Pagguba sa mga Paril Aron Matukod ang mga Taytayan

KITA wala magpili sa pamilya o nasod nga namat-an natog mahayag, ni kita mihukom kon unsang kultura ang mag-umol sa atong panghunahuna. Kita dili makabuot nianang mga butanga. Kitang tanan gimbut-an sa panahon ug sa kahimtang. Apan kita makabuot kon unsay pag-isip nato sa uban ug kon unsaon nato paglihok labot kanila.

Ang Bibliya nagbatbat kon unsaon nato pagbuhat kana. Palandonga ang pipila ka prinsipyo nga motabang kanato sa pagtukod ug mga taytayan sa komunikasyon paingon niadtong naggikan tingali sa kagikan nga lain sa atong kaugalingon.

“Ang Diyos nga naghimo sa kalibotan ug sa tanang butang diha niini . . . iyang gihimo gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta.” (Buhat 17:​24, 26) Kitang tanan maoy mga sakop sa mao rang tawhanong pamilya ug sa ingon dunay daghang kasamahan. Ang pagpangita sa mga butang nga niana kita magkapareho mas makapasayon sa komunikasyon. Kitang tanan gustog maayong mga higala ug nagkinahanglan nga mobating gihigugma ug gitahod. Ang matag usa nagtinguha nga malikayan ang lawasnon ug emosyonal nga kahapdos. Ang katawhan sa tanang kultura gustog musika ug arte, mopahayag ug mga komedya, motuo sa pagkamatinahuron sa usag usa, ug mangitag mga paagi aron magmalipayon.

‘Ayaw pagbuhat ug unsa man tungod sa pagkamatigion o tungod sa pagpakaimportante sa kaugalingon, hinuon uban sa pagpaubos sa hunahuna magaisip nga ang uban labaw kay kaninyo.’ (Filipos 2:3) Dili kini pag-ingon nga atong pagaisipon ang uban nga labaw kanato sa tanang butang. Sa kapulihay, pagaamgohon nato nga sa pipila ka natad sa kinabuhi, ang uban labaw. Dili gayod nato pagahunahunaon nga kita o ang atong kultura maayo sa tanang butang.

“Nan, sa pagkatinuod, samtang kita may panahong paborable alang niini, buhaton nato ang maayo ngadto sa tanan.” (Galacia 6:10) Ang yanong pag-una lamang sa pagkamahigalaon ug pagkamatinabangon sa uban, walay sapayan sa ilang kultural nga kagikan, dakog ikaamot sa pagpukgo sa kal-ang sa komunikasyon.

“Hibaloi kini, hinigugmang mga igsoon. Ang matag usa kinahanglan nga magmaabtik sa pagpaminaw, magmahinay sa pagsulti, magmahinay sa kapungot.” (Santiago 1:19) Ang maayong mga tigkomunikar dili lamang kay mosulti; kinahanglang sila mabinationg mga tigpatalinghog.

“Ang tambag diha sa kasingkasing sa usa ka tawo maoy ingon sa halalom nga katubigan, apan ang tawo sa salabotan maoy magakalos niana.” (Proverbio 20:5) Magmaigmat sa pagsabot sa mga pagbati ug sa mga isyu nga nagpahipi sa pangibabaw nga panggawi sa usa ka tawo. Ilha nga mas maayo ang mga tawo.

“Managtan-aw, dili sa personal nga kaayohan nianang mga butang labot sa inyong kaugalingon lamang, apan usab sa personal nga kaayohan nianang ila sa uban.” (Filipos 2:4) Magmabination pinaagi sa pag-isip sa mga isyu gikan sa punto de bista sa laing tawo. Ayaw paghinakog.

Panagkalahi sa Kultura Taliwala sa mga Saksi ni Jehova

Nga molampos gayod kining mga prinsipyoha makita diha sa talagsaong panaghiusa sa mga Saksi ni Jehova, kinsa aktibo diha sa 232 ka nasod sa yuta. Sila maoy usa ka katawhan nga naggikan sa “tanang kanasoran ug mga tribo ug mga katawhan ug mga dila” ug determinado nga mopahiuyon sa mahigugmaong paggiya ni Jehova diha sa tanang butang.​—Pinadayag 7:9; 1 Corinto 10:31-33.

Ang tinagsa ka Saksi dili motamay sa kultura sa uban. Ni kadtong nahimong mga Saksi mosalikway sa kultura nga niana sila gimatuto, gawas kon kini mahasupak sa mga prinsipyo sa Bibliya. Nianang mga kasoha sila mohimog mga kausaban sa ilang mga kinabuhi. Giila nila nga sa matag kultura adunay dalayegong mga kinaiya ug nga kini sila mapausbaw pa diha sa katawhan nga misagop sa matuod nga pagsimba.

Sila naningkamot sa pag-isip sa atong planeta sumala sa pagkakita niini sa Diyos​—sanag ug asul ug matahom​—nga nagatuyok latas sa wanang. Kini usa ka planeta nga may kahibulongang kadaiyahan sa mga katawhan ug mga kultura. Ang mga Saksi ni Jehova nagapaabot sa panahon nga ang tanan sa yuta magpahimulos sa kinabuhi ingong usa ka tinuod nga nahiusang pamilya.

[Hulagway sa panid 8]

Ang mga Saksi ni Jehova nakakat-on kon unsaon pagpukan sa kultural nga mga babag