Gikan sa Among mga Magbabasa

Panumdoman Akong kinasingkasing nga pagpasalamat sa artikulong “Mapauswag Nimo ang Imong Panumdoman.” (Abril 8, 1996) Kaniadto gisulayan nako paghinumdom ang mga ngalan sa tanang membro sa akong lokal nga kongregasyon sa mga Saksi ni Jehova​—apan wala molampos. Ang pag-aghat misamot di pa dugay sa dihang ako giasayn sa Watch Tower Society nga mag-alagad ingong nagapanawng ministro. Kining artikuloha nagtubag sa akong mga pag-ampo! Pinaagi sa pagpadapat sa mga sugyot nga gihatag, ako nakahinumdom sa mga ngalan sa labaw sa katunga niadtong akong nahimamat sa walo ka lainlaing mga kongregasyon.

C. E. U., Nigeria

Nakaplagan ang Diyos Daghang salamat sa artikulong “Gitugotan Kami sa Diyos nga Makaplagan Siya.” (Marso 22, 1996) Samtang ako nagbasa niana, nanglugmaw sa akong mga mata ang mga luha sa kalipay alang kang Scott ug Steve Davis. Ang ilang kasinatian nakapalig-on sa akong determinasyon nga mosulod sa usa ka karera sa bug-os-panahong ministeryo human ako mograduwar sa tunghaan.

G. G., Italya

Wala pa gayod ako makabasa ug kasinatian nga ingon ka kahibulongan ug makapadasig sama niini! Seguradong miuyon si Jehova sa dihang nakita niya kining duha ka batan-ong mga lalaki nga naningkamot pag-ayo sa pag-alagad kaniya. Ang ilang dili-mahakogong pag-alagad sa Diyos dalayegon kaayo.

J. D., Tinipong Bansa

Ang sugilanon sa pagpangita ni Scott ug Steve sa Diyos makapadasig gayod. Ako usab nangita sa Diyos diha sa daghang iglesya apan wala gayod matagbaw. Buot ko gayod nga pahimut-an ang Diyos apan walay ideya kon unsaon paghimo kana. Pagkadako sa akong pasalamat nga si Jehova nasayod sa tinguha sa akong kasingkasing! Ang pag-alagad kang Jehova nakaluwas sa akong kinabuhi ug nagdala kanako ug kalipay.

D. C., Tinipong Bansa

Panalipod sa Diyos? Naguol ako di pa dugay tungod kay ako naghunahuna nga si Jehova wala maminaw sa akong mga pag-ampo. Apan, ang artikulong “Ang Hunahuna sa Bibliya: Makadahom ba ang Tinuod nga mga Kristohanon sa Panalipod sa Diyos?” (Abril 8, 1996) nakatabang kanako sa pagsabot nga ang Diyos molihok sumala sa iyang mga katuyoan ug dili kanunayng sumala sa atong mga kagustohan. Hinaot si Jehova magapanalangin kaninyo samtang nagasulat kamo sa mga artikulo nga motabang kanato sa pagbutang sa atong pagsalig kaniya.

C. A. A., Brazil

Ginamit Nang mga Kotse Salamat sa artikulong “Kon Unsaon Pagpalit ug Ginamit Nang Kotse.” (Abril 8, 1996) Ang akong bana ug ako bag-o pa lang nakapalit ug ginamit nang kotse. Morag maayo pa ang andar niadto sa sinugdan, apan human sa duha ka semana nagsugod kami pagkadungog ug mga kagalkal. Human sa unom ka semana ang kotse bug-os nga naguba. Kon nabatonan pa unta namo kining maayong impormasyon sa una, tingali dili unta kami makabaton ug gubaon nga kotse nga nagparking sa among draybwey.

M. C., Tinipong Bansa

Ingong propesyonal nga teknisyan sa awto, buot kong modugang ug usa ka punto. Una ka mopalit ug ginamit nang kotse, susiha kon ang mga numero diha sa kaha sa sakyanan ug sa motor motukma sa mga numero diha sa porma sa pagrehistro. Kon dili o kon kana napapas, malagmit kinawat nga sakyanan ang imong mapalit!

M. V., Republika sa Czech

Salamat sa makatabang nga sugyot.​—ED.

Walay Aso nga Tabako Salamat sa artikulong “Mga Batan-on Nangutana . . . Walay Aso nga Tabako​—Makadaot Ba?” (Abril 22, 1996) Wala nako kaayo masabti ang ulohan, nga maoy nag-aghat kanako nga basahon ang artikulo. Bisan tuod wala ako makahibalag niining sulirana dinhi sa Togo, ang artikulo nakatabang kanako sa pagsabot sa mga matang sa suliran nga nag-apektar sa uban sa lainlaing bahin sa kalibotan.

C. H., Togo

Gustoan akong mobasa sa tanan ninyong mga artikulo, apan kini mao ang kinamaayohan. Adunay mga batan-on dinhi nga nagagamit ug walay aso nga tabako, apan kining artikuloha nagpasidaan mahitungod sa mga kapeligrohan. Dili gayod ako mogamit niana.

P. H. W., Brazil