Gikan sa Among mga Magbabasa
Pagpaugmaugma Ang artikulong “Pagpaugmaugma—Ang Kawatan ug Panahon” (Abril 8, 1995) gisulat sa praktikal ug kataw-anang paagi. Samtang nagbasa ako niini, nagkatawa ako sa akong kaugalingon, sanglit duna koy lain nga batasan nga pagpaugmaugma.
F. B. H., Brazil
Tigpaugmaugma ako halos sa tibuok nakong kinabuhi, busa tukma sa panahon kining impormasyona alang kanako. Maayo kining pagkasulat, ug nagplano ako sa paggamit sa impormasyon aron makatabang kanako nga mahikay ug maayo ang akong panahon. Dugay na akong gustong magpadalag sulat sa pasalamat alang sa lainlaing mga artikulo ug wala gayod kini mahimo. Karon sa kataposan nahimo ra gayod nako kana!
M. H., Tinipong Bansa
Nagpaklipakli ako sa magasin sa dihang akong namatikdan ang artikulo. Gibasa nako ang pasiunang mga pulong, nga naghunahuna nga unya na lang nako tiwason pagbasa ang nahibilin sa artikulo. Apan ang pasiunang mga pulong nag-ingon: “Usa pa! Ayaw pag-ibutang kining artikuloha!” Naamgohan nako karon nga gitugotan nako ang akong kaugalingon nga makawatan ug panahon tungod sa pagpaugmaugma.
A. E., Italya
Usa ako ka sastre, ug ang pagpaugmaugma nahimo na nakong paagi sa kinabuhi. Dili nako ilista ang mga butang nga kinahanglang buhaton, nga ihulat kana sa hustong panahon, ug nagplano alang sa mga kakulian. Apan karon nakakat-on ako sa pagpadapat sa inyong mga sugyot, ug gipahimuslan na nako ang mga balos.
S. N., Nigeria
Kataposang mga Adlaw Ingong bug-os panahong ebanghelisador, buot nako kamong pasalamatan alang sa atong mga basahon. Sa nagbasa ako sa gipagula nga seryal sa mga artikulo niadtong Abril 22, 1995, nga isyu, “Mao Na ba Kini ang Kataposang mga Adlaw?,” nakaingon ako sa akong kaugalingon, ‘Pagkatin-aw, pagkaprangka, ug pagkamaayong pagkailustrar kining mga artikuloha!’ Ang nahikayng plano, nindot nga letrato, ug mga kapsiyon makatabang gayod sa pagkaamgo sa mga kamatuoran ug nagpasayon sa mga artikulo nga basahon ug sabton. Pagkamakapalipayng itanyag kining materyala ngadto sa among mga silingan!
J. B., Tinipong Bansa
Likoslikos Nabasa nako ang inyong artikulong “Likoslikos—Pagsagubang sa Kangutngot.” (Abril 22, 1995) Tulo ka adlaw sa ulahi may migula nga mga nukanuka sa akong panit nga kaamgid gayod sa kahubitan sa likoslikos sa inyong artikulo. Miadto ako sa doktor ug gisultihan siya nga basin duna akoy likoslikos. Tinuod man, iya akong giingnan nga “daghan ka kaayog nahibaloan”—husto ang akong pag-apas sa sakit! Sanglit naapas ang sakit sa wala pa kini mopigsang, siya miingon nga malikayan nako ang grabeng kangutngot nga maoy makuha sa kadaghanan sa mga pasyente sa likoslikos. Salamat sa inyong artikulo!
K. B., Tinipong Bansa
Matreshka Salamat kaninyo sa artikulong “Matreshka—Pagkatalagsaong Monyeka!” (Abril 22, 1995) Samtang ako kining gibasa, nakadayeg ako sa paagi sa pagkasulat niini. Ang mga letrato nindot! Nakagusto gayod ako niining monyekaa sukad sa bata pa ako, apan wala ako mahibalo bahin sa sinugdanan niini. Karon magpapalit gayod ako ug usa niini!
M. T., Italya
Aborsiyon Ang artikulong “Mga Batan-on Nangutana . . . Aborsiyon—Mao ba Kini ang Sulbad?” nakakuha sa akong pagtagad. (Marso 8, 1995) Sa miaging 24 ka tuig, sa dihang ako nagmabdos sa 15 anyos ang edad, naagian nako ang samang bul-og sa mga pagbati sa mga babaye nga gihisgotan sa artikulo. Gidasig ako sa amahan sa bata nga magpaaborsiyon, apan nakahukom ako nga ipanganak ko gayod ang akong anak. Ang akong pari gusto nga ihatag nako ang akong anak aron ipasagop. Sukad niadto wala na ako motaak pa sa Katolikong Simbahan! Hinunoa, ang akong mga ginikanan mapaluyohon. Misugod ako sa pagplano sa paghatag sa akong anak ug usa ka malig-on espirituwal nga pagmatuto. Sa dihang miduaw ang mga Saksi ni Jehova sa among balay, gidawat nako ang pagtuon sa Bibliya ug sa wala madugay nabawtismohan. Karon malipayon ako nga naminyo. Ug ang akong anak nga lalaki? Siya nag-alagad sa hedkuwarter sa mga Saksi ni Jehova. Mangurog ako sa paghunahuna bahin sa unang kapilian—aborsiyon. Dili kana ang sulbad!
G. J., Tinipong Bansa