Gikan sa Among mga Magbabasa

Mga Tunghaan Anaa sa Krisis Ako naghulat sa hunonganan sa bus sa dihang may usa nga naghatag kanako sa isyung “Mga Tunghaan Anaa sa Krisis.” (Disyembre 22, 1995) Mas mapuslanon pa kini kay sa tibuok libro nga akong nabasa sa dili pa dugay bahin sa ulohan. Mapasalamaton gayod ako kon ang usa ka suskrisyon sa Pagmata! ipadala sa akong balay.

V. C., Tinipong Bansa

Ang seksiyon bahin sa Tunghaan sa Teokratikanhong Ministeryo nagpahinumdom kanako sa dihang ako nagtungha pa. Kinahanglan ko nga mohatag ug binabang taho apan limitado lamang ang akong Iningles niadtong panahona. Sa natapos ko ang akong presentasyon, ang akong magtutudlo miingon nga siya nakadayeg kaayo ug nga ako lamang ang may maayong pamarog ug kontak sa mata uban sa mamiminaw. Nahimo ko kini tungod sa ekselenteng pagbansay nga among nadawat sa Tunghaan sa Teokratikanhong Ministeryo sa Kingdom Hall.

G. A., Tinipong Bansa

Wala ako magdahom nga kining mga artikuloha makatandog pag-ayo sa akong emosyon. Sa dihang ako nagtungha pa, ang akong mga ginikanan puliki kaayo sa ilang kaugalingong mga problema ug sa ingon walay panahon nga mahimong akong tigpaluyo. Tungod niini, ako may pipila ka mamingawon kaayong mga panahon samtang nagtungha. Tungod sa mga artikulo nga sama niini, ako nasayod nga si Jehova nahigugma sa mga batan-on ug dili buot nga mobati sila nga nag-inusara lamang niining kalibotana.

M. M., Tinipong Bansa

Mali Ang artikulong “Ang Una sa Mali” (Disyembre 22, 1995) maayo kaayo. Gibasa ko kini sa tulo ka beses. Gitinguha ko gayod nga ang akong mga kahimtang magtugot kanako nga mahimong usa ka misyonaryo! Ang artikulo usab nagpaamgo kanako nga dunay daghang katawhan nga walay mga kasangkapan nga makapaluag sa paglihok nga ginapahimuslan namo ug bisan pa niana sila malipayon. Pagkatukma-sa-panahong pahinumdom!

D. L., Tinipong Bansa

Mga Bato nga Manglupad Pipila lang ka adlaw nga miagi, nahibulong ako sa kalainan tali sa usa ka bulalakaw ug sa usa ka meteorite. Handurawa ang akong katingala sa dihang nabasa ko ang artikulong “Mga Bato nga Manglupad” (Disyembre 8, 1995), nga nagbatbat gayod niini. Salamat sa pagpatik ug mga artikulo nga nagpasinati kanamo sa kalalangan ni Jehova.

R. P., Switzerland

Pagkakat-on Gikan ni Andrew Mao pay pagbasa nako sa artikulo bahin sa batan-ong lalaki nga may Down’s syndrome, “Kon Unsay Among Nakat-onan Gikan ni Andrew.” (Disyembre 8, 1995) Kami may anak usab nga may kabilinggan sa hunahuna, ug daghan sa mga komento gikan sa mga ginikanan ni Andrew nagbanaag sa among gibati. Sagad lisod kaayo alang sa among Kristohanong mga igsoon nga makasabot sa linaing mga kalisod nga ipatungha sa bata nga may kabilinggan sa hunahuna ug sa emosyonal nga pagpit-os nga ikahatag diha sa pamilya. Busa salamat sa artikulo.

J. B., Inglaterra

Gibati ko nga kini maoy usa sa labing maanindot ug sensitibo nga mga artikulo nga inyong gipatik. Sa tulo lamang ka panid, ang tibuok nga paghisgot kon unsaon nato paglantaw niadtong may mga kabilinggan gitanyag. Kini naghatag ug tinuod gayod nga leksiyon bahin sa tawhanong mga relasyon.

M. L., Espanya

Sayo niining tuiga ang akong asawa nanganak sa usa ka batang lalaki nga may Down’s syndrome. Sama sa mga ginikanan ni Andrew, nasinati namo ang gibati sa daghang ginikanan sa pagkasayod nga ang ilang anak may depekto​—kabalaka ug kasubo ingon man ang mga pangutana bahin sa presente ug sa umaabot. Sa among bahin, kami nakaarang sa pagdawat sa kabilinggan sa among anak. Siya sa dili magdugay mag-unom na ka bulan, ug siya maayo ug pag-uswag. Sa adlaw nga siya natawo, ang akong asawa sa literal nahupngan sa daghang pagduaw sa among Kristohanong mga igsoong lalaki ug babaye. Gibati gayod namo kon unsay kahulogan sa pagkaadunay espirituwal nga pamilya. Ug gawas pa sa gugma sa among mga igsoong lalaki ug babaye, anaa ang gugma ni Jehova. Salamat niining artikuloha.

G. C., Pransiya