“Sa Dihang Ako Maluya, Niana Ako Gamhanan”
NAGDAKO ako sa usa ka gamay nga lungsod sa amihanan sa San Francisco, California, nga gitawag ug Petaluma. Ang akong mama may pagkarelihiyoso, apan ang akong papa wala makauyon sa relihiyon. Kanunay akong nagtuo sa usa ka maglalalang—wala lang ko mahibalo kon kinsa siya.
Samtang nagdako, ako usa ka malipayong bata. Pagkamakapahimuot nga handomon kadtong malipayong mga adlaw! Wala lang ko masayod nga dihay mga butang nga nahitabo sa sulod sa akong lawas nga mohikaw kanako sa dakong kagawasan. Maoy sa 1960, ang akong kataposang tuig sa hayskul, nga akong nahinumdoman nga nakigsulti ako sa akong suod nga higala mahitungod sa kasakit nga akong gibati sa pipila ka tudlo.
Sa wala madugay ang akong tiil misakit pag-ayo nga gidala ko sa akong mama sa usa ka ospital sa San Francisco, diin ako miestar sulod sa unom ka adlaw. Ako niadto 18 anyos, ug ang mga resulta sa mga pagsusi nagpadayag nga ako may rheumatoid arthritis. Misugod ako sa pagpaineksiyon ug gold sodium thiosulfate, unya prednisone, ug unya laing matang sa cortisone. Tanantanan, giineksiyonan ako niadtong mga tambala sulod sa 18 ka tuig, ug sa matag kaso, gikunhoran niini ang sakit sulod sa pipila ka tuig apan sa hinayhinay nahimong dili-epektibo, ug ako migamit sa laing tambal. Ang kanunayng kaul-ol dili ikabalewala, ug ako nadesperado sa akong pagpangita ug laing matang sa medikal nga tabang. Nakakaplag akog pipila ka alternatibong mga pagtambal nga nakatabang ug diyutay. Maayo na lang, dili na samang kasakit ang akong nasinati sa dihang ang sakit grabeng mikaylap sa tibuok nakong lawas.
Usa ka adlaw sa 1975, ang akong anak lalaki nakakita sa talaan nga gitipigan sa akong mama sa bata pa ako. Akong nadiskobrehan nga sa dihang ako nag-edad ug unom ka bulan, usa ka doktor ang misugod pag-X-ray kanako gumikan sa naghubag nga thymus. Ako nagtuo nga ang mga pagtambal pinaagig radyasyon nga gireseta kanako sa masuso pa lagmit mao ang katarongan nga ingon niini ang akong kahimtang karong adlawa. Kon mao man, pagkagrabeng sayop kadto!
Naminyo ako sa 1962. Pagka-1968, sulod sa sayong mga ang-ang sa akong sakit, ang akong bana, si Lynn, ug ako duyog nga nagtrabaho sa panaderya nga among gipanag-iya. Mobangon kami sa mga alas 4:00 s.b., ug ang akong bana mag-umol sa minasa ug unya usahay motagpilaw diha sa mga sako sa harina samtang ang tinapay anaa sa pugon. Amo kanang hiwahiwaon ug puston, ug dayon si Lynn maghatod niana. Usa ka higayon usa ka ahenteg insyurans miduaw sa panaderya ug nagsugilon kanamo bahin sa gisaad sa Diyos nga Gingharian. Nagustohan namo ang among nadungog, apan puliki kaayo kami. Ang among hatdanan ug tinapay nag-anam ka daghan, ug kami labi pang nabug-atan sa mas daghang sekular nga trabaho. Sa among kalipay, laing panaderya ang mipalit sa among panaderya! Si Lynn nagtrabaho alang kanila, ug ako nagtrabaho sa usa ka beauty shop. Apan, sa dihang migrabe ang artraytis, makatrabaho lamang ako ug tulo ka adlaw sa usa ka semana ug sa kataposan kinahanglang moundang sa bug-os.
Niadtong panahona, usa sa mga Saksi ni Jehova miduaw nga regular sa among balay ug nagtanyag kanako sa mga magasing Bantayanang Torre ug Pagmata! Kanunay nako siyang hatagan ug amot ug kuhaon ang mga magasin, nga naghunahuna nga gipakitaan ko siyag kaayo. Inigbiya niya, ako kining ibutang sa estante nga wala mapakli sulod sa pipila ka adlaw, ug unya usa kanamo kanunayng maglabay niana. Makapasubo kaayo kadto, sanglit karon among naapresyar ang espirituwal nga bili niana. Hinunoa, niadtong panahona, ang relihiyosong mga butang daw dili kaayo hinungdanon.
Mahunahunaon sa Among Espirituwal nga Panginahanglan
Usa ka gabii ang akong bana ug ako naghisgot nga may labaw gayong kahulogan sa kinabuhi kay sa pagkaon ug pagkatulog ug paghago pag-ayo. Misugod kami sa pagpangita sa espirituwalidad nga kulang sa among kinabuhi. Giliso namo ang among pagtagad sa usa ka gamayng simbahan diha sa among gipuy-an, apan wala namo makaplagi ang espirituwal nga kauswagan nga among gidahom. Ang mga membro sa simbahan kasagarang maghisgot sa ilang lokal nga mga suliran.
Ang Saksi nga nagdala sa mga magasin nagaduawan sulod na sa usa ka tuig, apan ang akong rutina wala mausab hangtod nga sa kataposan gibasa nako ang Abril 8, 1969, nga isyu sa Pagmata!, nga nag-ulohang “Ulahi na ba Kaayo kay sa Imong Gihunahuna?” Akong nagustohan ang akong nabasa, ug ikalipay, ingon usab niana ang epekto sa akong bana. Misugod kami sa pagtuon ug pagdawat dayon sa kamatuoran. Mahinamon namong gidawat ang tanang kahibulongang mga butang nga among nakat-onan. Pagka-1969 kami nabawtismohan.
Sa paglabay sa panahon, nalisdan ako sa pagtindog ug paglingkod ug mas nalisdan sa paglakaw. Pugson nako pagpiko ang akong mga tuhod aron mosulod ug mogawas sa sakyanan. Nakakat-on ako sa pagkinabuhi uban sa mga limitasyon ug kaul-ol nga subsob nakapahilak kanako. Unya akong retokehon ang akong mek-ap, ug kami moadto na sa mga tigom o mosangyaw sa kanataran. Molakaw ako gikan sa balay ngadto sa balay kutob sa akong maarangan. Gisulayan ko nga mosangyaw kas-a o kaduha sa matag semana, hangtod nga ang katikig ug kasakit sa akong tuhod ug mga tiil nagpaimposible niana. Subsob akong mabalaka basin matumba ug dili makabangon. Makatabang kon ako makigsulti kang Jehova. Usahay ako motuaw kaniya uban ang daghang luha.
Apan, ang paghilak dili gayod kanunayng posible. Ang tawo nga may rheumatoid arthritis maughan usab ug mata. Dihay mga panahon nga akong naagian nga ang kauga grabe kaayo nga malisod ang pagbasa. Sa dihang nahitabo kana, naminaw ako sa mga teyp sa Bibliya. Subsob akong maglakawlakaw nga magpiyong tungod kay ang pagpamilok makagaras sa akong mga mata. Maayo pag nabuta na lang ko. Usahay, butangan nakog artipisyal nga mga luha ang akong mga mata matag lima ka minutos. Mas grabe pa, kinahanglan nakong butangan ug ointment ang akong mata ug bendahean kini sulod sa lima o unom ka adlaw hangtod nga kini moarang-arang. Dili sayon ang pagpabiling mapasalamaton sa dihang ang usa nakigbisog sa tagdugay nga sakit nga dili makataronganong dahomon nga maayo sa kaugalingon niini niining sistemaha.
Sa 1978, kinahanglan akong mogamit ug silyang may ligid. Malisod ang paghimo sa maong desisyon. Ako kanang gioktaba kutob sa akong maarangan, apan wala na akoy kapilian. Ako nasayod nga ang adlaw moabot nga magkinahanglan ako ug silyang may ligid, apan ang akong paglaom mao nga ang bag-ong kalibotan sa Diyos unang moabot. Si Lynn mipalit ug usa ka taas nga lingkoranan sa dibuhista nga lapad ug limay-ligid. Ginamit kana, akong ikatulod ang akong kaugalingon palibot sa balay.
Makapahigawad kaayo ang pagkab-ot sa usa ka butang, sanglit ako dili makatuy-od pag-ayo sa akong bukton ug dili makakupot pag-ayo ang akong piko ug baliko nga mga tudlo. Busa, gamiton nako ang akong espesyal nga kimpit. Niana, makapunit ako ug mga butang gikan sa salog, makaabli ug aparador ug makakuhag plato, o makakuhag usa ka butang gikan sa repridyeretor. Samtang nakaugmad ako ug bag-ong mga kabatid ginamit ang akong kimpit, nakahimo ako sa pag-atiman sa pipila ka buluhaton sa panimalay. Makaluto ako, makapanghugas ug makapauga sa mga plato, makapamalantsa ug makapamilo sa mga sinina, ug makatrapo sa salog. Medyo mapagarbohon ako samtang nagauswag ang akong mga katakos, ug ako malipayon nga makatabang gihapon sa pipila ka panginahanglan sa panimalay. Apan, ang akong mahimo niadto sa pipila ka minuto karon mokabat na ug mga oras aron mahuman.
Pagsangyaw Pinaagig Telepono
Dugaydugay pa human ako makabaton ug kaisog nga mosulay pagsangyaw pinaagig telepono. Wala ko maghunahuna nga mabuhat ko kana, apan karon nalingaw gayod ako niana ug nakabaton ug pipila ka maayong kalamposan. Sa akong dakong kahibulong, sama ra kini sa pagpamalaybalay, sa diwa nga ako makapakig-estorya sa mga tawo mahitungod kang Jehova ug sa iyang mga katuyoan.
Usa sa mga presentasyon nga akong gamiton magsugod niining paagiha: “Halo, kini ba si G.——? Ako si Gng. Maass. Ako nakigsulti sa mga tawo sa makadiyot, ug kon makalugar ka sulod sa pipila ka minutos, mahimo ba akong makigsulti nimo? (Ang kasagarang tubag mao: “Bahin ba kana sa unsa?”) Makahahadlok ang pagtan-aw sa nagakahitabo sa kalibotan karong adlawa, dili ba? (Tugotan ko nga mokomento siya.) Buot nakong ipaambit kining mensahe sa Bibliya nga naghatag kanato ug tinuod nga paglaom alang sa umaabot.” Dayon akong basahon ang Pag-ampo sa Ginoo ug posible ang 2 Pedro 3:13. Nakahatag ako ug pipila ka balik-duaw sa ubang mga igsoong babaye o kang Lynn aron duawon alang kanako.
Latas sa katuigan, ako may daghang maayong mga kabildohay ug nakapadalag mga brosyur, mga magasin, ug mga libro niadtong nagpakita ug interes. Ang uban nagsugod sa pagtuon sa Bibliya pinaagi sa telepono. Usa ka babaye nga akong kaestorya miingon nga gibati niyang ang pagtuon nga magkinaugalingon igo na. Apan tapos sa daghang panaghisgot, miuyon siya sa pagduaw sa among balay alang sa panagtuon sa Bibliya, sanglit ako siyang gisuginlan bahin sa akong kahimtang.
Sa laing higayon sa dihang ako nagtelepono, ang usa ka recording machine mihatag ug bag-ong numero. Bisan tuod kanunayng lokal lamang ang akong mga tawag ug kini dili na lokal, gibati ko ang panukmod nga tawgon gihapon ang maong numero. Tapos sa pagpakigsultig makadiyot kanako, ang babaye nga nakatubag sa telepono miingon nga siya ug ang iyang bana buot makigkita sa mga tawo nga tinuod nga Kristohanon. Busa si Lynn ug ako miadto sa ilang balay, mga usa ka oras ang gilay-on, aron magtuon uban nila.
Nakakaplag gihapon akog kangaya ug kalipay sa pagpakigsulti sa uban mahitungod kang Jehova ug sa iyang saad nga bag-ong mga langit ug usa ka bag-ong yuta, diin nagapuyo ang pagkamatarong. Di pa dugay, usa ka babaye nga akong kasulti sulod sa daghang bulan misugilon kanako: “Matag higayon nga ako makigsulti kanimo, akong maamgohan nga ako nagakuha ug dugang kahibalo.” Ako nasayod nga ang kahibalo nga akong gipaambit sa uban motultol sa kinabuhing dayon ug mopatunghag kangaya nga mopatigbabaw bisan pag ako baldado. Usahay makahimo akog labaw pa diha sa pag-alagad kay sa ubang panahon, apan nanghinaot ako nga makahimo akog dugang, ug dugang pa sa tanang panahon! Ako nasayod nga si Jehova nasayod sa kahimtang sa matag usa ug nga siya nag-apresyar sa atong maarangan, bisan unsa ka gamay kana tan-awon. Kanunay nakong gihunahuna ang Proverbio 27:11: “Magmaalamon ka, anak ko, ug lipaya ang akong kasingkasing, aron matubag ko siya nga nagatamay kanako,” ug buot kong mahilakip niadtong nagpamatuod kang Satanas nga bakakon.
Ang pagtambong sa mga tigom kanunayng makapadasig, bisan tuod ug malisdan ako sa pag-adto didto. Si Jehova naghimog daghan kaayong kahibulongang mga tagana alang kanato aron mapakaon pag-ayo sa espirituwal nga buot kong pahimuslan kana sa bug-os. Pagkamalipayon namo nga ang among duha ka anak naghimo sa kamatuoran nga ilaha! Ang among anak babaye, si Terri, naminyo sa usa ka maayong igsoong lalaki, ug sila may upat ka anak nga gimahal ko pag-ayo. Pagkamakapadasig sa among mga kasingkasing nga makita ang among mga apo nga nahigugma usab kang Jehova! Ang among anak, si James, ug iyang asawa, si Tuesday, mipili sa pag-alagad kang Jehova sa Bethel sa Brooklyn, ang tibuok-kalibotang hedkuwarter sa mga Saksi ni Jehova, sa New York.
Usa ka Yutan-ong Paraiso Pinaagi sa Gahom ni Jehova
Naningkamot ako sa paghunahuna kanunay sa kahibulongang saad ni Jehova sa usa ka paraisong yuta. Bisan karon, adunay dagayang linalang niya nga kahimut-an. Malingaw ako sa matahom nga pagsalop sa adlaw. Malipay ako sa nagkadaiya nga kabulakan ug ilang alimyon. Gustoan ko ug mga rosas! Dili ako kanunayng makagawas sa balay, apan kon mahimo nako, bug-os nakong pahimuslan ang kainit sa adlaw. Akong piyongon ang akong mga mata ug handurawon ang usa ka matahom nga talan-awon sa kabukiran, uban sa akong pamilya nga naglingawlingaw sa lapad nga kabalilihan nga puno sa ihalas nga mga bulak. Adunay nagdaganas nga sapa ug daghang dugaon, tam-is nga pakwan alang sa tanan! Kon mahimo nako, ako magdibuho ug mga hulagway sa mga butang nga motabang kanako sa paghunahuna sa gisaad nga yutan-ong Paraiso nga moabot. Samtang ako magdibuho, akong handurawon ang akong kaugalingon nga atua didto. Ako nasayod nga si Jehova makapatinuod sa bililhong mga butang nga hinanduraw nga gimahal ko karon pag-ayo.
Buot kong hinumdoman ang teksto sa Santiago 1:12. Kini nag-ingon: “Malipayon ang tawo nga mapadayonong nagaagwanta sa pagsulay, tungod kay sa pagkahimong inuyonan iyang madawat ang purongpurong sa kinabuhi, nga gisaad ni Jehova niadtong padayon nga nagahigugma kaniya.” Si Pablo nagtandi sa iyang balatian sa usa ka ‘manulonda ni Satanas nga kanunayng nagsagpa kaniya.’ Siya nag-ampo nga kuhaon ni Jehova ang iyang kakulian, apan giingnan siya nga ang gahom sa Diyos nahimong hingpit diha sa iyang kaluyahon. Busa ang kalamposan ni Pablo bisan pa sa iyang kaluyahon maoy pamatuod sa gahom sa Diyos diha kaniya. Si Pablo nag-ingon: “Sa dihang ako maluya, niana ako gamhanan.” (2 Corinto 12:7-10) Akong gibati nga bisan unsa ka gamay ang akong mahimo karon bisan pa sa akong mga limitasyon maoy pinaagi lamang sa gahom sa Diyos nga ania kanako.
Si Juan nagsulat ug asoy nga nakapadasig gayod kanako. Kini mahitungod sa usa ka tawo nga naglubog sa teheras sulod sa 38 ka tuig. Siya, duyog sa ubang mga masakiton, naghigda nga malaomon duol sa danaw, nga nagtinguha gayod nga marepreskohan mismo niana. Dili siya makaadto sa tubig, nga iyang gihunahuna nga makaayo kaniya. Usa ka adlaw si Jesus nakakita kaniya ug nangutana kaniya: “Buot ba nimong mamaayo sa panglawas?” Uban sa mga luha sa kalipay akong tubagon kanang pangutanaha! “Si Jesus miingon kaniya: ‘Bangon, alsaha ang imong teheras ug lakaw.’” (Juan 5:2-9) Adunay daghan kanamo nga mahinamong naghulat nga makadungog sa maong pagtawag!—Sumala sa giasoy ni Luretta Maass.
[Hulagway sa panid 24]
Ako naghunahuna sa usa ka bata nga nahigugma sa mga tawo, ug ania siya, malipayon nga naglakaw sa kabalilihan
[Hulagway sa panid 25]
Sa dihang malipayon, akong handurawon ang usa ka adbenturerong batang lalaki nga nagkarang, uban sa iyang iro diha sa ubos
[Mga hulagway sa panid 26]
Pagtigom ug mga numero sa telepono alang sa pagsangyaw sa kanataran
Pagdayal sa telepono