Ang Atong Labing Maayong Higala Anaa sa Kalibotan sa mga Espiritu

ANG Bibliya naghatag kanato ug klarong larawan niadtong nagpuyo sa kalibotan sa mga espiritu. Si Jehova nga Diyos mao ang supremo sa langit. Si Jesu-Kristo mao ang sunod ni Jehova sa gahom ug awtoridad. Ang mga manulonda nga matinumanon sa Diyos nag-alagad ingong mga ministro sa Diyos ug sa iyang katawhan sa yuta. Si Satanas ug ang iyang mga demonyo nagbatok sa Diyos ug nagpahisalaag sa mga tawo. Ang mga patay nangatulog sa kamatayon hangtod nga ang Diyos magabanhaw kanila.

Ang mga Demonyo Buot sa Atong Pagsimba

Sanglit ang mga patay walay-kinabuhi, walay makuha sa pagsimba kanila. Ang paghalad sa mga patay nagpalambo lamang sa kabakakan ni Satanas ug sa iyang mga demonyo.

Buot ba sa mga manulonda sa Diyos ang atong pagsimba? Dili gayod! Ang matinumanong mga manulonda naghatag ug himaya sa Diyos ug nagdasig sa mga tawo sa paghimo ug sama. Duha ka higayon, misulay si apostol Juan sa pagsimba sa mga manulonda, apan ilang gisaway siya, nga nag-ingon: “Pagbantay! Ayaw kana buhata! . . . Simbaha ang Diyos.”​—Pinadayag 19:10; 22:8, 9.

Si Satanas ug ang iyang mga demonyo, nga lahi sa matinumanong mga manulonda, buot nga pagasimbahon ug himayaon. Nadayag kini sa dihang gitental ni Satanas si Jesus sa dihang si Jesus usa pa ka tawo sa yuta. Ang Bibliya nag-asoy: “Ang Yawa midala [kang Jesus] ngadto sa usa ka bukid nga talagsaon kahabog, ug gipakita kaniya ang tanang gingharian sa kalibotan ug ang ilang himaya, ug miingon siya kaniya: ‘Kining tanang butanga akong igahatag kanimo kon ikaw mohapa ug mohimog buhat sa pagsimba kanako.’”​—Mateo 4:8, 9.

Si Jesus mitubag: “Pahilayo, Satanas! Kay kini nahisulat, ‘Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.’” (Mateo 4:10) Si Jesus nahibalo sa Kasugoan ni Jehova, ug siya midumili sa paglapas niana.​—Deuteronomio 6:13.

Bisag wala molampos si Satanas sa paghimo kang Jesus sa pagsimba kaniya, siya milampos sa uban. Siyempre, pipila ka tawo ang tinuyong nagsimba kang Satanas. Bisan pa, pinaagi sa panglingla, panglimbong, kabakakan, ug kahadlok, si Satanas ug ang iyang mga demonyo milampos sa pagpalayo sa daghan kaayong tawo gikan sa putli nga pagsimba kang Jehova nga tungod niini si apostol Juan misulat: “Ang tibuok kalibotan nahimutang diha sa gahom sa tuman-kadaotang usa.” (1 Juan 5:19) Kadtong nagsimba sa mga paagi nga sukwahi sa Pulong sa Diyos nagpasidungog kang Satanas, dili kang Jehova. Ang Bibliya nagpasidaan: “Ang mga butang nga ginahalad sa mga nasod ilang ginahalad ngadto sa mga demonyo, ug dili ngadto sa Diyos.”​—1 Corinto 10:20.

Pagsimba Iya Kang Jehova

Ang atong pagsimba angay itumong ngadto sa Diyos lamang. Gisultihan ni Jehova si Moises: “Dili ka magbaton ug lain nga diyos sa atubangan ko. Dili ka magbuhat alang kanimo ug linilok nga larawan o bisan sa dagway sa bisan unsang butanga nga atua sa itaas sa langit kon dinhi sa ubos nga yuta kon sa anaa sa tubig sa ilalom sa yuta. Dili ka magyukbo kanila ni madala sa pag-alagad kanila, tungod kay ako si Jehova nga imong Diyos usa ka Diyos nga nagapangayo ug eksklusibong debosyon.”​—Exodo 20:3-5.

Bisag talagsaon kaayo si Jehova sa pagkahalangdon, siya daling maduol. Ang tinun-ang Santiago nagsulat: “Duol sa Diyos, ug siya moduol kaninyo.” (Santiago 4:8) Si apostol Pablo nagsulat: “[Ang Diyos] dili halayo gikan sa matag usa kanato.” (Buhat 17:27) Ug si apostol Juan nagsulat: “Mao kini ang pagsalig nga atong gibatonan ngadto [kang Jehova], nga, walay sapayan kon unsay atong pangayoon sumala sa iyang kabubut-on, kita iyang dunggon. Dugang pa, kon nahibalo kita nga iya kitang dunggon mahitungod sa bisan unsa nga atong ginapangayo, nahibalo kita nga mabatonan nato ang mga butang nga gipangayo sanglit ato mang gipangayo kini kaniya.”​—1 Juan 5:14, 15.

Matikdi nga si Juan nagsulat nga ihatag ni Jehova ang atong mga ginapangayo kon kita mangayo “sumala sa iyang kabubut-on.” Aron mahibalo kon unsa ang kabubut-on sa Diyos, kinahanglang magtuon kita kon unsay gitudlo sa Bibliya. Ang mga Saksi ni Jehova malipay sa pagtabang kanimo sa pagsabot sa Bibliya.

Samtang magpakakat-on ka pa bahin kang Jehova, makabaton ka ug dugang kahibalo bahin niadtong nagpuyo sa kalibotan sa mga espiritu. Kini nga kahibalo mohatag ug kagawasan batok sa mga patuotuo, mga pagtuo, ug mga tradisyon nga gigamit ni Satanas aron mahadlok ug maulipon ang mga tawo. Pinaagi sa tukmang kahibalo sa Diyos, ikaw makakat-on sa pagsalig kaniya sa pagtabang kanimo sa paglikay o sa pagbuntog sa adlaw-adlawng mga problema sa kinabuhi. Ikaw mahimong higala sa Diyos. Ug ang Diyos mapamatud-an alang kanimo nga “usa ka dalangpanan ug kalig-on, usa ka tabang nga makita dihadiha panahon sa kalisdanan.”​—Salmo 46:1.

Daotang mga Gahom Pagalaglagon

Ayaw gayod pagduhaduha nga modaog ang espirituhanong mga puwersa sa maayo batok sa espirituhanong mga puwersa sa daotan. Ang gubat batok sa kalibotan sa mga espiritu tapos nang nasangka nga naghinlo sa kalangitan kang Satanas ug sa iyang daotang mga kauban. Ang basahon sa Pinadayag nag-ingon: “Miulbo ang gubat sa langit: Si Miguel [ang nabanhawng Jesu-Kristo] ug ang iyang mga anghel nakiggubat sa dragon, ug ang dragon ug ang mga anghel niini nakiggubat apan kini wala makadaog, ni may dapit pang nakaplagan alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta; siya gitambog sa yuta, ug ang iyang mga anghel gitambog uban kaniya.”​—Pinadayag 12:7-9.

Unsay resulta niadtong gubata? Ang taho nagpadayon: “Gumikan niini panagsaya, kamong mga langit ug kamong mga nagapuyo niini! Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” (Pinadayag 12:12) Kadtong atua sa langit makahimo sa paglipay, sanglit si Satanas ug ang iyang mga demonyo wala na didto sa pagpahinabog kagubot. Ang iyang pagkatambog gikan sa langit, hinunoa, naghatag ug dagkong kalisdanan, dagkong kagubot, niadtong anaa sa yuta. Kita nagkinabuhi na nianang panahona sa kalisdanan karon.​—2 Timoteo 3:1-5.

Usa ka Umaabot nga Walay Daotan

Bisan pa, ang Bibliya nagtanyag usab ug paglaom. Kini nagpasalig kanato nga ‘mubo na ang panahon’ sa Yawa sa dili pa siya pugngan sa paglihok. Sa dihang mahitabo kana, magdala si Jehova ug katingalahang mga panalangin ngadto sa tanan sa yuta nga nangita sa iyang pagpakighigala. Tagda ang pipila sa iyang mga saad alang sa umaabot:

“Abunda unya ang mga lugas sa yuta; sa ibabaw sa kabukiran adunay pagsugwak.”​—Salmo 72:16.

“Ang buhat sa ilang kaugalingong mga kamot bug-os nga mapahimuslan sa akong mga pinili. Sila dili maghago nga walay kapuslanan.”​—Isaias 65:22, 23.

“Walay molupyo ang moingon: ‘May sakit ako.’”​—Isaias 33:24.

“Niana unyang panahona ang mga mata sa mga buta mangabuka, ug ang dalunggan sa mga bungol makadungog. Niana unyang panahona ang bakol molukso sama sa lagsaw, ug ang dila sa mga amang mosinggit sa kalipay.”​—Isaias 35:5, 6.

“Ug pahiran [sa Diyos] ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang mitaliwan na.”​—Pinadayag 21:4.

“Ang mga matarong mismo magapanunod sa yuta, ug sila magapuyo diha niini sa walay kataposan.”​—Salmo 37:29.

Si Jehova lamang, ang matuod nga Diyos, ang makatuman sa maong dagkong mga saad. Walay makapugong kaniya sa pagtuman sa iyang katuyoan. “Sa Diyos walay kapahayagan nga maimposible.”​—Lucas 1:37.

[Mga hulagway sa panid 9]

Sa dihang ikaw mahimong higala sa Diyos, siya motabang kanimo pag-atubang sa mga problema sa kinabuhi