Ang Hunahuna sa Bibliya

Makadahom ba ang Tinuod nga mga Kristohanon sa Panalipod sa Diyos?

ARON sa paghatod ug mga hinabang ngadto sa isigkamagsisimba, ang mga Kristohanon, human sa pag-ampo, mibiyahe diha sa sunodsunod nga sakyanan latas sa gihasi sa gubat nga dapit diin lagmit silang mapatay. Hinunoa, nakalabang sila nga luwas, sa dakong katingala sa nanag-awayng kasundalohan. Ang manulonda ba sa Diyos nanalipod kanila?

Usa ka Kristohanong magtiayon nga nag-alagad ingong mga ministro sulod sa daghang katuigan namatay sa dihang ang ayroplano nahagsa sa yuta diin sila nagwali gikan sa balay ngadto sa balay. Nganong ang manulonda sa Diyos wala magtultol kanila o sa ayroplano sa laing dapit niadtong partikular nga yugto?​—Itandi ang Buhat 8:26.

Sa pagtandi niining maong mga panghitabo, tingali kita mangutana: Nganong ang pipila ka Kristohanon namatay samtang nagabuhat sa kabubut-on sa Diyos, samtang ang uban, nga kasagarang anaa sa peligroso kaayong mga kahimtang, nabuhi? Makadahom ba ang mga Kristohanon sa panalipod sa Diyos, ilabina niining malisod nga “kataposang mga adlaw”?​—2 Timoteo 3:1.

Ang Katuyoan sa Panalipod sa Diyos

Si Jehova nga Diyos nagsaad nga panalanginan ug panalipdan ang iyang katawhan. (Exodo 19:3-6; Isaias 54:17) Gibuhat niya kana sa talagsaong paagi sa unang siglo, sa dihang ang Kristohanong kongregasyon bag-o lang nga natukod. Ang tanang matang sa mga milagro midagsang. Si Jesus nagpadaghan sa pagkaon aron sa pagpakaon sa linibo; siya ug ang iyang mga sumusunod nag-ayo sa tanang matang sa mga sakit ug kaluyahon, nagpagula ug labaw-tawhanong mga espiritu gikan sa mga gidemonyohan, ug nagbanhaw gani sa mga patay. Ilalom sa pagtultol sa Diyos ang bag-ong natukod nga kongregasyon mitubo ug lig-ong natukod. Apan, bisan pa sa tanang dayag nga pagpaluyo sa Diyos, daghang matinumanong mga Kristohanon ang nakaagom sa mahimong tawgon nga wala-sa-panahong kamatayon.​—Itandi ang Salmo 90:10.

Tagda ang mga kaso ni Santiago ug Juan, ang mga anak lalaki ni Zebedeo. Nga gipili ingong mga apostol, sila, kauban ni Pedro, maoy lakip sa suod nga mga higala ni Kristo.a Apan si Santiago gipatay ingong martir sa tuig 44 K.P., samtang ang iyang igsoong si Juan nabuhi hangtod sa kataposan sa unang siglo. Ang duha dayag nga naghimo sa kabubut-on sa Diyos. Nganong si Santiago gitugotang mamatay, samtang si Juan nabuhi?

Tinong ang Labing Gamhanang Diyos may katakos sa pagluwas sa kinabuhi ni Santiago. Sa pagkatinuod, wala madugay human sa pagpatay kang Santiago ingong martir, si Pedro giluwas gikan sa kamatayon sa manulonda ni Jehova. Nganong ang manulonda wala magluwas kang Santiago?​—Buhat 12:1-11.

Gigamit sa Pagpatuman sa Katuyoan sa Diyos

Aron masabtan kon nganong ihatag ang panalipod sa Diyos, kinahanglang masabtan nato nga gihatag kana dili lamang aron malugwayan ang kinabuhi sa mga tawo kondili aron sa pagpanalipod sa usa ka butang nga labi pang hinungdanon, ang pagpatuman sa katuyoan sa Diyos. Pananglitan, ang kaluwasan sa Kristohanong kongregasyon sa katibuk-an gigarantiya tungod kay kini suod nga nalangkit sa katumanan sa maong katuyoan. Bisan pa niana, yanong giingnan ni Kristo ang iyang mga tinun-an nga sila ingong mga indibiduwal mahimong mahiagom sa kamatayon tungod sa ilang pagtuo. Human kana isulti, gipasiugda ni Jesus, dili ang milagrosong kaluwasan, kondili ang ‘paglahutay hangtod sa kataposan.’ (Mateo 24:9, 13) Ang kamatuoran nga ang pipila ka indibiduwal gipanalipdan, samtang ang uban wala, wala magpakita nga ang Diyos adunay pinalabi. Ang Diyos yanong naggamit sa tawo nga anaa sa kinamaayohang posisyon sa pagtuman sa iyang katuyoan, nga sa kataposan magbenepisyo sa tanang katawhan.

Sanglit ang wala-sa-panahong kamatayon diha sa pag-alagad sa Diyos maoy tinuod nga posibilidad, kinahanglang batonan sa mga Kristohanon ang samang timbang nga tinamdan sama niadtong sa tulo ka matinumanong mga Hebreohanon nga gihukmang mamatay tungod sa pagsimba sa Diyos. Ilang giingnan ang hari sa Babilonya: “Kon mao kana, ang among Diyos nga among ginaalagaran makahimo sa pagluwas kanamo. Gikan sa hudno nga nagadilaab sa kalayo ug gikan sa imong kamot, Oh hari, siya magaluwas kanamo. Apan kon dili ugaling, angay mong hisayran, Oh hari, nga kami dili gayod moalagad sa imong mga diyos, ug ang larawan nga bulawan nga imong gipatindog dili namo simbahon.”​—Daniel 3:17, 18.

Giluwas ni Jehova ang mga kinabuhi ni Pedro ug Juan tungod sa ilang yawing papel diha sa pagpatuman sa iyang katuyoan. Si Pedro gigamit sa “paglig-on” sa kongregasyon pinaagi sa paghimog magbalantayng buluhaton, nga naglakip sa pagsulat sa duha ka dinasig nga mga basahon sa Bibliya. (Lucas 22:32) Si Juan nagsulat sa lima ka basahon sa Bibliya ug maoy usa ka ‘haligi’ sa unang kongregasyon.​—Galacia 2:9; Juan 21:15-23.

Kon sa unsang paagi tinoon ni Jehova kon kanus-a gayod ug sa unsang paagi nga siya mobalda sa mga kinabuhi sa iyang mga alagad maoy imposibleng tag-anon. Ang matino lamang mao nga si Kristo misaad nga mag-uban sa iyang mga sumusunod “sa tanang mga adlaw hangtod sa katiklopan sa sistema sa mga butang.” (Mateo 28:20) Ilabina, siya ‘magauban kanato’ pinaagi sa manulondaanong pagtultol sa buluhatong pagsangyaw. (Mateo 13:36-43; Pinadayag 14:6) Gawas niining malangkobong mga timailhan, dili nato eksaktong madahom kon sa unsang paagi ang tabang sa Diyos ipakita o kon kinsa ang mahimong modawat ug panalipod sa Diyos. Unsa na man kon ang usa ka Kristohanon mobati nga siya gipanalipdan ug gigiyahan sa Diyos? Sanglit dili kini tinong mapamatud-an o ikapanghimakak, walay usa ang angayng mohukom sa sinserong mga pangangkon nianang usa.

Ang Diyos ba Dili Mobati?

Ang kamatuoran ba nga ang Diyos nagtugot sa kamatayon sa mga Kristohanon nagpakita nga dili kaayo siya mobati? Dili gayod. (Ecclesiastes 9:11) Si Jehova naningkamot nga matipigan ang atong kinabuhi dili lamang sulod sa pipila ka tuig o bisan sa mga dekada kondili sa walay kataposan. Gikan sa iyang hataas nga panglantaw, iyang gimaneobra ang mga panghitabo alang sa walay kataposang kaayohan sa matag indibiduwal nga nahigugma kaniya o moduol kaniya. (Itandi ang Mateo 18:14.) Ang katumanan sa iyang katuyoan magkahulogan ug hingpit nga pagwagtang sa bisan unsa nga atong giantos niining sistemaha sa mga butang​—bisan ang kamatayon. Makuti kaayo ug hingpit ang mga pakiglabot sa Diyos nga si apostol Pablo natukmod sa pagpatugbaw: “O ang kalalom sa bahandi sa Diyos ug kaalam ug kahibalo! Pagkadili-matukib sa iyang mga paghukom ug pagkadili masubay ang iyang mga dalan!”​—Roma 11:33.

Sanglit walay makapabulag kanato gikan sa gugma sa Diyos, ang pangutana nga isukna sa matag Kristohanon dili ‘Ako ba panalipdan sa Diyos?’ kondili ‘Gipanalanginan ba ako ni Jehova?’ Kon ato kanang buhaton, siya magahatag kanato ug kinabuhing walay kataposan​—bisan pag unsay mahitabo kanato niining sistemaha sa mga butang. Kon itandi sa walay-kataposang hingpit nga kinabuhi, ang bisan unsang pag-antos​—bisan ang kamatayon​—niining sistemaha daw “makadiyot ug magaan.”​—2 Corinto 4:17.

[Footnote]