Gikan sa Among mga Magbabasa

Pagkinabuhi sa Walay Kataposan Salamat sa seryeng “Nganong Mubo Kaayo ang Kinabuhi?​—Mausab pa Kaha Kini?” (Oktubre 22, 1995) Kining mga artikuloha wala lamang magtabang kanako nga mas pang makasabot sa palaaboton nga mahimong usa ka hingpit nga tawo sa usa ka paraisong yuta kondili nakatabang usab kanako sa klase sa siyensiya. Sa panahong gipatik kining mga artikuloha, may eksamin kami bahin sa selula​—ang mga bahin ug mga kalihokan niini. Pagkatin-aw ninyong pagkabatbat kana! Salamat sa maayong grado ug sa espirituwal nga pagkaon sa tukmang panahon.

B. M., Tinipong Bansa

Bildo Salamat sa artikulong “Bildo​—Ang Unang mga Magbubuhat Niini Nabuhi sa Kanhiayng Kapanahonan.” (Nobyembre 22, 1995) Ang akong papa nagtrabaho ginamit ang bildo, busa daghan kami niana sa among balay. Dili nako kapugngan ang pagsulti kon unsa ka tahom ang pagkasulat niining artikuloha. Wala akoy ideya kon unsa ka daghang nagkalainlaing mga kultura ang nalangkit sa paghimog bildo. Salamat pag-usab.

M. B., Tinipong Bansa

Kaparasan sa Hungaria Sulod sa daghang bulan nagtrabaho ako sa seksiyon sa mga bino sa usa ka dakong tindahan sa Luxembourg. Busa nainteres ako pag-ayo sa pagbasa sa artikulong “Kuyog Namo sa Kaparasan sa Hungaria!” (Septiyembre 8, 1995) Hinunoa, usa sa akong mga superbisor miingon nga bisan tuod tukma ang artikulo, daw inyong gipasabot nga ang agup-op nga motubo diha sa mga ubas (Botrytis cinerea) maoy samang agup-op nga motubo diha sa mga bodega sa bino. Siya miingon nga ang ulahing agup-op sa aktuwal gitawag ug Cladosporium cellare.

B. P., Pransiya

Husto ang imong superbisor, ug kami nagpasalamat kaniya tungod niining maong katin-awan.​—ED.

Higala sa Diyos Buot ko kamong sultihan nga natandog ako pag-ayo sa artikulong “Mga Batan-on Nangutana . . . Ang Pagkahimong Higala sa Diyos Makatabang ba Kanako?” (Nobyembre 22, 1995) Sa kadaghanang bahin niining tuiga, nagalakaw ako sa walog nga mangiob, uban sa depresyon nga nagdaot sa kon unsay nahibilin sa akong pagtahod-sa-kaugalingon. Wala gani akoy kusog sa pag-ampo o pagtuon sa Bibliya. Ang pagdasig nga gitanyag sa akong Kristohanong mga igsoon wala gayod makaapektar kanako. Sa dihang nagbasa sa artikulo, akong gibati ang unang bidlisiw sa adlaw human sa taas nga panahon.

S. K., Alemanya

Makapahupay ang pagkasayod kon unsa ka dako ang interes ug gugma ni Jehova alang sa mga batan-on. Sa akong mubong kinabuhi, akong nasinati ang paglugos, pag-abuso sa droga, pagkanakuhaan, ug emosyonal ug binaba nga pag-abuso. Kas-a misulay gani ako sa paghikog. Sa kataposan, hinunoa, misugod ako sa pagtambong pag-usab sa Kristohanong mga tigom. Uban sa pagkamalahutayon sa pag-ampo ug pinaagi sa pagduol kang Jehova sa makausa pa, ako nakabalik sa iyang organisasyon. Ang Pulong ni Jehova nagdala kanako ug dugang nga kalinaw sa hunahuna kay sa bisan unsang droga.

W. B., Tinipong Bansa

Indigay Ang artikulong “Ang Hunahuna sa Bibliya: Daotan ba ang Indigay sa mga Esport?” (Disyembre 8, 1995) nagtagana ug kahupayan sa akong diyes-anyos nga anak lalaki. Ang pipila ka gulanggulang nga mga batang lalaki nagdapit kaniya sa pagdula ug bola. Siya gisulogsulog pag-ayo nga siya naguol kaayo. Among gibasa ang artikulo ug nakakaplag ug kahupayan, nga nasayod nga ang mga Kristohanon kinahanglang maghupot ug timbang nga panglantaw sa mga esport ug nga ang mga esport kinahanglang makaparepresko, dili makapaguol. Ako naglaom nga ang tanan natong mga batan-on makabasa niining artikuloha tungod kay ang pipila ka esport nahimong mapintas kaayo.

S. H., Tinipong Bansa

Ang artikulo nakatabang gayod kanako sa paghimog desisyon maylabot sa pagkalangkit sa usa ka tem sa esport sa tunghaan. Ang mga kasulatan nga gipahayag diha sa artikulo maoy prangka kaayo. Ang pagkalangkit niining partikular nga tem maindigon unta kaayo, sanglit ang mga coach kasagarang mosulti kanimo nga modula pag-ayo ug modaog. Salamat sa makapalamdag nga artikulo, ug ako naglaom nga kana magtabang sa mga batan-on sa paghimog hustong desisyon.

L. M., Tinipong Bansa