Gitugotan Kami sa Diyos nga Makaplagan Siya

SA DIHANG andam na si Haring David sa pagtugyan sa pagkahari ngadto sa iyang anak nga si Solomon, siya naghatag kaniya niining tambaga: “Ilha ang Diyos sa imong amahan ug alagara siya sa bug-os nga kasingkasing ug sa malipayong kalag; kay si Jehova nagasusi sa tanang kasingkasing, ug makasabot siya sa tanang kiling sa mga hunahuna. Kon pangitaon mo siya, tugotan ka niya nga makaplagan mo siya; apan kon biyaan mo siya, isalikway ka niya sa walay kataposan.”​—1 Cronicas 28:9.

Nakaplagan namo nga tinuod kini sa among kahimtang. Among gipangita ang Diyos, ug nakaplagan gayod namo siya​—apan human lamang nasaag sa daghang sayop nga mga agianan. Nagtuo kami nga si Jehova nakasabot kon unsa ka kusganon ang kiling sa among mga hunahuna nga nasentro kaniya ug sa iyang pag-alagad, ug gitugotan niya ang iyang kaugalingon nga among makaplagan. Ania ang asoy kon sa unsang paagi kini nahitabo.

Upat kami ka magsoon, nga nagdako sa Florida, T.B.A. Ang among amahan nagtrabaho sa tagdugayng mga oras ingong usa ka kosinero sa pagsuportar sa pamilya, si Mama nagtrabaho sa balay, ug kaming upat nga lalaki nakakitag trabaho sa pagpamutol ug sagbot, paghatod ug mga mantalaan​—bisan unsa nga makadugang sa kita sa pamilya. Katoliko si Mama, ug Baptist si Papa. Kaming tanan nagtuo sa Diyos ug sa Bibliya apan walay gibuhat bahin niana, ug panagsa ra kaming mosimba. Sa unang mga tuig sa 1970, sa dihang ang kalinaw, maong nga mga karsones nga bell-bottom, tag-as nga buhok, ug musikang rock popular kaayo. Kining tanan nakaimpluwensiya sa among mga kinabuhi.

Niadto lamang 1982 nga ang duha kanamo, si Scott ug Steve​—24 ug 17 anyos ang tagsatagsa​—nagpakitag dakong interes sa Bibliya ug nakabatog nagtubong kabalaka bahin sa nagkagrabeng mga kahimtang sa kalibotan. Si Scott adunay iyang kaugalingong negosyo nga konstruksiyon. Dako kinig kita, busa mibalhin kaming duha sa usa ka apartment. Gipul-an na kami sa mao ra gihapong talan-awon sa bar ug nianang paagiha sa kinabuhi ug nahibalo nga aduna gayoy mas maanindot ug maayong paagi sa kinabuhi sa laing dapit. Misugod kami sa pagbatig kagutom sa espirituwal nga mga butang. Ang regular nga pagbasa sa among Bibliya nakatabang kanamo sa pagtinguhag labaw pang kahibalo ug pagsabot sa Pulong sa Diyos.

Misugod kami sa pag-adto sa nagkalainlaing mga simbahan matag Dominggo. Sa usa niini nga among giadtoan duol sa among balay sa Lake Worth, Florida, ang 25 minutos sa sermon sa Dominggo maoy bahin sa paghatag ug salapi. “Paghatag nga madinagayaon, madinagayaon gayod,” miingon ang ministro samtang midip-ig siya sa atril. Sagad ipasa nila ang mga plato sa kuwarta tulo ka beses sa usa ka miting, nga misangpot nga daghan ang namauli nga wala nay sulod ang ilang mga bulsa. Nangadto kami sa daghang simbahan, apan nakakaplag lamang kami ug daghan pang mga plato sa koleksiyon nga ginapasa ug sosyal nga mga panagtipon.

Gipasidan-an Bahin sa mga Saksi ni Jehova

Kami nadoktrinahan sa gituohan namong pangunang mga pagtulon-an sa Bibliya, ug gidawat namo kini sanglit ang mga magtutudlo maoy mga propesyonal nga mga teologo. Ang usa sa mga klase maoy bahin sa mga kulto sa Amerika, ug ang nanguna sa listahan mao ang mga Saksi ni Jehova. Gipasidan-an kami nga sila dili motuo kang Jesus, nga sila adunay kaugalingon nilang Bibliya, nga sila dili moadto sa langit, ug nga nagtuo sila nga walay impiyerno. Siyempre, kining tanan miagak kanamo sa paghinapos nga sayop ang mga Saksi.

Niining tungora madasigon kaayo kami apan dili sumala sa tukmang kahibalo. (Roma 10:2) Nahibalo kami sa giingon ni Jesus sa Mateo 28:​19, 20​—nga kinahanglang isangyaw namo ang maayong balita ug maghimog mga tinun-an. Niadtong panahona kami tigtambongan sa simbahan nga may 2,000 ka membro nga gitawag ug Bible Town, diin kami maoy bahin sa grupo sa mga batan-on nga duolan sa 100 tali sa mga edad 17 ug 30. Misulay si Scott sa pag-awhag kanila sa paghimog pipila ka porma sa pagsangyaw​—apan sa walay kapuslanan.

Busa nagsugod kamig among kaugalingong kampanya sa pagsangyaw. Nakaideya si Scott sa pagbutang ug lamesa-lamesa diha sa lokal nga tiyanggihan ug manghatag sa mga tract ug mga Bibliya. Busa mao kanay among gihimo. Miadto kami sa usa ka lokal nga “Kristohanong” baligyaanag libro ug namalit ug daghang suplay sa mga tract ug mga Bibliya, miadto sa tiyanggihan, nagbutang ug duha ka tungtonganan, gipatongan kinig usa ka pligong playwod, gibutang ang among mga tract ug mga Bibliya diha niana, ug naningkamot nga mahimong “magbubuhat sa pulong, ug dili tigpaminaw lamang.”​—Santiago 1:22.

Sa milabay ang matag semana, midako ang gitawag nga mga ministeryo sa tiyanggihan, nga nagtanyag ug literaturang Ingles ug Kinatsila. Lain pa, kami may mga Bibliya, 30 ka nagkalainlaing tract, ug mga alpiler pa alang sa kalo nga nag-ingong “Gimahal ka sa Diyos.” Wala magdugay sa ulahi, si Scott mipalit ug decal machine sa pag-imprintag gagmayng mga mensahe sa Bibliya diha sa mga T-shirt​—mga panultihon nga sama sa: “Gibasa ba nimo ang imong Bibliya karong adlawa?,” “Nahibulong ka ba kon nganong nagpahiyom ako? Ania si Jesus sa akong kasingkasing,” ug daghan pa. Ang usa nag-ingong “Pinadayag” nga may hulagway sa upat ka mangangabayo.

Abi namo nga sa pagsul-ob sa mga T-shirt bisan asa, nakahatag kamig hilom nga pagpamatuod. Sa matag Sabado ug Dominggo, gikan sa alas 8 s.b. ngadto sa ala 1 s.h., makita ang ebidensiya sa among mga pagministeryo sa tiyanggihan. Kon naglakaw ka sa parkinganan ug nakakitag mga tract sa mga kotse​—aw, kami ang nagbutang niana. Ang tanang literatura maoy pinaagig donasyon lamang, apan diyutay ra kaayong kuwarta ang madawat nga donasyon. Usa ka tuig gisuma namo ang nagasto sa maong tuig, ug miabot kinig kapin sa $10,000.

Nahimamat Namo ang Usa sa mga Saksi ni Jehova

Usa ka higayon, samtang naligo kami sa usa sa mga baybayon sa Bonita Springs, giduol kami sa usa ka edarang lalaki ug mikomento nga iyang nakita ang mga estiker sa bamper sa among trak ug nakamatikod sa among mga T-shirt. Misugod siya sa pagpakighisgot bahin sa Bibliya ug nangatarongan gikan sa Kasulatan. Gipatin-aw niya ang kahulogan sa Buhat 2:​31, nga nangutana: “Kon adunay nagdilaab nga impiyerno ug kon daotang mga tawo lamang ang moadto didto, nan nganong ang Bibliya nag-ingon nga nakadangat si Jesus didto?” Siya nagpadayon, nga naghisgot ug daghan pang ubang mga teksto. Sa kataposan, si Scott nangutana: “Usa tingali ikaw sa mga Saksi ni Jehova.” Siya mitubag: “Oo, usa ako.” Dayon si Scott miingon: “Dili kamo motuo kang Jesus.” Sa misunod nga 20 minutos, ang Saksi naghisgot bahin kang Jesus, apan wala kami maikag niini.

Nagpadayon kami sa mga pagministeryo sa tiyanggihan sa mga hinapos sa semana. Gihimo namo kini sulod sa tulo ka tuig​—nga sa tanang panahon nagtuo nga nabatonan namo ang kamatuoran ug gibuhat ang hustong butang. Tigsimba gihapon kami, nga lainlain sa matag Dominggo sa gabii, ug wala gayod matagbaw sa bisan hain niini nga among gitambongan. Nahutdan na kami ug simbahan nga kaadtoan, busa usa ka gabii mihukom kami sa pag-adto sa usa sa “mga simbahan sa mga Saksi ni Jehova,” ingon sa among pagtawag niana. Sangyawan namo sila mahitungod kang Jesus. Among nakita ang adres diha sa direktoryo sa telepono ug miadto didto sa usa ka gabii sa Dominggo. Sa pagkasayod nga sila walay miting sa gabii sa Dominggo sama sa ubang mga simbahan, mihinapos kami nga sila gayod wala magtuo kang Jesus. Nakita namo ang Lunes sa gabii nga pagtuon sa libro diha sa karatula nga nagpakita sa mga oras sa miting. Busa mibalik kami nga nagdala sa among mga Bibliya ug nagsul-ob sa among mga T-shirt. Nahinumdom kami nga migugol ug pipila ka minutos sa pagpili kon unsa nga T-shirt ang among isul-ob​—hain ang mohatag ug maayong pamatuod. Nakaabot kami didto nga sayosayo, ug giduol kami sa pipila ka igsoon. Sila mainiton ug mahigalaon. Dihadiha kami dihay lalom nga panaghisgot bahin sa Pinadayag. Mihangyo sila kanamo nga magpabilin alang sa miting. Gitunolan nila kamig librong Nahiusa sa Pagsimba, busa kami nanglingkod.a Gibuksan sa usa ka igsoon ang pagtuon pinaagi sa pag-ampo.

Namati kami pag-ayo. Sa pagtapos, siya miingon: “Sa ngalan ni Jesus. Amen.” Nagtinan-away kami sa usag usa sa kakurat. “Husto ba ang atong nadungog? Siya nag-ampo sa ngalan ni Jesus!” Niadtong tungora ingon sa daw ang among mga mata nabuksan ug nangatagak ang bagang mga himbis. Kon matarong ang among mga kasingkasing, kini mao ang panahon sa pagpamati. Gihangyo kami sa igsoon sa pagpakli sa kapitulo 21 sa librong Nahiusa sa Pagsimba, nga maoy bahin kang Jesus ug sa pagkadili bahin sa kalibotan. Maayo gayod kaayong pagtuon nga patalinghogan. Kadto maoy bahin sa kinabuhi ug ministeryo ni Jesus, sa kataposang mga adlaw, ug sa neyutralidad. Nadungog namo ang mga bata nga nagkomento sa daghang punto nga wala gayod kami mahibalo. Unya lain pa, sa pagtapos sa miting, ang igsoon nag-ampo sa ngalan ni Jesus!

Gipakaon Kami sa Espirituwal

Misulod kami sa tigomanan nga gigutom sa kamatuoran, ug didto ang kamatuoran, nga dili gayod halayo. Mibiya kami nga nahibalo nga kami napakaon sa espirituwal, ug wala na gayod kami misulod ug simbahan pag-usab. Sa pagkasunod gabii, samtang nanglaba sa Laundromat, among namatikdan ang usa ka dakong tapok sa mga magasing Bantayanang Torre ug Pagmata! diha sa soda machine​—labing menos 150 ka buok. Wala gayod kami mobasa niini sukad, apan karon gibangan namo kini, kay interesado sa daghang ulohan.

Usa sa mga artikulo nangutana, “Nagtuo ka ba sa Trinidad?” Ang lain, “Aduna ba gayoy impiyerno?” Sa Pagmata! may artikulo bahin sa mga imahen. Niadtong gabhiona gibasa ni Steve ang bahin sa Trinidad, mihimog daghang panukiduki, gitan-aw ang tanang teksto, ug gipukaw si Scott sa alas 12:30 s.b. tungod sa iyang nakat-onan. Sa pagkasunod adlaw, Miyerkoles, human sa trabaho, gibasa ni Steve ang artikulo bahin sa impiyerno. Kini nangatarongan sa Juan 11:​11, diin si Jesus miingon nga natulog si Lazaro. Sa nakita ni Steve si Scott, siya miingon: “Ang akong Bibliya wala magtudlo nga adunay nagdilaab nga impiyerno.” Human mabasa ang Pagmata! bahin sa mga imahen ug sa nagkalainlaing mga porma sa krus, among gilabay ang amoa sa trak sa basura ug nagtan-aw samtang gidala kini palayo. Nagtinan-away kami sa usag usa, nagyangoyango ang among mga ulo, ug mipahiyom. Nasayod kami nga nakaplagan namo ang butang nga linain kaayo​—ang kamatuoran.

Sa milabay ang usa ka adlaw duha ka kahon ang miabot. Diha niana mao ang 5,000 ka tract nga nag-ingong kon wala ka maghinulsol, mahiadto ka sa impiyerno. Nahibalo na kami nga daghan niini nga mga tract sayop sumala sa pagtulon-an sa Bibliya. Naglibog ug diyutay, mitambong kami pag-usab sa pagtuon sa libro sa gabii sa Lunes ug nagdalag daghan sa among mga tract. Nangutana kami, “Kini OK ba?” Usa ka gabii gisusi namo kining tanan. Wala magdugay anaa na sa salog ang kamada sa mga tract; walay usa niini ang napamatud-an nga nahiuyon sa pagtulon-an sa Bibliya. Gidispatsar namo kining tanan. Nahibalo kami nga ang among bag-ong nakaplagang pagtuo nagkahulogan sa among kinabuhi ug sa mga kinabuhi niadtong among pagasangyawan. Buot kami nga makasugod sa pagtuon sa Bibliya nga walay bisan unsang kababagan.

Mibalhin kami sa Alaska. Sa among unang miting didto, mihangyo kami sa usa ka ansiano kon mahimo bang tun-an kami kada adlaw. Nagtuo ako nga nakadungog ang tanang nanambong kanamo. Nakahimo kamig maayong pag-uswag, natapos ang librong Mabuhing Walay Kataposan, ug buot nga magpabawtismo sa usa sa duha ka adlaw nga mga asembliya.* Apan naghulat pa kami makadiyot. Ang among tumong mao ang pagpayunir. Wala damha, ang among amahan nagkasakit, ug kami mibalik sa Florida aron makatabang.

Kami Miuswag sa Espirituwal nga Pagkahamtong

Sa Florida nakahimo kamig maayong pag-uswag, natapos ang librong Nahiusa sa Pagsimba, ug dayon nagpabawtismo niadtong 1987. Onse na ka bulan sukad sa among pagsugod. Dihadiha kami nahimong oksilyare nga mga payunir sulod sa unom ka bulan ug dayon regular nga mga payunir. Usa ka tuig ug tunga lamang sa ulahi, gitudlo kaming duha nga mga ministeryal nga alagad. Duha ka tuig human sa bawtismo, kaming duha nag-alagad na sa Brooklyn Bethel, diin si Scott nag-alagad gihapon hangtod karon ug nagtuon ug Ininsek sulod na sa duha ka tuig. Si Steve nag-alagad na karon sa Moscow, Rusya, ingong regular payunir. Nakaplagan namong duha ang kamatuoran ug ang pagpangita niana sama gayod sa gihubit sa Proverbio 2:​1-5: “Anak ko, kon dawaton mo ang akong mga pulong ug tigomon ang akong mga sugo diha kanimo, aron nga ikiling ang imong igdulongog sa kaalam, aron bansayon mo ang imong kasingkasing sa pagsabot; kon, dugang pa, ikaw magasangpit sa salabotan mismo ug magasangpit sa pagsabot mismo, kon ikaw padayong mangita niini ingon nga salapi, ug padayong magapangita niini ingong tinipigang mga bahandi, unya ikaw makasabot sa pagkahadlok kang Jehova, ug ikaw makakaplag sa mismong kahibalo sa Diyos.”

Kon sa Unsang Paagi si Steve Nakaabot sa Moscow

Nagpuyo sa New York, diin ang pagkahibalo ug laing pinulongan maghimo sa buluhatong pagsangyaw nga mas makaiikag​—ug naghunahuna nga tingali buksan ni Jehova ang pultahan sa Rusya sa dili madugay​—ako mihukom sa pagtuon sa pinulongang Ruso. Niadtong panahona, samtang nag-alagad sa Brooklyn Bethel, misugod ako sa pagtambong sa pagtuon sa libro sa Ruso nga pinulongan. Usa lamang ka grupo sa pagtuon sa libro sa Ruso nga pinulongan ang nagtigom sa Biyernes. Sa milabay ang panahon, misugod ako sa dugang nga pagkaokupado sa Ruso nga grupo. Miduyog ako kanila sa buluhatong pagsangyaw, nga makalingaw kaayo tungod sa kainit sa mga Ruso. Misulat ako sa Service Department nga ibalhin sa Ruso nga grupo. Nalipay ako sa dihang misugot sila niini.

Sa usa ka adlaw sa pagsimba sa Bethel sa buntag, ang presidente sa Watch Tower Bible and Tract Society, si Milton G. Henschel, nagsulti sa pamilya nga adunay usa ka linaing taho. Dayon gipahibalo niya nga ang mga Saksi ni Jehova legal na nga giila sa Rusya ug nga matagamtam na sa atong mga igsoon karon ang kagawasan sa pagsimba. Wala ako magtuo nga may usa sa Bethel niadtong buntaga ang makalimot sa kalipay nga gibati namo sa pagkadungog sa maong kahibulongang balita. Naghunahuna ako niadtong gutloa nga usa ka dakong pribilehiyo nga mahimong bahin nianang dakong bag-ong teritoryo.

Misugod ako sa pagpakigsulat sa usa ka igsoong Ruso nga ginganlag Volodeya, nga nagpuyo sa Krasnodar, Rusya. Gidapit niya ako sa pagduaw sa Rusya. Busa niadtong Hunyo 1992, giempake nako ang akong mga bag ug mipaingon sa Moscow. Sa pag-abot, nalipay kaayo ako sa pagkakita ni Brader Volodeya nga naghulat sa tugpahanan sa ayroplano. Mipuyo ako uban kang Brader Stephan Levinski​—45 na ka tuig sa kamatuoran. Siya ang unang Saksi nga akong nahimamat sa Moscow, ug nakagugol siya ug daghang tuig sa bilanggoan tungod sa iyang pagbarog sa kamatuoran. Ang pagkamaabiabihon sa mga igsoon talagsaon gayod kaayo.

Busa didto ako sa Moscow, nga wala kaayoy nahibaloan bahin sa pinulongan. Niadtong panahona, upat pa lamang ang kongregasyon, ug daw kaila namo ang tanang igsoon. Sukad niadto, sa nagkalainlaing paagi, nakahimo ako sa pagpalugway sa akong mga visa. Nakatrabaho ako matag karon ug unya aron matagan-an ang akong mga galastohan. Ang akong dakong problema mao ang pagtuon sa pinulongang Ruso aron makakomunikar ug makakaon sa espirituwal diha sa mga tigom. Hinayhinay nga miabot kini, ug siyempre, nagtuon gihapon ako niana.

Nakapribilehiyo ako sa pagtambong sa daghang kombensiyon ug nakasaksi sa kahibulongang pag-uswag ug sa hilabihan ka daghan nga nagpabawtismo. Ang pagkakita sa putli nga kasibot sa atong mga igsoon dinhi maoy kasinatian nga makapalig-on kaayo sa pagtuo. Dili ko kini ibaylo sa bisan unsa. Daghan sa mga igsoong lalaki ug babaye nga nakaila nako sa akong pag-abot nagtuon pa o bag-o pang gibawtismohan nga karon nag-alagad na sa bug-os panahon ingong mga payunir o ministeryal nga mga alagad, o ingong mga Bethelite sa Solnechnoye, duol sa St. Petersburg, Rusya.

Ang kongregasyon nga akong gitambongan punog 530 kada Dominggo, ug matag bulan kami nag-aberids ug 12 ka bag-ong di-bawtismadong magmamantala. Ang kataposang ihap maoy 380 ka magmamantala, 3 ka ansiano, ug 7 ka ministeryal nga alagad. Ang among kongregasyon nagtahog kapin sa 486 ka pagtuon sa Bibliya. Niadtong Pebrero 1995, ako nakapribilehiyo sa pagduaw sa among 29 ka pagtuon sa libro sa paghatag ug pakigpulong sa pag-alagad. Ako nagduaw ug upat ka grupo kada semana. Puliki usab kaayo kami sa dili pa ang matag kombensiyon sa pagrepaso sa mga pangutana sa mga kandidato sa bawtismo. Niadtong Mayo 1995, kami dihay espesyal nga adlaw sa asembliya diin 30 ang nabawtismohan gikan sa among kongregasyon. Tanantanan, dihay 607 ang gibawtismohan sa duolan sa 10,000 ka tumatambong. Sa distritong kombensiyon sa ting-init, 24 gikan sa among kongregasyon ang lakip sa 877 ka nabawtismohan! Kami adunay 13 ka regular payunir sa among kongregasyon ug 3 ka espesyal payunir. Tanantanan ang mga payunir nagreport ug 110 ka pagtuon sa Bibliya! Sa pagkakaron, kami adunay 132 ka di-bawtismadong magmamantala.

Sa among Memoryal sa 1995, kami dihay 1,012 ka tumatambong! Ang Sosyedad bag-o pang nagpadalag usa ka Polakong igsoon, si Mateysh, sa among kongregasyon. Graduwado siya sa Tunghaan sa Ministeryal nga Pagbansay ug dako unyang tabang. Kami karon adunay tulo ka ansiano. Busa ang dugang kongregasyon pagatukoron, ug ang among teritoryo​—nga hapit usa ka milyon ang populasyon​—bahinon sa duha. Ang matag usa sa duha ka kongregasyon adunay mga 200 ka magmamantala. Ang usa ka kongregasyon adunay duha ka ansiano, ug ang lain usa ka ansiano. Kami adunay laing umaabot nga asembliya, busa nagkamulo na kami sa pagrepaso sa mga pangutana sa 44 nga andam nang magpabawtismo nianang panahona. Daw di-katuohan nga pamation! Usa gayod ka espirituwal nga paraiso! Katingalahan kaayo kini! Naglihok gayod ang kamot ni Jehova. Ang iyang karwahe daw kusog nga nagdagan sa tibuok Rusya niining panahona. Hangtod sa Oktubre 1995, aduna nay mga 40 ka kongregasyon sa Moscow. Modoble unta dayon kini kon aduna pay igong mga ansiano.

Ang mga adlaw sa among mga ministeryo sa tiyanggihan dugay nang miagi. Si Scott atua sa Brooklyn Bethel, si Steve nag-alagad ingong ansiano sa usa sa mga kongregasyon sa Moscow​—kaming duha mapasalamaton kaayo sa Diyos nga nagtugot sa iyang kaugalingon nga among makaplagan. Kami nag-ampo nga unta minilyon pa ang mangita kaniya ug nga itugot sa Diyos ang iyang kaugalingon nga ilang makaplagan.​—Sumala sa giasoy ni Scott ug Steve Davis.

[Footnote]

[Hulagway sa panid 12]

Si Scott

[Hulagway sa panid 13]

Si Steve

[Hulagway sa panid 15]

Usa ka kongregasyon sa Moscow adunay kapin sa 530 ka tumatambong kada Dominggo