Gikan sa Among mga Magbabasa
Mga Konsiyertong Rock Dili nako malikayan ang paghunahuna nga ang artikulong “Mga Batan-on Nangutana . . . Angay ba Akong Motambong sa mga Konsiyertong Rock?” (Disyembre 22, 1995) may pagkamapihigon. Mitambong ako ug usa ka konsiyertong rock uban sa akong mama. Gulanggulang na ang membro sa banda, ug ang panon dili gubot. Apan ang artikulo wala magpasiugda bisan sa posibilidad nga makakaplag ug desenteng konsiyerto.
S. A., Tinipong Bansa
Tinuod nga ang artikulo nagtunong sa pagtagad sa posibleng mga kapeligrohan sa mga konsiyertong rock. Bisan pa niana, wala namo sawaya ang tanang nagtambong ug mga konsiyerto. Among giingnan ang among mga magbabasa: “Kon gihunahuna nimong motambong sa usa ka konsiyerto, pakisusi una.” Ang impormasyon sa ingon gihatag aron sa pagtabang sa mga batan-on ug sa ilang mga ginikanan nga mohimog timbang nga desisyon.—ED.
Buot ko kamong pasalamatan sa artikulo. Mga semana lamang una nako madawat ang magasin, pipila kanamo mitambong sa usa ka konsiyerto. Kadto magubot, ug daghan didto ang hubog; dili kadto dapit alang sa mga Kristohanon. Naleksiyon gayod ako ug nanghinaot nga naleksiyon usab ang uban nga mitambong.
M. E., Tinipong Bansa
Costa Rica Buot nakong tin-awon ang bahin sa artikulong “Costa Rica—Gamayng Nasod, Dagaya sa Nagkadaiyang Kalalangan.” (Hulyo 8, 1995) Inyong giingon nga “halos 27 porsiyento sa yuta ang gipanalipdan, ang kinadak-an sa bisan unsang nasod sa kalibotan.” Apan, sumala sa World Almanac, ang Ecuador naggahin ug duolan sa 40 porsiyento sa total nga luna niini aron tipigan.
M. E., Ecuador
Salamat sa katin-awan.—ED.
Mali Mihilak ako sa kalipay sa dihang nabasa nako ang artikulong “Ang Una sa Mali.” (Disyembre 22, 1995) Ang espiritu sa kooperasyon sa inyong mga membro sa Mali maoy makapalig-on sa pagtuo. Akong gikontak ang mga Saksi ni Jehova aron sugdan nila ako pagtudlo sa Bibliya. Akong determinasyon ang pagpakig-uban sa inyong mga membro sa pagsimba sa Diyos.
D. C. A., Nigeria
Tourette Syndrome Buot kong ipahayag ang akong pagpasalamat sa inyong artikulong “Ang Hagit sa Pagkinabuhi Uban sa Tourette Syndrome.” (Disyembre 22, 1995) Ang akong mga simtomas nawala sa pagkatapos sa akong pagkabatan-on. Apan dili tanan ang ingon ka bulahan. Kining artikuloha maoy bililhong tabang alang sa maong mga tawo ug sa ilang mga pamilya.
Y. L., Pransiya
May nakaila akong batang lalaki nga aduna niana, ug hangtod karon ako siyang gilikayan tungod kay maulaw akong makig-uban kaniya. Wala nako maamgohi nga tingali labi pa siyang naulaw niana kay kanako!
P. M., Italya
Nasakit ako niini sukad ako mag-edad ug singko anyos, ug kini nakapaguol pag-ayo kanako. Magkibotkibot ang akong kaunoran ug maglubadlubad ang akong tingog. Ang akong mga ginikanan ug ako wala makasabot kon nganong nahitabo kining maong pagkibotkibot ug paglubadlubad; sila nabalaka nga tingali adunay sayop sa paagi sa ilang pagmatuto kanako. Nag-ampo ako kang Jehova aron matabangan ako sa pagsabot, ug gitubag niya ang akong pag-ampo pinaagi niining artikuloha. Nadasig ako pag-ayo sa pagbasa sa mga kasinatian sa uban taliwala sa mga Saksi ni Jehova nga may samang sakit.
Y. K., Hapon
Nag-antos ako niining sakita halos sa tibuok kong kinabuhi, apan sukad lamang niadtong 1983 nga akong nahibaloan kon unsa kana. Sa bata pa ako, ang uban magbugalbugal kanako. Apan ang mga igsoong lalaki ug babaye sa Kingdom Hall kanunayng mahigugmaon ug nagdawat niana ingong kabahin nako. Sa ulahi, nahigugma ako sa usa ka batan-ong Kristohanong lalaki. Siya bug-os nga nasayod sa akong sakit. Bisan tuod gihunahuna sa akong papa nga dili magdugay ang among kaminyoon, malipay ako sa pag-ingon nga 30 ka tuig sa ulahi kami malipayon gihapon sa among kaminyoon. Ang akong bana kanunayng magtratar kanako samag bulawan ug wala gayod tugoti ang akong sakit nga maghasol o magpakaulaw kaniya.
F. H., Canada