Gikan sa Among mga Magbabasa

Pagsagop Salamat sa seryal nga “Pagsagop​—Ang mga Kalipay, ang mga Suliran.” (Mayo 8, 1996) Sinagop ako nga bata, ug dili gayod ako mahibalo kon unsaon pagpakighisgot niining ulohana uban sa akong nagsagop nga mga ginikanan. Busa makapahinam gayod ang pagdawat niining isyuha sa Pagmata! Wala pay mga artikulo sukad nga nakatandog pag-ayo sa akong kasingkasing nga sama niini.

F. R. M., Brazil

Sinagop ako, ug di pa dugay ako mihukom sa pagsusi kon unsay akong mahimo bahin sa akong tinuod nga mga ginikanan. Bisan tuod nakakuha ako ug hinungdanong impormasyon bahin sa akong mga ginikanan, nasayran usab nako nga giatiman ako sa akong inahan sulod sa tulo ka bulan una pa ako gipasagop. Sakit kaayo kadto alang kanako! Gisukna ko ang kaugalingon, ‘Nganong nakaako siya paghimo niadto?’ Buweno, ang kahon nga “Mangita ba ang Akong Anak Lalaki Kanako?” nagpaamgo kanako sa pagbati sa usa ka inahan. Pagkadakong tabang nianang gamayng artikulo kanako nga makasagubang!

C. S., Tinipong Bansa

Kalipayg-kasakit alang kanako ang mga artikulo. Gipasagop nako ang akong anak nga lalaki 23 ka tuig na kanhi. Gihimo ko kadto sanglit ako nasayod nga dili ako makaamoma kaniya. Matag adlaw ako maghunahuna, ‘Komosta na kaha siya? Komosta na kaha karon ang iyang kinabuhi? Makita ko pa ba siya pag-usab?’ Ang pagkasad-an usahay bug-at kaayo. Apan mapasalamaton gayod ako kang Jehova sa iyang gugma ug kaluoy.

S. F., Tinipong Bansa

Bisan tuod kami adunay kaugalingong anak nga lalaki, ako ug ang akong bana nagplano sa pagsagop ug gamayng batang babaye. Ang artikulo nakatabang kanako sa pagkakita sa maayo ug daotan ug makatabang kanamo sa paghimog desisyon.

J. G., Tinipong Bansa

Nasabtan nakong nagsugyot mo batok sa problemadong mga pagsagop. Apan unsa may mahitabo sa maong mga bata kon sila isalikway? Karon kami adunay pipila ka mga suliran sa among sinagop nga anak nga lalaki. Apan unsang matanga sa mga suliran ang mahimo sa maong mga bata sa katilingban kon dili gayod sila makadawat sa gugma ug kasegurohan sa usa ka pamilya?

D. M., Alemanya

Ang among kasingkasing nakigduyog uban sa mga kabataan nga nahikawan sa pag-amoma sa mahigugmaong mga ginikanan. Ang mga artikulo gisulat, dili aron pahuyangon ang pagsagop sa “lisod atimanong” kabataan, apan aron dasigon ang mga magtiayon sa “pagkuwenta sa bili” sa pagbuhat sa ingon, sa matinud-anong paagi. (Itandi ang Lucas 14:​28.) Ang umaabot nga mosagop nga mga ginikanan angayng mamalandong kon aduna ba silay emosyonal, espirituwal, o pinansiyal nga mga kahinguhaan nga gikinahanglan aron maatiman ang mga panginahanglan sa maong mga bata. Timbangtimbangon usab nila ang posibleng mga epekto sa pagsagop ngadto sa ubang kabataan nga nagpuyo sa balay.​—ED.

Lima ang sinagop namong kabataan, dugang pa sa among tulo ka pursosong mga anak. Nasinati namo ang tumang kalipay nga inyong gisulat ug ang kasakit. Ang among tanang anak mga magdadayeg ni Jehova gawas sa among anak nga lalaki. Human gisagop sa edad nga 16, iyang gipanamastamasan ang among tulo ka anak nga babaye. Ang ahensiya sa pagsagop napakyas sa pagpahibalo kanamo sa iyang kagikan. Kinahanglang susihon gayod pag-ayo sa usa ang tanang impormasyong posible sa dihang maghunahuna pagsagop​—ilabina kon ang usa magplano sa pagsagop ug edaran nga bata. Maayo kaayong pagkasulat ang inyong mga artikulo ug tin-awng nagladlad sa duha ka kiliran sa isyu.

P. B., Tinipong Bansa

Gikasubo nako pag-ayo ang pagkasayod nga pipila ka nagsagop nga mga ginikanan nakasugamak ug ingon niana nga negatibong mga kasinatian. Ako ug ang akong bana misagop ug duha ka matahom nga bata, ug wala silay gihatag gawas sa kalipay sa among kinabuhi. Kanunay kaming prangka ngadto kanila bahin sa ilang pagsagop. Gipasabot namo ang matag usa kanila nga ang ilang tinuod nga mga inahan wala ‘magsalikway kanila’ apan naghikay sa pag-amoma kanila sanglit wala pa silay ikasarang niadtong panahona sa ilang kinabuhi aron atimanon ang usa ka bata. Ang mga tawo kasagarang moingon kanamo nga pagkabulahan sa mga anak nga among nasagop. Apan, ang tinuod mao nga kami mao ang mga bulahan.

B. M., Tinipong Bansa