Gikan sa Among mga Magbabasa
Kababayen-an sa India Nakaapresyar ako sa artikulong “Kababayen-an sa India—Nagapadulong sa Ika-21ng Siglo.” (Hulyo 22, 1995) Nakita ko kanunay ang India nga makaiikag, sanglit kini may kultura nga lahi kaayo sa akong kultura. Gipakita sa inyong artikulo nga ang tinuod nga kagawasan modangat sa kababayen-an sa India ubos lamang sa Gingharian sa Diyos. Ako nagpaabot sa panahon sa dihang ang tanang babaye tinuod nga pagahigugmaon ug pagamahalon sa mga bana nga ilang gitahod.
W. S., British Columbia
Gisalikway sa Pamilya Ako 14 anyos, ug ako nagsulat sa pagpasalamat kaninyo sa artikulong “Ang Pamilya nga Tinuod nga Nahigugma Kanako.” (Hulyo 22, 1995) Kini nagpalig-on gayod sa akong pagtuo. Si Udom Udoh maoy usa ka maayong panig-ingnan sa mga batan-on bisan diin. Gipakita gayod niya nga makabarog ka sa kamatuoran sa linghod pa kaayong edad.
A. M., Tinipong Bansa
Sama kang Udom, human nga misugod ako sa pagtuon sa Pulong sa Diyos, naatubang ko ang pagsupak. Gisultihan usab ako nga mobiya sa balay. Human sa daghang binaba ug pisikal nga paglutos, mibiya ako sa balay. Ako mapuangorong giatiman sa usa ka ansiano ug sa iyang asawa. Ang inyong artikulo nagpalig-on gayod kanako. Pagkadakong kalipay nga mahisakop niining talagsaon globonhong pamilya!
L. J., Tinipong Bansa
Pagkahimong Higala sa Diyos Salamat kaayo sa artikulong “Mga Batan-on Nangutana . . . Mahimo ba Gayod Akong Higala sa Diyos?” (Hulyo 22, 1995) Kini nakapahilak kanako. Ako 13 anyos ug nakahimog pipila ka daotan kaayong mga buhat. Ang uban naningkamot sa pagdasig kanako, apan nalisdan gihapon ako sa pag-ampo kang Jehova. Nagtuo ako nga wala na niya ako higugmaa tungod sa akong daghang kasaypanan. Kini nga artikulo nagpakita kanako nga ang Diyos mopasaylo ug nga ako makaampo kaniya.
J. D., Alemanya
Sama kang Doris, nga gikutlo sa artikulo, gibati ko nga dili takos nga mahimong higala sa Diyos. Gipasalamatan ko si Jehova sa pagtagana kanako niining tabanga. Nagtabang kini kanako nga makasabot nga kon ako maghinulsol sa akong daotang mga buhat, siya andam nga mopasaylo kanako ug mahimong akong Higala. Naglaom ako nga dili kamo mohunong sa pagpatik niining mga artikuloha alang sa mga batan-on.
B. M. A., Espanya
Menopos Nagdumala kami ug usa ka parmasiyutikal nga kompaniya nga nag-espesyalisar sa mga gynecologic medicine. Nakita namo ang artikulo bahin sa menopos nga nag-ulohang “Pagbaton ug Mas Maayong Pagsabot” (Pebrero 22, 1995) nga labing makaiikag, ug kami nalipay nga nagsulat kamo ug artikulo bahin sa ulohan. Apan, ang kahon nga “Unsa na man ang Terapiya nga Hulipan ang Estrogen?” nag-ingon nga ang “pagdugang ug progesterone ngadto sa pamaaging paghulip ug hormone . . . mosumpo sa maayong epekto sa estrogen diha sa sakit sa kasingkasing.” Dili kini tinuod sa tanang panahon, ilabina sa natural nga mga progestin.
Dr. T. W. ug J. K., Alemanya
Salamat sa inyong paghatag ug bag-ong impormasyon. Samtang ang mas daang mga tinubdan nagpakita nga ang mga progestin mahimong magpaus-os sa gidaghanon sa HDL, o “maayong” kolesterol, sa ingon magpauswag sa risgo sa sakit sa kasingkasing, lahi ang gipakita sa mas bag-ong panukiduki. Ang bag-ong pagtuon nga gitaho sa Enero 18, 1995, nga isyu sa “JAMA” miangkon nga ang “lunlon nga estrogen o duyogan ug progestin mopauswag [sa mga gidaghanon sa “maayong” kolesterol].” Walay duhaduha nga dugang panukiduki ang kinahanglang pagahimoon una pa bug-os masabtan ang malungtarong mga epekto sa mga pagtambal pinaagig hormone.—ED.
Ebolusyon Mao pay pagkatapos nako sa pagbasa sa seryal nga “Ang Teoriya nga Nakapakurat sa Kalibotan—Unsay Kabilin Niini?” (Agosto 8, 1995) Ang akong reaksiyon? Labaw pa sa pagdayeg. Nahupngan pa! Ang artikulo gisulat nga mabulokon kaayo, matukion kaayo. Ang matag pagkutlo nagbutyag sa dakong panukiduki. Labaw sa tanan, kadto nakahatag ug kahayag sa tinuod nga epekto sa pagtulon-ang ebolusyon diha sa hunahuna sa tawo. Wala gayod akoy ideya bahin niana! Adunay kagutom sa kalibotan alang sa dekalidad nga pagbasa, apan inyong natubag ang hagit.
R. H., Tinipong Bansa