Mapailin-ilinon, Apan Komitido sa Diyosnong mga Sukdanan
“ANG matinugotong mga tawo dili gayod mga buang, ug ang mga buang nga mga tawo dili gayod matinugoton,” nag-ingon ang sanglitanang Ininsek. Tinuod kini nga sanglitanan, sanglit ang pagkamatinugoton maoy usa ka hagit, nga nagkinahanglan ug pagkakomitido sa hustong mga sukdanan sa pamatasan. Apan haing mga sukdanan ang angay natong sundon? Dili ba makataronganon nga sundon ang mga sukdanan nga gilatid sa Magbubuhat sa katawhan, ingon sa gibatbat sa iyang Pulong, ang Balaang Bibliya? Ang Diyos mismo nagpakita sa kinamaayohang panig-ingnan sa pagsunod sa iyang mga sukdanan.
Ang Maglalalang—Atong Labing-Dakong Panig-ingnan
Ang Labing-Gamhanang Diyos, si Jehova, timbang kaayo sa pagkamatinugoton, nga wala maghinobra ni luag kaayo labot niini. Sulod sa kaliboan ka tuig, gitugotan niya kadtong nagpasipala sa iyang ngalan, nagdaot sa katawhan, ug nag-abuso sa yuta. Si apostol Pablo misulat, ingon sa girekord sa Roma 9:22, nga ang Diyos “nagtugot uban ang dagayang hataas-nga-pailob sa mga sudlanan sa kapungot nga gihimong angay sa kalaglagan.” Nganong ang Diyos matinugoton sa dugayng panahon? Tungod kay ang iyang pagkamatinugoton may katuyoan.
Ang Diyos mapailobon sa katawhan “tungod kay wala siya magatinguha nga adunay malaglag apan nagatinguha nga makakab-ot ang tanan sa paghinulsol.” (2 Pedro 3:9) Ang Maglalalang naghatag sa katawhan ug Bibliya ug nagsugo sa iyang mga alagad nga ipahibalo ang iyang mga sukdanan sa pamatasan bisan asa. Ang matuod nga mga Kristohanon komitido niini nga mga sukdanan. Apan nagpasabot ba kini nga ang mga alagad sa Diyos mag-inestrikto sa tanang kahimtang?
Malig-on, Apan Mapailin-ilinon
Gidasig ni Jesu-Kristo kadtong nagtinguha sa kinabuhing dayon sa ‘pagsulod agi sa sigpit nga ganghaan.’ Apan ang pag-agi sa sigpit nga ganghaan wala magpasabot ug kasigpit sa hunahuna. Kon makiling kita sa paghinarihari o pagkadogmatiko kon duyog sa uban, tinong mahimong mas makapahimuot ang kinabuhi sa matag usa kon atong pukgoon kini nga kiling. Apan unsaon?—Mateo 7:13; 1 Pedro 4:15.
Si Theofano, usa ka Gregong estudyante kinsa nag-ingon nga ang panahon nga iyang gigugol uban sa mga tawo sa nagkalainlaing mga kagikan mitultol ngadto sa pagsabot ug maayo kanila, miingon: “Hinungdanon nga atong paningkamotan nga makasabot sa ilang paagi sa paghunahuna imbes pugson sila sa pagsagop sa atoa.” Busa, pinaagig pagkaila ug maayo sa usa, atong masayran nga ang iyang pagpili ug pagkaon ug bisan ang iyang tonada sa sinultihan dili ingon ka katingad-an kay sa atong gihunahuna. Imbes mao kanunay ang may labing daghang ikasulti o moinsistir nga mao kanunay ang mangibabaw, kita makakat-on sa daghang mapuslanong mga butang pinaagi sa pagpamati sa iyang panglantaw. Sa pagkatinuod, ang bukas-ug-hunahuna nga mga tawo makakaplag sa kinabuhi nga mas magantihon.
Kon malangkit ang personal nga kagustohan, angay kita nga magmapailin-ilinon ug tugotan ang uban nga malipay sa ilang kaugalingong gusto. Apan kon ang pamatasan may kalabotan sa pagkamasinugtanon sa atong Maglalalang, kita angay nga magmalig-on. Ang Labing-Gamhanang Diyos dili mokonsentir sa tanang matang sa pamatasan. Gipakita niya kini pinaagi sa iyang mga pagpakiglabot sa iyang mga alagad sa nangagi.
Ang Lit-ag sa Pagkahimong Sobra ka Matinugoton
Si Eli, usa ka hataas nga saserdote sa karaang nasod sa Israel, maoy usa ka alagad sa Diyos nga nalit-agan sa pagkahimong sobra ka matinugoton. Ang mga Israelinhon mihimog usa ka pakigtugong relasyon sa Diyos, nga miuyon sa pagsugot sa iyang mga balaod. Apan ang duha ka anak nga lalaki ni Eli, si Hofni ug Finehas, mga dalo ug imoral ug hilabihan ka dili matinahuron sa Labing Hataas. Si Eli, bisag sinati kaayo sa Kasugoan sa Diyos, nagbadlong lamang ug hinay ug luag sa iyang pagdisiplina. Nasayop siya sa paghunahuna nga tugotan sa Diyos ang pagkadaotan. Ang Maglalalang naghimog kalainan tali sa kahuyangan ug pagkadaotan. Tungod sa ilang kinabubut-ong paglapas sa Kasugoan sa Diyos, ang daotang mga anak nga lalaki ni Eli gisilotan ug maayo—ug makataronganon lamang.—1 Samuel 2:12-17, 22-25; 3:11-14; 4:17.
Pagkadakong katalagman unya alang kanato nga mahimong sobra ka matinugoton sa atong pamilya pinaagi sa dili pagtagad sa sublisubling sayop sa bahin sa atong mga anak! Pagkalabing maayo gayod nga matutuon sila “diha sa disiplina ug mapasiboong pagdumala-sa-kaisipan ni Jehova”! Kini nagpasabot nga kita kinahanglang magpabilin mismo sa diyosnong mga sukdanan sa panggawi ug itisok kini diha sa atong mga anak.—Efeso 6:4.
Sa susama, ang Kristohanong kongregasyon dili makatugot sa pagkadaotan. Kon ang usa ka membro makahimog grabeng kasaypanan ug dili maghinulsol, siya kinahanglang ipalagpot. (1 Corinto 5:9-13) Bisan pa niana, gawas sa palibot sa pamilya ug sa kongregasyon, ang matuod nga mga Kristohanon dili mosulay sa pagbag-o sa katilingban sa katibuk-an.
Usa ka Malig-ong Relasyon Uban Kang Jehova
Ang pagkadili-matinugoton mopatunghag kahimtang nga makapabalaka. Apan, kon kita may suod personal nga relasyon sa Diyos, matagamtam nato ang pagbati sa kasegurohan nga motabang kanato nga mahuptan ang hustong pagkatimbang. “Ang ngalan ni Jehova maoy usa ka malig-ong torre. Ang matarong modalagan nganha niana ug hatagan ug proteksiyon,” mabasa nato sa Proverbio 18:10. Tinong walay kadaot nga modangat kanato o sa atong mga minahal nga dili atimanon sa Maglalalang sa iyang takdang panahon.
Ang usa nga nakabenepisyo ug dako gikan sa suod personal nga relasyon sa Diyos mao si apostol Pablo. Ingong usa ka Hudiyo nga nailhang Saulo, gilutos niya ang mga sumusunod ni Jesu-Kristo ug sad-an siya sa pag-ula ug dugo. Apan si Saulo mismo nahimong Kristohanon ug, ingong apostol Pablo, sa ulahi nakigbahin sa bug-os panahong pag-ebanghelyo. Gipakita ni Pablo ang pagkabukas-ug-hunahuna diha sa pagsangyaw sa tanang tawo, “ngadto sa mga Grego ug mga Barbaro, sa mga maalamon ug sa mga walay-salabotan.”—Roma 1:14, 15; Buhat 8:1-3.
Sa unsang paagi nakahimo siya sa pagbag-o? Pinaagi sa pagbaton ug tukmang kahibalo sa Kasulatan ug pinaagi sa pagtubo sa gugma alang sa Maglalalang, nga dili mapihigon. Nahibalo si Pablo nga ang Diyos dili mapihigon sa pagkaagi nga Siya magahukom sa matag indibiduwal, dili sumala sa kultura o rasa, kondili sumala sa kon unsa siya ug kon unsa ang iyang binuhatan. Oo, alang sa Diyos, ang binuhatan hinungdanon. Si Pedro nag-ingon nga “ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” (Buhat 10:34, 35) Ang Labing-Gamhanang Diyos dili mapihigon. Lahi kini sa pipila ka mga lider sa kalibotan, nga tinuyong mogamit sa pagkadili-matinugoton alang sa ilang kaugalingong mga katuyoan.
Ang mga Panahon Nagakabag-o
Sumala kang John Gray, sa Oxford University sa Inglaterra, ang pagkamatinugoton maoy “usa ka hiyas nga niining bag-o nahimong lisod pangitaon.” Apan kini mabag-o. Ang pagkamatinugoton nga timbangan sa diyosnong kaalam mangibabaw.
Sa hapit nang moabot nga bag-ong kalibotan sa Diyos, ang pagkadili-matinugoton mahanaw. Ang hingaping mga porma sa pagkadili-matinugoton, sama sa pagpihig ug pagkapig-ot ug hunahuna, mahanaw. Ang pagkahiktin-ug-hunahuna dili na magtuok sa kalipay sa kinabuhi. Unya, aduna nay usa ka paraiso nga mas maanindot pa kay sa Walog sa Kashmir.—Isaias 65:17, 21-25.
Nagapanglantaw ka ba nga mabuhi nianang bag-ong kalibotan? Pagkadakong pribilehiyo ug pagkakulbahinam unya kana!
[Hulagway sa panid 8]
Si apostol Pablo nagpakitag timbang nga panglantaw tungod kay siya may usa ka relasyon uban sa Diyos