Ang Hunahuna sa Bibliya

Angay Bang Dahomon sa mga Kristohanon ang Panalipod sa Diyos?

Ang Bibliya kanunayng naghisgot sa katakos sa Diyos sa pagpanalipod sa iyang mga magsisimba gikan sa kadaot. Si Haring David miingon: “Oh Jehova, luwasa ako gikan sa mga tawong daotan; panalipdan mo unta ako gikan sa tawo nga may mga buhat nga mapintason.” (Salmo 140:1) Daghan sa mga magsisimba sa Diyos karon nga nahisugamak sa kapintasan, krimen, o sa kinaiyanhong mga katalagman diriyot nang mamatay o maangol. Ang uban nahibulong kon panalipdan ba kaha sila sa Diyos sa milagrosong paagi sa maong mga kahimtang, ilabina nga may mga kahimtang nga ang mahinadlokon sa Diyos nga mga tawo wala man makaikyas apan nahisugamak sa grabeng mga katalagman, bisan sa usa ka pintas nga kamatayon.

PANALIPDAN ba ni Jehova nga Diyos ang pipila ka tawo ug dili ang uban? Makadahom ba kita nga maluwas sa milagrosong paagi gikan sa kapintasan ug mga katalagman karon?

Milagrosong Panalipod Diha sa mga Asoy sa Bibliya

Dunay daghang asoy diha sa Bibliya nga ang Diyos milagrosong misalga alang sa iyang mga magsisimba. (Isaias 38:​1-8; Buhat 12:​1-​11; 16:​25, 26) Nag-asoy usab ang Kasulatan kon nganong diha sa ubang mga kahimtang ang mga alagad ni Jehova wala maluwas gikan sa katalagman. (1 Hari 21:​1-​16; Buhat 12:​1, 2; Hebreohanon 11:35-​38) Nan, dayag nga si Jehova ra ang maghukom kon manalipod ba siya tungod sa usa ka tinong hinungdan o katuyoan bisan kanus-a nga iyang gusto. Busa, kon ang usa ka Kristohanon dili maluwas gikan sa mga pagsulay, sila dili angayng mohinapos nga gipasagdan sila sa Diyos. Angay natong dawaton ang kamatuoran nga ang daotang mga butang mahitabo, bisan sa matinumanong mga alagad ni Jehova. Nganong ingon man niana ang kahimtang?

Kon Nganong ang Daotang mga Butang Mahitabo sa Matinumanong mga Alagad sa Diyos

Ang usa ka rason mao nga kitang tanan nakapanunod sa sala ug pagkadi-hingpit ni Adan ug Eva. Mao nga makadahom kita ug kasakit, pag-antos, ug kamatayon. (Roma 5:12; 6:23) Ang laing rason mao nga kita nagkinabuhi sa kataposang mga adlaw. Ang Bibliya naghubit sa mga tawo karon nga “walay kinaiyanhong pagbati, dili-ikasabot, mga tigbutangbutang, walay pagpugong-sa-kaugalingon, mabangis, walay gugma sa pagkamaayo.” (2 Timoteo 3:1-5) Gipamatud-an kini sa kaylap nga panglugos, pangidnap, pagpatay, ug ubang grabeng mga krimen.

Daghang matinumanong alagad sa Diyos nagpuyo ug nagtrabaho uban sa bangis nga mga tawo ug usahay maoy ilang buhatag daotan. Mahimong anaa kita sa kahimtang nga mameligro ang atong kinabuhi tungod kay maatlan ug mapagan diha sa dapit nga mahitaboan. Dugang pa, nasinati nato ang katinuoran sa giingon ni Solomon nga “ang panahon ug ang wala damhang panghitabo modangat kanilang tanan.”​—Ecclesiastes 9:11.

Dugang pa, nag-ingon si apostol Pablo nga ang mga Kristohanon mahimong tumong sa paglutos kay ilang gisimba ang Diyos. Matod niya: “Sa pagkatinuod, ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.” (2 Timoteo 3:12) Sa di pa dugayng katuigan natinuod kini diha sa daghang nasod.

Busa, ang mahinadlokon-sa-Diyos nga mga tawo dili hilwas sa mga epekto sa kapintasan, krimen, natural nga mga katalagman, o aksidenteng kamatayon. Gipaningkamotan ni Satanas pagpahimulos ang argumento nga si Jehova manalipod sa Iyang katawhan aron dili magkadaotdaot ang ilang kinabuhi. (Job 1:​9, 10) Dili kana tinuod. Apan, kita makatino nga bisan pag si Jehova dili moluwas sa milagrosong paagi gikan sa usa ka kahimtang, siya manalipod sa iyang katawhan.

Kon sa Unsang Paagi si Jehova Manalipod sa Iyang Katawhan Karon

Pinaagi sa iyang Pulong, si Jehova nagagiya aron mapanalipdan ang iyang katawhan. Ang espirituwalidad ug kahibalo sa Bibliya makahatag kanatog maayong panghukom ug pangisip, nga makatabang nato aron malikayan ang dili-angayng mga kasaypanan ug makahimog maalamong mga desisyon. (Salmo 38:4; Proverbio 3:​21; 22:3) Pananglitan, ang pagsunod sa tambag sa Bibliya bahin sa moralidad sa sekso, kahakog, kasuko, ug kapintasan nakaluwas sa mga Kristohanon gikan sa daghang kalamidad. Pinaagi usab sa dili pagpakighugoyhugoy sa daotang mga tawo, lagmit dili kita maatlan ug mapagan diha sa dapit nga basin mahitaboan. (Salmo 26:​4, 5; Proverbio 4:14) Kadtong magkinabuhi subay sa mga prinsipyo sa Bibliya magpahimulos sa labawng paagi sa pagkinabuhi, nga sagad mosangpot sa mas maayong pangisip ug panglawas.

Ang makapahupay pag-ayo mao ang pagkahibalo nga bisan kon ang Diyos motugot nga mahitabo ang daotang mga butang, iyang hatagag kinahanglanong kalig-on ang iyang mga magsisimba aron ilang maagwanta kana. Gipasaligan kita ni apostol Pablo: “Ang Diyos kasaligan, ug dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.” (1 Corinto 10:13) Ang Bibliya nagsaad usab ug “gahom nga labaw sa kasarangan” aron mabuligan kita sa paglahutay sa mga kasakitan.​—2 Corinto 4:7.

Ang Diyos Mobuhat Sumala sa Iyang Kabubut-on

Angay bang magdahom ang mga Kristohanon nga ang Diyos magluwas kanila sa milagrosong paagi sa matag umaabot nga katalagman? Ang talaan sa Bibliya wala magsuportar sa maong pagdahom.

Siyempre, mahimong palabihon ni Jehova nga Diyos nga mosalga dihadiha alang kang bisan kinsa sa iyang mga alagad. Ug kon dunay nagtuo nga nakalingkawas siya sa kadaot tungod sa pagsalga sa Diyos, dili siya angayng sawayon. Apan kon palabihon ni Jehova nga dili mosalga, kana dili angayng sabton nga mora bag siya walay kahimuot kanimo.

Hinaot nga magmasaligon kita nga bisan unsa pa nga pagsulay o kahimtang nga atong sagubangon, si Jehova manalipod sa iyang matinumanong mga alagad, mahimong pinaagig paghanaw sa maong kahimtang, pagpalig-on kanato aron makalahutay niana o, kon kita mamatay, pinaagi sa pagbanhaw kanato ngadto sa walay kataposang kinabuhi sa iyang bag-ong kalibotan.​—Salmo 37:​10, 11, 29; Juan 5:​28, 29.