Sa Dihang ang mga Pulong Mahimong mga Hinagiban

“May tawo nga magpatakag sulti nga sama sa mga pagduslak sa usa ka espada.”—PROVERBIO 12:18.

“SULOD sa mga semana human sa kasal, kini nagsugod,” miingon si Elaine.a “Mabangis nga mga pulong, makapamenos nga mga komento, ug mga paningkamot sa pagpaubos kanako. Dili ako makaparang sa akong bana. Tuison ug lainon-ug-sabot sa iyang abtik nga hunahuna ug abtik nga dila ang akong tanang gipamulong.”

Sa tibuok nga panahon sa iyang kaminyoon gipaagom si Elaine sa malamayon nga matang sa pag-atake nga dili magbilin ug mga ulat ug makapukawg gamayng simpatiya. Makasubo, ang iyang kahimtang wala moarang-arang sa paglabay sa panahon. “Kami karon minyo na kapin sa 12 ka tuig,” siya miingon. “Walay adlawng molabay nga dili siya manaway ug mangantalita kanako, mosultig mahait, ngil-ad nga sinultihan.”

Ang Bibliya wala maghinobra sa dihang kini nag-ingon nga ang dila mahimong “usa ka dili-pamando makadaot nga butang, . . . puno sa makamatay nga lala.” (Santiago 3:8; itandi ang Salmo 140:3.) Tinuod kini ilabina diha sa kaminyoon. “Kon kinsa man ugaling ang miingon nga ang ‘mga lipak ug mga bato makabali sa akong mga bukog apan nungka nga makasakit kanako ang mga pulong’ sayop gayod kaayo,” matod pa sa usa ka asawa nga ginganlag Lisa.​—Proverbio 15:4.

Ang mga bana mahimong tumong usab sa pag-atake sa mga pulong. “Nahibalo ka ba kon sama sa unsa ang pagpuyo uban sa usa ka babaye nga kanunayng motawag kanimo nga bakakon, kulangkulang o mas grabe pa?” nangutana si Mike, kansang upat ka tuig nga pagkaminyo kang Tracy nagpaingon sa diborsiyo. “Dili nako mabungat diha sa pinog pamatasan nga kaubanan ang mga butang nga iyang gisulti kanako. Maoy hinungdan kon nganong dili ako makasulti kaniya ug kon nganong magpabilin ako sa trabaho nga gabii na kaayo. Mas linaw pa sa trabahoan kay sa pagpauli.”​—Proverbio 27:15.

Uban sa maayong katarongan, gitambagan ni apostol Pablo ang mga Kristohanon: “Kuhaa gikan kaninyo ang . . . sininggitay ug maabusohong sinultihan.” (Efeso 4:31) Apan unsa ang “maabusohong sinultihan”? Gilain kini ni Pablo gikan sa “sininggitay” (Grego, krau·geʹ), nga nagkahulogan sa yanong pagpataas sa tingog. Ang “maabusohong sinultihan” (Grego, bla·sphe·miʹa) mas nagpasabot sa unod sa mensahe. Kon kini madaogdaogon, makidaoton, makapaubos, o mainsultohon, nan kini maoy maabusohong sinultihan​—mogawas man kini pinaagi sa singgit o sa hunghong.

Ang mga Samad sa mga Pulong

Ang sumbanan sa masakit nga sinultihan makadaot sa kaminyoon, sama sa mga balod sa dagat nga makakankan sa gahi nga bato. “Kon mas grabe ug masubsob,” nagsulat si Dr. Daniel Goleman, “mas dako ang kapeligrohan. . . . Ang kanunay nga pagpanaway ug pagtamay o pagkasuko maoy peligrong mga ilhanan tungod kay nagpakita kini nga ang bana o asawa nakahimo na ug hilom nga paghukom sa labing mangil-ad bahin sa ilang kapikas.” Sa dihang magkawala ang pagmahal, ang bana ug asawa mahimong, sama sa pagkapadayag niana sa usa ka libro, “minyo sa legal, apan dili sa emosyonal.” Sa ulahi, lagmit sila magdiborsiyo.

Apan, ang mapanamastamason nga sinultihan makaapektar ug labaw pa kay sa kaminyoon mismo. Ang sanglitanan sa Bibliya nag-ingon: “Tungod sa kasubo sa kasingkasing ang espiritu mamaluya.” (Proverbio 15:13) Ang kalisod nga mosangpot gumikan sa nagpungasi nga mga pulong nga makapasilo mohatag ug dakong kadaot sa panglawas sa usa. Pananglitan, usa ka pagtuon nga gihimo sa University of Washington (T.B.A.) nagpakita nga ang babaye nga nag-antos sa masubsob nga pagyubit daling matakboyan sa sip-on ug ubo, mga sakit sa pantog, mga yeast infection, ug mga sakit sa tiyan ug tinai.

Daghang asawa nga nag-antos sa binaba ug pisikal nga pagdagmal nag-ingon nga ang mga pulong mas grabe pang makasakit kay sa mga kumo. “Ang mga bun-og gikan sa iyang paglaparo maayo ug mawala ra sa ulahi,” nag-ingon si Beverly, “apan nungka nungka nga makalimtan ko ang mangil-ad kaayong mga butang nga iyang gisulti bahin sa akong panagway, sa paagi sa akong pagluto, sa paagi sa akong pag-atiman sa kabataan.” Mao usab kanay gibati ni Julia. “Nahibalo ako nga binuang kining pamation,” miingon siya, “apan mas gusto ko pa nga suntokon niya ako ug matapos na kana kay sa agomon ang padayon nga pagsakit sa hunahuna.”

Apan nganong pasakitan man ug sulti ug tamayon sa ubang mga tawo ang usa nga ilang giangkon nga gihigugma? Tagdon sa sunod nga artikulo kining pangutanaha.

[Footnote]

[Blurb sa panid 4]

“Mas gusto ko pa nga suntokon niya ako ug matapos na kana kay sa agomon ang padayon nga pagsakit sa hunahuna”

[Blurb sa panid 4]

“Nahibalo ka ba kon sama sa unsa ang pagpuyo uban sa usa ka babaye nga kanunayng motawag kanimo nga bakakon, kulangkulang o mas grabe pa?”