Mga Batan-on Nangutana . . .

Angay ba Akong Motambong sa mga Konsiyertong Rock?

Taliabot ang usa ka iladong banda sa imong lungsod. Kusog kaayo ang halin sa mga tiket, busa kinahanglang modesisyon ka dayon. Motambong ka ba?

ANG maayong musika diha sa maayong palibot makalingaw. Mao bitaw nga gilalang kita ni Jehova nga Diyos nga dunay katakos nga malingaw sa musika, ug daghan kaayong matang sa musika ang dalawaton kaniya.

Taliwala sa mga batan-on karon, ang pinalabing musika sagad mao ang musikang rock sa bisan haing daghang porma niini. Daghan ang ilabinang nalingaw niini sa dihang personal kini nga ipasundayag. Bisan pa niana, apil sa ubang mga butang, dunay mga taho bahin sa kaguliyang ug walay pugong nga mga panggawi nga mahitabo sa mga konsiyertong rock nga makapatugbaw ug seryosong mga pangutana alang sa mahadlokon-sa-Diyos nga mga batan-on. Unsa ba gayod ang nagakahitabo diha sa mga konsiyertong rock? Ang pagtambong sa usa niini maayo bang ideya?

Susiha ang Musika

Una, atong tagdon ang musika mismo. Ang musika makapahayag​—ug makapukaw​—ug daghang matang sa mga pagbati. Sa kapanahonan sa Bibliya, kanunayng gigamit sa katawhan sa Diyos ang musika sa pagpahayag sa ilang gugma sa Diyos. (Salmo 149:3; 150:4) Gigamit usab ang musika sa pagpahayag sa kalipay, kaukyab, ug kasubo. (Genesis 31:27; Maghuhukom 11:34; 1 Samuel 18:​6, 7; Mateo 9:​23, 24) Apan, ikasubo nga ang musika dili kanunay maayo bisan sa kapanahonan sa Bibliya. Ang walay pugong, makapukaw sa seksuwal nga gana nga musika mahimong nakadulag papel sa pagdani sa pipila ka Israelinhon sa pagpakasala sa dihang ang nasod nagkampo sa Bukid Sinai.​—Exodo 32:​1-6, 17, 18, 25.

Sa pagkatinuod, ang kadaghanan sa musikang rock nagpasiugda usab ug daotang mga butang​—seksuwal nga imoralidad, mga droga, rebelyon, espiritismo. Kini wala gayod magkahulogan nga imo nang likayan ang musika, apan gisultihan sa Bibliya ang mga Kristohanon sa ‘pagpadayon sa pagtino kon unsa ang dalawaton sa Ginoo.’ (Efeso 5:10) Busa kinahanglang magmapilion ka ug gamita ang maayong salabotan kon bahin sa musika.a

Sa unsang paagi makaapektar kanimo ang musika nga imong gusto? Kini ba nagpabati kanimo nga malipayon, kalmado, o malinawon? O kini ba nagpabati kanimo ug kasuko, rebelyoso, o magul-anon? Usa ka Kristohanong lalaki sa Denmark nahinumdom sa mga adlaw sa gusto pa kaayo siyag heavy metal, usa ka matang sa musikang rock. Siya miingon: “Mamati ako niana samtang nagtrabaho. Ug kon masayop ako, masuko kaayo ako nga ibusdak dayon nako ang akong gikaptan ug ilabay kana sa kalagot!” Laing batan-on miangkon: “Sige kog pamati ug musikang rap ug heavy metal nga naghimaya sa sekso ug sa kalibotanong estilo-sa-kinabuhi. Kining musikaha maoy nagpakaon sa akong kaisipan, ug ang resulta mao ang pagpangandoy sa mga butang nga ilang giawit.” Nan kon ang yanong rekording adunay ingon niana nga epekto, hunahunaa ang gahom sa usa ka personal nga pasundayag!

Tagda usab: Unsa ba ka kusog ang musika? Ibutang nato, ang mga tawo adunay lainlaing gusto niining bahina. Ug ang Bibliya wala magsalikway sa musikang may makataronganong gikusgon. Gani, sa pagpahinungod sa templo ni Solomon, ang mga tigtrompeta lamang mikabat ug 120! (2 Cronicas 5:12) Seguradong kusog gayod kadto! Hinunoa, may dakong kalainan tali sa kusog nga pagsinggit sa pagdayeg sa Diyos ug sa makabungog nga musikang rock. Sa ulahing kaso, ang kakusog subsob nga gigamit sa pag-aghat sa espiritu sa panon sa mga tawo sa walay pugong nga hudyaka. Apan ang Bibliya nagsaway sa “mga hudyaka-bahakhak,” o “walay pugong nga mga salosalo.” (Galacia 5:21; Byington) Ug ang pagtahod sa imong lawas nagkinahanglan nga dili ka maminaw sa kusog kaayong musika nga makadaot sa imong igdulongog.​—Roma 12:​1.

Laing punto nga pagatagdon mao ang gipadayag sa Job 12:11. Didto ang Bibliya nangutana: “Dili ba ang dalunggan mismo nagasusi sa mga pulong sama sa alingagngag nga nagatilaw sa pagkaon?” Uyon niini, kinahanglang “imong susihon” ang mga pulong sa awit! Usa ka Kristohanong batan-on miangkon: “Nagsugod ako sa pagpaminaw sa mga pulong sa pila ka awit nga akong nagustohan, ug sa akong kakurat dili sila angay paminawan sa usa ka Kristohanon. Nakita ko nga kinahanglang idispatsar kanang maong musika.” (1 Corinto 14:20; Efeso 5:​3, 4) Pagbantay, usab, nga gamiton sa daghang tigpasundayag ang mga konsiyerto aron ipahibalo ang ilang kinabag-ohang awit​—mga materyal nga hayan lahi kaayo gikan sa ilang mas karaan, tingali mas maayo, nga musika.

Dugang pa, kinahanglang imong tinoon nga ang musika walay demonyohanong mga pasumbingay​—usa ka butang nga ilabinang nangibabaw diha sa mga matang sa heavy-metal nga musika. Ang mga bandang heavy-metal nabantog nga nagdayandayan sa ilang kaugalingon ug sa ilang mga album ug demonyohanong mga simbolo ug satanasnong mga butang. (Santiago 3:15) Ang pagtambong sa usa ka konsiyerto sa maong grupo dili gayod makapahimuot sa Diyos, kinsa nagsugo kanato sa ‘pagsukol sa Yawa’!​—Santiago 4:7.

Dili Makontrolar

Unsa kahay mahitabo diha sa konsiyerto mismo? Usa ka tin-edyer nga babaye nga ginganlag Stacey miadto uban sa iyang mga higala aron sa pagtan-aw sa banda nga ilang gibati nga tigpatokar ug daw maayo nga musika. Apan sa tungatunga sa konsiyerto, gisundog sa pangunang mang-aawit sa banda ang ginahimo sa espiritista ug gidapit ang tumatan-aw sa pagduyog sa paningkamot nga makontak ang espirituhanong kalibotan! Usa lamang ka tiaw? Tingali. Apan sanglit gihukman sa Bibliya ang espiritismo sa bisan unsang matang, si Stacey ug ang iyang mga higala napugos sa paggawas.​—Levitico 19:31; Deuteronomio 18:​10-13; Pinadayag 22:15.

Ang ubang Kristohanong mga batan-on dunay susamang makalilisang nga mga eksperyensiya, kay bisan kon tingali talagsa ra nga makita ang dayag nga espiritismo diha sa mga konsiyertong rock, ang dili-makontrolar nga panggawi kasagaran. Sa usa ka konsiyerto mitabang ang banda sa pagdasig sa lamoklamok nga misangpot ug 60 ka nasamdan ug kapin sa $200,000 nga kadaot! Sa lain pang konsiyerto, tulo ka batan-on ang nayatakyatakan hangtod sa kamatayon. Tinuod, ang kadaghanan sa konsiyertong rock dili mosangpot ug lamoklamok, pagkasamad, o kamatayon. Apan adunay dayag nga panginahanglan sa pagpanagana. Ang Proverbio 22:3 nag-ingon: “Maalamon ang usa nga nakakita sa katalagman ug magatago sa iyang kaugalingon, apan ang walay kasinatian magalabay lamang ug magaantos sa silot.”

Busa kon naghunahuna ka sa pagtambong sa usa ka konsiyerto, kuhaa ang hinungdanong mga impormasyon. Ang banda ba iladong nagadasig sa dili-makontrolar nga panggawi? Unsang matanga sa tumatan-aw ang nadani sa banda? (1 Corinto 15:33) Sa unsang sukod ang paggamit sa alkohol ug mga droga nagakahitabo? Ug komosta ang dapit mismo sa konsiyerto? Nagkaproblema na ba kini labot sa seguridad sa nangagi? Unsay mga kahikayan sa paglingkod? Sa dihang puwedeng molingkod bisag asa, mas dako ang kalagmitan nga dunay masamdan.

Ang pag-abuso sa droga ug alkohol kaylap sa mga konsiyertong rock. “Ang mga tawo dili mangadto alang sa musika,” matod sa usa ka nawad-ag pagsalig nga Kristohanong lalaki kinsa sa iyang pagkabatan-on mitambong ug konsiyerto sa usa ka tradisyonal nga bandang rock. “Sila mangadto aron magpahubog.” Nakahukom siya nga mao kadto ang iyang kataposang konsiyertong rock. Usa ka tin-edyer nga Kristohanong babaye sa susama nagtaho: “Nahinumdom ako nga miadto sa usa ka konsiyerto diin nagpasundayag ang usa ka ‘liberal’ nga banda. Ngilngig kaayo kadto! Ang mga tawo nanigarilyog marijuana. Ang pinulongan mangil-ad kaayo, ug daghan didto daw sama sa mga magsisimba ni Satanas tungod sa ilang pamiste.” Bisan sa mga dapit nga gidili gayod ang mga droga ug alkohol, ang kadaghanan diha sa tumatan-aw kasagarang mangabot nga hubog na. Ang pagtambong ba sa maong okasyon uyon sa sugo sa Bibliya sa “pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang pagkamabuot sa hunahuna”?​—Tito 2:12.

Ang Gahom sa Palibot

Hinunoa, tingali bation nimo nga wala kay angay kabalak-an kon unsay panggawi niadtong sa imong palibot basta sa imong kaugalingon dili ka moduyog sa maong kaguliyang. Ugaling, ang imong palibot makaapektar gayod kanimo. Sa Efeso 2:​2, ang Bibliya naghisgot mahitungod sa “awtoridad sa hangin, ang espiritu nga nagalihok karon diha sa mga anak sa pagkadili-masinugtanon.” Timan-i nga kining kalibotana adunay “espiritu,” o nangibabawng tinamdan sa kaisipan. Anaa kini bisan asa, ingon ka kaylap sa hangin mismo. Apan matikdi usab nga kining maong espiritu, o tinamdan, adunay “awtoridad”​—ang gahom nga makausab sa imong mga hunahuna, mga pagbati, ug panggawi—kon iladlad nimo ang imong kaugalingon niana! Dili gayod mahimong hanggabon nimo kining maong gamhanang hangin ug dili maapektohan.

Sa kadaghanang kaso ang mga konsiyertong rock dako kaayo ang pagkaladlad sa espiritu sa kalibotan. Ang usa dali rang madani sa gubot nga palibot nga maoy kasagarang mangibabaw​—o sa pagsiyagit ug pagwarawara nga halos susama na sa masimbahong pagdayeg sa mga tigpasundayag. Ang maong hingaping pagdayeg nagsanta sa paghalad nga angay nga sa Diyos lamang. Sama kini sa idolatriya, usa ka butang nga tin-awng gihukman sa Kasulatan. (1 Corinto 10:14; 1 Juan 5:21) Buot ka bang mamasin sa pagpalangkit niana?

Dili ikalalis ang pag-ingon nga ang kadaghanan sa mga konsiyertong rock naglangkit sa mga risgo nga mas dako pa kay sa bisan unsang mga benepisyo nga makuha sa usa pinaagi sa pagtambong niini. Siyempre, ang imong mga ginikanan adunay katungod sa paghimog kataposang desisyon kon itugot ba o dili ang pagtambong sa usa ka partikular nga konsiyerto. Apan kon aduna kay kagawasan sa paghimog desisyon sa imong kaugalingon, pagpili nga maalamon. Adunay daghang paagi sa paglingaw sa kaugalingon nga matawag nga maayo ug walay nalangkit nga mga risgo sa pagtambong sa mga konsiyertong rock.

[Footnote]

[Hulagway sa panid 18]

Ang alkohol, mga droga, ug walay pugong nga panggawi maoy kasagaran sa mga konsiyertong rock