20 ang gipasaka sa usa ka balay. Ikaingon ko nga gilisdan gayod ang pipila. Nakita ko nga gidala sa usa ka lokal nga igsoong babaye ang Pranses nga bisita ngadto sa kasilyas sa gawas. Ang bisita maoy paryente sa usa sa mga misyonaryo, apan siya dili Saksi. Sa pagbalik nila, siya miingon: “Pobre kaayo kamo, apan kamo tinuod gayod nga mahigugmaon ug maluloton.” Gusto unta akong moingon: “Dili, sila dili pobre. Ang tanang katawhan ni Jehova adunahan!” Sa pagkatinuod, asa ka makakita ug nagkadaiyang grupo sa mga tawo nga nagkinabuhi diha sa pakigdait ug kalinaw?

Usa ka Makapatandog nga Pagpahinungod

Mubo lang ang gabii, ug miabot dayon ang adlaw sa pagpahinungod. Human sa tigom alang sa pag-alagad sa kanataran diha sa Kingdom Hall, ang mga Saksi migula ug nanapit sa mga tawo sa lungsod alang sa pagpahinungod. Ako nagpabilin sa paghikay sa mga bulak ug mga tanom. Ang lokal nga mga igsoong babaye puliki sa pagluto para sa gabii.

Sa kataposan, sa alas kuwatro, miabot na ang oras sa pagpahinungod. Ang gidaghanong 92 ang mitambong, bisan pa ang tigomanan luag pa. Malipayon kaayo ako nga lisod ang pagpirmi sa lingkoranan. Gihatag ni Pierre Sadio ang kasaysayan sa buluhaton sa Sikasso. Sa dihang siya giasayn dinhi, siya lamang ug iyang asawa ug ilang duha ka anak dinhi. Lisod kaayo ang kinabuhi, apan sa ulahi gipanalanginan ni Jehova ang ilang pag-alagad. Ang unang tawo nga nahimong Saksi sa Sikasso usa na karon ka espesyal payunir. Unya giasoy ni Pierre kon sa unsang paagi naarangan sa pipila ka Saksi ang pagtukod. Nagsuhol silag usa ka kantero, ug sa matag Dominggo ang tibuok kongregasyon nagtrabaho sa tibuok adlaw diha sa proyekto.

Karon giinterbiyo ni Mike ang mga higala nga nakatrabaho diha sa tigomanan. Nangutana siya sa tagsatagsa kanila kon sila ba naghunahuna nga moabot kining adlawa ug kon unsay ilang gibati sa dihang nakita nila ang Kingdom Hall nga puno sa mga tawo. Ang kadaghanan daw natuk-an nga sila halos dili makatapos sa ilang mga komento. Taliwala sa mga Saksi nga mitambong, milugmaw ang luha sa tanan.

Misunod ang pakigpulong sa pagpahinungod nga gihatag ni Ted Petras gikan sa sangang buhatan sa mga Saksi ni Jehova sa Senegal. Gihatag ang pag-ampo sa pagpahinungod, ug dugay kaayong natapos ang pagpamakpak sa mga igsoon. Human niadto gidapit ni Mike ang tanan nga mitabang sa pagtukod sa tigomanan nga moduol sa unahan. Didto sila nagbarog, mapahiyomon ang ilang mga nawong, ang mga luha midagayday sa ilang mga aping. Samtang giawit namo ang panapos nga awit, gibati nako ang tumang kalipay. Ang pagkahimong misyonaryo nagtugot kanako nga makabahin sa labing maanindot nga mga kasinatian. Dako gayod unta ang among masipyatan kon nagpabilin pa kami sa among pinuy-anan sa Tinipong Bansa.

Dugang Mainitong Panag-ubanay

Human sa pagpahinungod, gitagana ang mga pabugnaw. Ang mga igsoong babaye naglinya nga naglukdog dagkong mga plato sa sandiya. Gisundan sila sa duha ka igsoong lalaki, nga nagsul-ob ug mga kalo sa maestro kosinero alang sa okasyon ug nagdalag mga bandihado nga may mga keyk. Ang lagpad nga mga keyk mabulokong gidayandayanan ug mga hiniwang kahil ug limon. Ang tibuok nga okasyon malipayon kaayo.

Ang mga bisita namauli human sila silbihi. Dayon ang mga Saksi nangadto sa duol nga balay alang sa panihapon. Nanglingkod kaming tanan sa gawas ilalom sa takdol nga bulan, nagdilaab ang daob nga nagdan-ag sa lagwerta. Nalipay kaayo ako ug gikapoy sa mga buluhaton sa maong adlaw nga ako wala makahurot sa akong pagkaon. Gihatag nako ang nakaong-katunga nga paa sa manok sa usa ka gamayng batang babaye. Ang lokal nga mga payunir nagtan-aw sa among mga plato, ug kon adunay mabilin, ilang kan-on kini. Walay mabiling mga salin dinhi. Pinatuyangan kaayo kami sa Tinipong Bansa.

Samtang nagkatapos na ang among gabii, gipahinumdoman sa usa ka igsoon nga kadtong gikan sa Bamako agion sa bus sa alas 9:15 s.b. Sa pagkabuntag ang mga igsoon nanglingkod sa tibuok lagwerta, nga naghulat sa bus nga moabot. Unya giawit namo ang usa ka kataposang awit, “Salamat, Jehova.” Ang mga luha misugod sa pagdagayday, ug samtang kami talitapos na sa pag-awit, ang bus malantawan na. Ang tanang igsoong lalaki ug babaye nagginaksanay sa usag usa.

Kami nagbarog nga mibabay samtang ang bus hinayhinayng milarga. Ang tanan diha sa bus mibabay hangtod nga kini nawala sa panan-aw. Human niadto, kaming nabilin nagtinan-away sa usag usa. Kadto usa gayod ka maanindot nga dedikasyon ug usa ka maanindot nga semana.​—Tinampo.

[Hulagway sa panid 15]

Unang Kingdom Hall nga gitukod sa mga Saksi ni Jehova sa Mali

[Hulagway sa panid 16]

Kining malipayong grupo mibiyahe pinaagig bus