Gikan sa Among mga Magbabasa

Mga Mormon Nakurat ako sa dihang nabasa nako ang artikulong “Ang Mormon nga Iglesya​—Usa ka Kapasig-ulian sa Tanang Butang?” (Nobyembre 8, 1995) Inyong gitawag ang inyong kaugalingon nga tinuod nga mga Kristohanon tungod kay modumili kamo sa pagpakiggubat. Apan ako mapasigarbohon sa mga Mormon nga nakig-away sa Gubat sa Kalibotan II ug mitabang sa mga Hudiyo, kinsa gilutos ni Hitler. Unsa may gibuhat sa mga Saksi ni Jehova niadtong panahona gawas sa dili-pag-apil ug pagtan-aw sa unom ka milyong Hudiyo nga namatay?

G. D., Alemanya

Tinuod nga ang mga Mormon sa Tinipong Bansa ug Britanya nakig-away batok sa Nazismo. Apan dili sa Alemanya mismo. Ang librong “The Nazi State and the New Religions,” nga sinulat sa historyanong si Christine King, bise-kansilyer sa Staffordshire University sa Inglaterra, mitaho: “Ang mga Mormon miduyog sa pagserbisyo sa kasundalohan ug dihay unom ka gatos nga Mormon sa Alemang armi pagka-1940. . . . Ang mga Mormon nagpadayon sa pagpasiugda sa ‘parehong mga tumong’ sa Mormonismo ug Nasodnong Sosyalismo. . . . Ang pipila ka lider sa Mormon misugod sa pagtudlo sa ilang mga kongregasyon sa yanong mga prinsipyo sa Nasodnong Sosyalismo, mihimog mga pag-ampo alang sa Führer, nga mihisgot kaniya ingong ‘tinawag sa Diyos.’ . . . Duna lamay duha ka gikatahong mga kaso bahin sa pagsukol sa mga Mormon sa mga Nazi.” Apan, ingong pundok ang mga Saksi ni Jehova midumili sa pagpaluyo sa pagmandong Nazi. Busa, sila nahimong mga tumong sa mapintas nga paglutos sa gobyerno ni Hitler. Linibo ang nag-antos ug pagkabilanggo diha sa mga kampo konsentrasyon, ug daghan ang namatay didto. Tan-awa ang among Agosto 22, 1995, nga isyu.​—ED.

Pagkabaylo sa Letrato Ang seryeng “Siyentipikanhong Piksiyon​—Pagpasiplat sa Atong Ugma-Damlag?” (Disyembre 8, 1995) makapalingaw kaayo. Ugaling, ang hulagway ni Jules Verne sa panid 3 morag iya ni William Morris, ika-19ng-siglong dibuhista ug magsusulat.

R. G., Tinipong Bansa

Ubay-ubayng magbabasa ang nakakita niining maong sayop. Dihay klerikal nga sayop, ug ang among payl nga letrato ni William Morris nasayop pagngalan. Among gikasubo ang pagkabaylo.​—ED.

Kahibulongang Uniberso Human sa pagbasa sa inyong seryeng “Ang Katingalahang Uniberso​—Diin Kini Gikan?” (Enero 22, 1996), akong nakab-ot ang mas tin-awng pagsabot sa bag-ong siyentipikanhong hunahuna bahin sa uniberso. Ang inyong presentasyon gipasiugda sa batid nga paggamit sa daghang impormasyon, mga tinubdan, ug mga reperensiya. Ingong usa ka magtutudlo, gamiton nako pag-ayo ang materyal nga inyong gipresentar.

M. P., Tinipong Bansa

Kanunay akong makabasa ug susamang mga artikulo sa ubang mga magasin, apan kanunay silang mapakyas sa paghatag ug pasidungog sa usa ka Tigdisenyo sa maong mga kahibulongan. Ang inyong mga artikulo nagtagana kon unsay gikinahanglan sa pagtagana sa maong kakulangan.

P. B., Italya

Dili lang kay tinuod ang materyal kondili makapalig-on kini sa pagtuo. Nagpalig-on kini sa atong apresasyon alang sa atong Diyos​—ang Tigmugna sa atong kahibulongan, katingalahang uniberso!

C. S., Gresya

Makalingaw gayod ang pagbasa sa mga artikulo. Ako 14 anyos, ug kanunay akong may dakong pagdayeg alang sa uniberso. Kining mga artikuloha nagpaamgo kanako sa kawalay-pulos sa mga tawo kon itandi sa kakomplikado niining maong linalang.

M. D., Portugal

Akong gibasa ang mga artikulo nga may linaing interes. Ako nalipay nga ang Pagmata! naghisgot sa maong mga ulohan. Naghatag kini kanako ug dugang pagsabot sa mga misteryo sa uniberso, ilabina ang impormasyon mahitungod sa ebidensiya sa “mga bula” nga 100 ka milyong light-year ang gidak-on, nga adunay daghang galaksiya sa gawas ug kahaw-ang sa sulod. Kini maghatag ug suliran sa modernong big bang nga teoriya! Ako nahingangha sa kadiyutay lamang sa atong nahibaloan bahin sa uniberso.

D. K., Czech nga Republika