Gikan sa Among mga Magbabasa

Mga Asembliya sa mga Saksi Salamat sa kasinatian nga nag-ulohang “Usa ka Adlaw nga Nakausab sa Iyang Kinabuhi.” (Marso 22, 1995) Ang kasinatian sa usa ka batan-ong babaye kansang iyaan nagdapit kaniya sa usa ka espesyal nga adlawng asembliya sa mga Saksi ni Jehova nagpahinumdom kanako nga ang samang butang nahitabo kanako. Mitambong ako sa akong unang asembliya sa ting-init sa 1985, human dapita sa akong magulang nga lalaki. Ang akong kawalay-pagsalig sa sinugdan sa wala madugay napulihan sa usa ka pagbati sa kadasig; akong gibati nga daw didto ako sa taliwala sa usa ka dakong pamilya. Mihukom ako sa pagpadayon sa pagtuon sa Bibliya, ug karon ako usa na ka regular payunir, usa ka bug-os-panahong magwawali.

E. F., Italya

Utang Salamat sa inyong artikulong “Mapuslanon ba ang Pagpangutang?” (Hunyo 8, 1995) Ako 13 anyos lamang, apan wala nako ayoha paggasto ang akong salapi. Sa akong hunahuna kining artikuloha makatabang ug dako kanako.

C. A., Tinipong Bansa

Pagkaulipon Ingong usa ka Aprikana-Amerikana, akong giapresyar pag-ayo ang Hunyo 8, 1995, nga serye sa mga artikulong “Ang mga Talikala ug mga Luha sa Pagkaulipon.” Ang letrato sa hapin nagpalugmaw sa mga luha sa akong mga mata. Natandog ako nga kamo may kaisog sa paghisgot niining makauulawng makasaysayanhong mga panghitabo. Ang artikulo gipresentar nga mabination kaayo ug tugob sa impormasyon.

B. M., Tinipong Bansa

Ang artikulo miabot sa tukmang panahon sanglit naghisgot kami sa maong ulohan sa klase sa kasaysayan. Gigamit nako ang artikulo sa pagkompleto sa pipila ka kapiliang homwork, ug nakadawat ako ug maayong mga grado. Naluoy usab kaayo ako sa mga ulipon.

M. C., Alemanya

Estorya sa Kinabuhi “Ang Akong Malamposong Pagpangita sa Kahulogan sa Kinabuhi” (Mayo 22, 1995) maoy makapatandog kaayong artikulo. Ang sugilanon ni Harold Dies nakatabang kanako sa paghukom kon kaha mosulod sa bug-os-panahong ministeryo. Nakahigayon usab ako sa pagduaw sa Bethel, ang tibuok-kalibotang hedkuwarter sa mga Saksi ni Jehova sa Brooklyn, New York, ug ako nahingangha pag-ayo. Wala nay pagduhaduha mahitungod sa akong pagsulod sa bug-os-panahong ministeryo karon!

A. C., Tinipong Bansa

Magpasaylo ug Kalimti Salamat sa ekselenteng artikulong “Ang Hunahuna sa Bibliya: Magpasaylo ug Kalimti​—Sa Unsang Paagi Posible?” (Hunyo 8, 1995) Nahibulong ako kaniadto kon ang Bibliya nagkinahanglan ba ug usa ka butang nga imposible gikan sa dili-hingpit nga mga tawo. Apan karon ako nakasabot kon unsay kahulogan sa pagpasaylo ug pagkalimot. Ang artikulo nakadugang sa akong kombiksiyon nga ang mga sugo ni Jehova dili mabug-at.

C. I. C., Nigeria

Kinahanglan gayod akong mosulat ug pahibaloon kamo kon unsa ka dako ang akong apresasyon sa maong artikulo. Sa bata pa, ako giamong-amongan sa akong duha ka uyoan. Sa ulahi, ako giabusohan ug gimaltratar ingong usa ka asawa. Sa pagkahimong Kristohanon, gisulayan nako sa pagpakitag gugma ug magmapinasayloon. Bisan pa niana, sa pagkamatinud-anon wala gayod ako makaingon nga akong napasaylo kining tulo ka tawo nga nagpahinabo kanakog dulot nga kasakitan sulod sa daghang tuig. Akong naamgohan karon nga adunay pipila ka butang nga angayng itugyan sa mga kamot ni Jehova, ug ako makapadayon sa akong pagkinabuhi. Ang Pinadayag 21:4 nagpasalig kanako nga kining dulot nga kasakit nga nakaapektar kanako mahanaw sa dili madugay.

A. B., Tinipong Bansa

Bag-o pa nakong nabasa ang artikulo, ug wala pa ako sukad mobating mas suod kang Jehova nga Diyos kay sa gibati gayod nako niining yugtoa. Di pa dugay nalangkit ako sa usa ka seryosong sala nga niana nangayo ako sa tabang sa mga ansiano sa kongregasyon. Bisan tuod nakadawat ako ug maluluton, mahigugmaong tambag gikan kanila, nagpanuko gihapon ako sa pagduol kang Jehova diha sa pag-ampo. Kining artikuloha naghatag kanakog mas tin-awng pagsabot nga gikinahanglan ko gayod pag-ayo bahin sa kon sa unsang paagi ang atong langitnong Amahan magpasaylo ug malimot. Nakatabang kini kanako sa pagduol kaniya nga may kagawasan diha sa kinasingkasing nga pag-ampo​—usa ka pribilehiyo nga binuang nakong ginalikayan. Salamat kang Jehova tungod sa paghatag kanako sa akong “pagkaon sa hustong panahon.”​—Mateo 24:45.

D. J. S., Tinipong Bansa